MZP in A Lalrawnliana thihnaa inhnamhnawihte hrem phut; Ral turin MZP hruaitute kal dawn

Aizawl | January 16, 2020: MZP chuan Bungtlang 'S' tlangval A. Lalrawnliana rawng taka thah a ni chu a dem takzet a. MZP hruaitute chu A. Lalrawnliana chenna hmuna ral tur leh a thihna hmun tlawh tura kal an rel. Thil tisualtute hi an phu anga hrem ngei MZP chuan a phut takzet a, Mizoram sorkar pawhin a mite thlavang hauha mit aiah mit tih hreh lo leh hnam dangin min zuam ta lutuk khap dai tura hma la turin MZP chuan thuneitute an ngen nghal bawk.

MZP General Headquarters Pisa Pui hawnna Programme chu vawiin khan hmangin MZP General Headquarters vice president Peter Chhangte in kaihruaiin, MZP Adviser Revd Chuauthuama'n hunserh a hmang a, MZP general secretary Lalnunmawia Pautu hnen aṭangin report an ngaithla.

He huna thusawitu MZP preident B Vanlaltana chuan "MZP te hian Pisa Pui hi khar thin mah ila Ram leh Hnam tana chet angaih hunah chuan kan inhawng reng thin a. Kumthar 2020-ah hian ngaihtuahna thar leh inpekna thar nen kan ram, kan hnam leh kan tu leh fate tan intuai thar leh ila, kan hmaa tih tur awm te huaisen taka ti zel thei turin kan inbuatsaih a ngai a ni" a ti a.

 "Citizenship Amendment Bill (CAB) chu pass a ni ta a. CAB/CAA Kan dona kawngah nasa takin MZP in beih kan tawk a. MZP hmalakna hi a dik a ni tih hi a chiang a, he Citizenship Amendment Act (CAA) hian kan State min huam lo mahse Kan thenawm state-ah hman anih chuan kan state leh kan hnam tan a him chuang lova. Kan sorkar hian State dang atanga dan lo a lo lut hnam dangte dapchhuah hna thawk turin kan ngen a ni" a ti bawk. 

MZP Executive meeting nei zui nghalin,  MZP president B Vanlaltana  kaihhruai meeting hian Citizenship Amendment Act, 2019 chungchang leh  ILP check chungchang bakah pawl chhung thil hrang hrang te an rel.

 Citizenship Amendment Act 2019 chungchang a MZP hmalak tawhna chu tha tiin, Supreme Court Hearing neih a nih zawhah hmalak chhunzawm leh an rawt. Hei bakah hian Mizoram pum huap ILP check runpui neih tha a ti a. Mizoram chhungah ILP System tha zawk hman anih theih nan chak zawka hma la turin meeting chuan Sorkar a ngen bawk.

MZP chuan Bungtlang 'S' tlangval A. Lalrawnliana rawng taka thah a ni chu a dem takzet a. MZP hruaitute chu A. Lalrawnliana chenna hmuna ral tur leh a thihna hmun tlawh tura kal an rel. Thil tisualtute hi an phu anga hrem ngei MZP chuan a phut takzet a, Mizoram sorkar pawhin a mite thlavang hauha mit aiah mit tih hreh lo leh hnam dangin min zuam ta lutuk khap dai tura hma la turin MZP chuan thuneitute an ngen nghal bawk.