HRINGNUN: Thlanmual leh ruang chungchang

- PC Nghaklianmawia

28.01.2020

Mihring hi kan pian man nge tam ang kan thih man zawk le? Nu in nau neih dan pangngai (normal delivery) a nau a hrin chuan senso hi a tam vak lo. Nau awl deuh phei chuan an hring zung zung emaw tih tur a ni. Kan thih ni ve thung erawh chuan khawtlang an buai mup mup mai a, kan ruang dahna turin kan in pindan bang an thiat sawk sawk a, thalai ten mitthi buhfai an khawn nghal zung zung a, hâr mei khuk meuhin eirawng bawl a ngai zui a. Ruang lakna hla deuh a nih phei chuan insen so vak a awl. Vairam atangin miruang kan thawn ve ta zauh zauh a, senso a hautak duh hle. Nepal rama kan awm lai khan mitthi kha phum aiin hâl a remchan zawk avangin mitthi pakhat hâl nan khan cheng singhnih vel a ngai a. Inphum erawh chuan senso a tlem deuh a, a phumna tur ram lei a ngaih erawh chuan senso a sang leh daih thei bawk. Kan sawi tum tak chu mihring kan pung zel a, mihring kan pun chuan mitthi pawh kan pung dawn tih a chiang a, ram a pung ve silo laiah hian thlanmual hian ram a eihek zau tial tial dawn tih hi thil chiang sa a ni. Hei hi nakinah harsatna a la ni thei. Aizawl khawchhunga thlanmual lian deuh chu hnawk kan ti tan riau tawh. Hei hi Mizoram chauh a ni lo, khawvel ram khawpui hrang hrang hian an buaipui. A bikin khawpui (city) ah an buaipui nasa zual.

Italy ram Modena khuaa an ruang dahna in (building)- San Cataldo Cemetry an tih. A  pawnlam landan.

Khawvelah hian kumtin mi maktaduai 55 vel thi ziah anga chhut a ni a, chu chu khawvel mihring pumpui zaa 0.8% vel a ni. Inphum ta vek ila, chug mite phumna hmun tur chuan ram a awh zau duh hle ang. Khawvel khawpui lian apiangin hei hi an buaipui a. Thlanmual chhunga in sak ngawt thu awm hek suh. Mawi tak takin kan thlanlung te kan phuna kan cheimawi mek lai hian mihringte hi heng thlan lungte hian min nek chhuak mêk a ni. Hetiang lam chhuitu pakhat Dr. Julie Rugg, University of York’s Cemetery Research Group. London ami chuan, "Kan thlamualte hi han khaikhup ila, a letling zawngin han dah ina, khawpui ropui tak ang maiin a khir eih uaih mai a ni" a ti. He harsatna hi chinfel dan an ngaihtuah \hin a. Thlan pakhat ruang inphum thuah hi tunah chuan kan ching ta hle a, hmuh heh lo zawnga tihdan pakhat a ni. Sngapore, Germany leh Belgium ah te chuan sawrkar in vantlang thlanmual te chu a thlawna inphum theihin an siam a, hei hi inphum thuah a nih theih nana tih a ni. Mimal ta bik a nih chuan inphum thuah a rem lo thin a. Europe ramah pawh he thil hi an kalpui nasa viau tawh a. Durban, Sidney leh London ah te chuan an hnamzia nena inmil lo nia ngaiin dodaltu an tam hle. Dr Julie bawk hian "London ah chuan miten an hrehtiam lo hle a, inphum nan ram acre 100 laia zau kan nei a, kan pipu te atangin inphum thuah hi kan ti ngai lo tia dodal pawl an tam a, mahse kan ram neihte hi kan hmang thiam si lo. Kohhran erawh chuan hemi harsatna hi hriain hma a la tan a, kum 75-a upa thlan ah te chuan inphum thuah hi an ti tawh a, mahse hei hi a chinfelna tur a la ni chuang lo, tun atanga kum 20-30 ah chuan London thlanmual hi a la khat vek dawn a ni" a ti.

Italy ram Modena khuaa an ruang dahna in (building)- San Cataldo Cemetry an tih. A chhunglam landan.

Hetiang hi a nih avangin mitthi ruang sawngbawla sumdawnna hi sumdawnna lian a ni chho mek a. Hmun heh lo leh hek si lova ruang sawngbawl duhna a lian chho tial tial a. Dr John Troyer-a University of Bath’s Centre for Death and Society chuan, "Mi ruang sawngbawla eizawnna hi eizawnna lian tak a ni chho mek" a ti. Mi tam takin an thih huna inphum nan ram an leilawk thin a, a lei hma leh ram a la tlawm a, an lei har leh ram a to zel a. Chuvangin inphum hi ram changkangah chuan economic zawng tak pawhin nghawng lian tak nei tham a ni chho ta. Hong Kong ah chuan kum 1980 chho vel atang khan mual pawng pakhat hi thlanmual atan sawrkar in a buatsaih tawp a, chuta ruang pakhat phumna ram chu miin a mimal tana a lei duh chuan dollar 30,000 in mi pakhat phumna a lei theih a. Hetianga an lei chuan anmahni ta a nih avangin thlanlung chei leh humhalh a thiang a, chutiang ni lova, a ram lei lova an inphum ringawt chuan thlanlung sia a rem lova, an phumna hmun ngaiah vek khan midang pawh a phum theih a ni. London ah pawh hetiang bawk hian an kalpui a, mi pakhat phumna atan pound 4,500 sen a ngai a. Mi rethei leh harsa tan chuan thih man a to duh alh alh hle. Ram a to si a, ruang sawngbawl a hautak si a, ruang phumtu undertaker engkim rawih vek angai a, retheite tan chuan senso hautak a tling. Hetiang hi a nih thin avangin Jessica Mitford chuan kum 1963 daih tawh khan 'The American Way of Death' tih lehkhabu ziakin chutah chuan ruang sawngbawlna senso sang chho chak lutuk chu a lo sawisel tawh a ni.

Ram tam tak chuan ruang hi leiah phum kher tawh lovin a dahthatna cement in an sa a. Chutah chuan an vâp emaw, an ruang emaw kha an dah a, a pawnah mitthi hming belna an siam a. Mumbaia kan chenna bul lawka Sewri thlanmualah pawh hian chutianga ruang dahan cement-a sak chu a awm a. A duh tan chuan an hauhlawk theih nghe nghe!! Hetiang hian hmun a heh lo va, building pakhatah ruang tam tak a phum theih dawn a ni.

Mizoramah pawh hian mitthi ruang kan sawngbawl dan leh kan inphum dan hi nakinah chuan harsatna la tling thei a ni ve a. Ram a thang si lova mihring kan pung zel ang a, ram leh hmun hian min la daih loh hun a la awm ang. Chuvangin ram changkang zawkte pawhin an tih ang hian ruang dahna in hran te hi sa ve ta ila (veng thenkhat chuan an siam tawh niawmin ka hria); ruang phum thuah hi hreh lo bawk ila, hei hi tunah chuan chhungkaw thenkhat chuan an ti tan mek tawh bawk a. Mitthi te pawh hi phum kher lovin hâl ral emaw electric ah ruang tihral dan te hi ngaihtuah ve tawh ila nakina kan buai lutuk loh nan. Pathian thu atanga kan thlir pawhin mitthi tawh, thlarau chhuahsan tawh hi chu Isua pawh khan a ngai thupui vak lo aniang, "mitthi chu anmahni mitthi in vui rawh se" (Matt 8.22) a ti mai kha a nia. Damlai ang maia kan la insawngbawl thin hi chu tlem tlema kan insiamrem hret hret a tha awm mang e.

[ A ziaktu biak theihna tur kan mamawh. +919402125273 ]