Aizawl | January 9, 2019: Mizoram Sawrkarin India ram hmun dang zir chianga thiamna pawchhuak tura a tirh MJA memberte chuan vawiin khan Bangalore khawpui tuichhe paihna leh an hman tangkai dan an zir chiang.
MJA member 9 leh anmahni hruaitu I&PR Officer 2 te hi Bangalore Water Supply and Sewarage Board (BWSSB) Executive Engineer Rahul Priya Darshini in a kaihruai a, Bangalore khawpuia chhungkaw tin tui thli an lakkhawm dan leh an tih thianghlim dan sawifiahin heng tui an tih thianghlim te hi Khawpui chhunga Park leh hmun hrang hranga thlai chawm nan an hman bakah lirthei, thlawhtheihna leh thil dang sil nan an hman leh dan an en ho a ni.
Er. Rahul sawi danin heng chhungkaw tin thli an tih thianghlim a, an hman leh hian Bangalore a mipui Nuai 4 chuang zet tui thianghlim intur an hum theih phah tih a sawi a, tui bawlhhlawh tih thianghlim nan hian litre 1000 zelah cheng 10 chauh an insengso tih sawiin nitin tui litre maktaduai 4 hman theih turin an siam chhuak thin a ni. He khawpui thli lakkhawmna ah hian Bangalore a chhungkaw tin ten Sewarage Board pipe zamsa an zawm ngei ngei a ngaih bakah thla tin pawisa an chawi bawk a, hei hian khawpui thli tih thianghlimna a senso a phuhru thei nghal bawk ani. Mizoramah pawh ruahmanna fel zawk nen awlsam taka hetiang hmalakna hi siam theih nia an hriat thu MJA team te hian an sawi.
-
Post a Comment
He post chungchanga i ngaihdan lo sawi ve rawh: