KAN RADIO KHA

KAN RADIO KHA

Kan Philips Radio kha ka tan chuan ka ṭhian ṭha tak a ni ṭhin. A bik takin Lunglei Radio Station bik kha ka ngaithla kham ngai lo. Zing dar 6.00am aṭangin hun an rawn hmang ṭan a,zing dar 7.30am ah chanchinthar an chhiar ṭhin. An announcer te ho âw nalh ṭhin zia te kha aw,lengzem hla thlan puang ṭhintu ngat phei kha chu a âw aṭang ringawt pawh khan star na tham a tling a ni.

Zan lamah nise lehkha zir  ṭhulh ṭhak khawpin hla thlan ka ngaithla ṭhin. Zawhna leh chhanna hunte kha ngaihthlak a van nuam ṭhin thei tak em. Ka lehkha zir dawhkanah te hian Radio nen ka in chhawp rup zel ṭhin nia.

Zing karah an programme hman dan tur an lo sawi lawk tawh chu ka chhinchhiah thlap ṭhin a. Zaithiam ka duh deuh deuh zai hun tur leh hla thlan hunah chuan lehkha ka zir tawp hmak zel. Kar tawpah Top 10 Countdown tiin kar 1 chhunga hla thlan tam 10 te an rawn tih chhuah hun tur te kha ka nghak ve ran ṭhin.

Tunlai zaithiam tam tak chhim lam mi hi chu Lunglei Radio Station aṭanga ka hriatte an ni hlawm. Pensy B. Lalthangliani te,Bethsy Lalrinsangi te, Vanlalfela te, Christy Lalramdini te,C.R Laldingliani te, Esther Lalhmunruati te, C. Lalzarmawia te ho hi chu Lunglei Radio Station aṭanga ka hriatte an ni hlawm. An hla sak leh a phuahtu te,an veng hming thlengin ka chhinchhiah thlap ṭhin.

•• Website a Fakna lo lang i click apiang khan Explore Mizoram kal zelna atan tha i thawh ve a ni. ••

Khang hun lai khan TV kan la neih ve loh avangin,chanchinthar leh Zaithiamte chanchin ka hriat theih na awmchhun chu kan Radio kha a ni mai a. Ngaihthlak pawh ka ngaithla ngun tluk tluk ṭhin khawp mai,Battery hmang a nih avangin a battery te kha a lo down ve ṭhin a. A battery a down hi chuan keimah chawp hian ka down vek zel.

Kha Radio khan tun thleng hian ka lung min len ṭhin. Aizawl Radio Station a news chhiartu te kha an la dam a ngem le?C.Chawngthantluanga te,Lalremsangi Ralte te kha, midang chu ka hre hlawm tawh lem lo. Chuan,Lunglei Radio Station a an announcer âw mawi deuh deuh ho te kha an la dam a ngem le?An hming erawh ka hre mumal tawh hlawm si lo. Tunah chuan kha kan Radio kha khawnge awm pawh ka hre tawh lo.

June 11, 2018

KAN RADIO BAWK KHA

Nizan chu kan Philips Radio kha ka hmu chhuak hlawl mai a,ka hlim takzet a ni. A hmaa kan dahna ṭhin fairel bel chung bangrelah chuan ka hung leh rân mai a. Ṭum danga ka tih ṭhin dan ang bawkin Lunglei Radio station chu ka ngaithla leh ta a. Lengzem hla thlan hun a lo ni a,"Kan Radio hi a chhe vek tawh emaw ka tia,a lo la ṭha anih hi,"ka ti a,ka nui vur vur a ka hlim takzet a ni. Ka rilruah a hmaa ka thuziah *KAN RADIO KHA* tih te kha a lo lang a,keimahin ka nui ver ver a,"Naktuk chu kan Radio ka hmuh chhuah leh thu hi ka ziak leh chiang khawp ang,"tiin thutlukna ka siam ta a.

Tichuan,zing a lo ni a kan Radio chu ka zawng ruai a;mahse,Radio chu ka hmu miah lo. Kan Radio ka hmu chhuah kha ka zan tawn mang mai a lo ni si. Kan Radio kha ka ngai a ni,ka damloh lai pawn kha Radio kha ka pawm a,ka ngaithla ṭhin. Tunah erawh tawnmang ramah bak ka hmu thei tawh si lo.

15th June, Zirtawp Ni 2018

9:18 A.M

KAN RADIO BAWK KHA AW

Kum 2020 a rawn her chhuah meuh chuan mitin maiin Smart Phone kan hum far hlawm tawh mai. Chhungkaw tin in Television kan nei deuh fur tawh bawk a, Television nei lo chhungkua chu an vâng pharh tawh mai. Changkanna chu a tlan mai pawh ni lo, a zuan in a zuang a ni deuh ber mai.

Kum 2018 a kan Radio a bo emaw ka tihkha, kum in 2020 January thla tir lam khan ka hmu leh ta. Ka van hlim tak êm! Rei tak chhung ka hmu tawh lova, a awmna chin pawh ka hre tawh lo a nihkha. Mahse, kan Philips Radio khan min ngâi ve ngang a ni ngei ang. Rei tak a bibo thei bik hauh lo mai, a on/off na te chu a lo chhe ve rum tawh mai a. Mahse, a sound erawh a la ṭha viau thung. 

Hun liam tawh te ka chhui let a, kha Radio vanga lehkha zir ka ṭhulh nasat zia te kha aw! Khang hunlai kha chuan ka ṭhian ṭha ber a ni miau si a le. Ka dam loh nikhua te khan ka pawm veng veng a, ka thla a timuang ve em em mai ṭhin. Mahse, khang te kha tunah chuan nunhlui an chang zo ta si. Kauh kir theih an chang tawh si lo, lunglêng khawhar châng erawh chuan,'Kan Radio kha aw,'ka ti ve leh vawng vawng ṭhin. 

Kum 2018 a ka thuziak ka hai let a, ka rawt edit nual a. Tin, a tawp lam erawh zanin tlaia ka ziah a ni, a la lum vung vung a nia.

- Rs Thangluah✍🏼

January 26, 2020 06:44P.M

•• Post hi link nen i lo share ve zel dawn nia. ••