Mizo Tlangval Lalrawnliana a bo hnuah thi a hmuh a ni

Aizawl | January 14, 2020: Ni li zet zawn a nih hnua January 11 chawhnu lama Nghalimlui leh Vaseikai khaw inkarah Bungtlang S tlangval A Lalrawnliana chu thia a ruang hmuh a ni.

He thihna hian Khawtlang, nula tlangval a nghawng a, Mizo rilru a tina em em a, khawtlangin hma an la hial reng a ni.

Tlangval A Lalrawnliana S/o Upa A Lalhmuaka Bungtlang South- II  vanduaina tawh dan chungchangah hian a hmuna kal te, Bungtlang(s) Khawtlang Hruaitute hnen atanga ka hriat dan hi kan han sawi ang e.

January 3, 2020 khan Nghalimlui khuaah W. Muana hriatrengna Lungphun chhimin, a kal ve a. Bru dan-ah Chuan Zanah Lung hi an phun nghal thin a ni awm a, January 3, 2020 Zanah Lungphun programme chu kalpui nghal a ni a. Tv. Lalrawnliana pawh hi Lungphun programme zaikhawmnaah chuan awm ve rengin, zing Dar 1:00Am velah  Zaikhawmna in kawta mei an chhem chu ai lum turin a chhuak a, reiloteah Lungphuna a kalpui Chondro(W. Muana nau) nen Chuan Vaseikaiah an kal dun ni awm tak a ni a. Vaseikai atanga an haw lamah  Accident hi a tawk nia ngaih a ni. Chuta aṭang chuan chin hriat lovin a bo ta a.

A chhungte, Nghalimlui YLA leh Vaseikai Chakma Association in January 7, 2020 atangin an phak ang tawka an zawn hnuah engmah thuthar a awm tak loh avangin January 10, 2020 khan YLA Sub.Headquarters, Bungtlang(s) Hruaitu te leh Bungtlang (S)-II YLA member tha hnem tak ruang zawngin an thawk chhuak a.

Hetia beihpui an thlak hnu hian January 11, 2020 Chawhnu lam khan Nghalimlui leh Vaseikai Khaw inkar, Airtel Tower thlang lawk Nghalimluite kamah rairuang leh hnachhawl vel a a ruang an khuh chu hmuh chhuah a ni.

A ruang hi a rei tawh avangin a rim tlem a nam tawh nghe nghe a. Bungtlang(s) Khawtlang hruaitu leh a hmutute chuan A Lalrawnliana hi mi kut  tuar ngei nia an hriatthu an sawi.

Nghalimlui khaw bul maia hmuh ni si, pawi khawihtu hriat ni hauh lo chu an rilru ana hle a. A ruang hi January 11, 2020 zan dar 10:00pm velah Bungtlang(s) thlenpui a ni a, PHC Bungtlang(s) lamin èng an neih that loh avangin a tukzinga Postmortem turin Doctor leh Khawtlang Hruaitu te chuan thu an titlua, Chumi zan chuan tlaivarpui a ni ta a ni. 

January 12, 2020 Zing dar 6:00am velah PHC Bungtlang(s)-ah Postmortem a ni a. Rawna hi a ring a tliaka, a bekah   na taka vuak a nih bakah a taksa hliam tenau a awm nual bawk a ni.

Postmortem result-ah chiang taka mi kut tuara thi a ni tih hriat a nihin khawtlang kan rilru a naa, Khaw bul maia a ruang hmuh ni si, tuma'n a titu an hrelo tlat te chuan ngaihtuah a tithuiin, Ngaihsaktu nei lo, a ruang pawh ramdaia hun rei tak chhawla khuhboa a awm chuan amah hmangaihtu Bungtlang (s) khua leh Tui te rilru a tihnatzia hi sawifiah rual a ni lo.

A chhungte'n Vaseikai Police Station-ah Thubuai a bo tih an hriat tirhin an ziak lut a, khawtlang hruaitute pawhin thuneitute hma la chak deuh turin an nawr reng bawk. 

Beisei ang thuthar erawh a awm mai thei si lo, chak taka hnuchhui hna thawh a nih theih nan te, Pawi khawihtu te'n an phu tawk hremna an hmuha, Rawng taka sawisak hlum Tlangval Lalrawnliana hian rorelna dik a hmuh theih nan amah hmangaihtu Bungtlang (S) te chuan hetiang thil rapthlak hi a thlen leh tawh loh nan, loh  theih lova chet chhuah ngai niin an hre ta a, Kawng an zawh ta a ni.

- Mafela Lyno