Aizawl | Jan 28, 2020: Mizoram Health minister Dr R Lalthangliana chuan tukin khan Zemabawk Cancer Hospital tlawhin Tertiary Care Cancer Centre sak mek a en a, pawisa fai leh kawlphetha khaihlak changa hman tur Generator a hlan.
Health Minister hian Cancer Hospital-in a tul anga an hman atan Rs. 10,000/- (singkhat) a hlan a. Hei bakah hian kawlphetha khaihlak avanga Cancer hemna khawlin harsatna a tawh thin sutkian nan an chhungkaw hmingin MAHINDRA POWEROL GENERATOR lian a pe bawk a, Cancer Hospital thawktute pawh Health Minister chungah hian an lawm hle.
Health Minister hian Tertiary Care Cancer Centre sak lai mek a hmunah a enfiah a. Cancer Hospitala thawktuten lo dawngsawngin hmalakna kal lai mekte ngun leh uluk taka thlirho a ni. Health Minister chuan Cancer Speciality Hospital neihna tura Japan International Cooperation Agency (JICA), Japan nena crore 500 lai hmanga thawhhona an hmuh tur atanga theihtawp chhuah a nih tur thu a sawi.
Tin, Cancer Hospital ram pawh amah lo tawiawmtu Local Council leh khawtlang hruaitute hriatpuina in a en zui nghal a. A rang lama ramri tih fel a nih theih nana hmalak dan tur te an sawiho nghal bawk.
Minister hian Central Medical Store pawh tlawh nghalin CMS hi a awmna hi hmunhma remchang zawka sawn chhuah emaw, approach road tha zawk siam dan turte sawiho nghal a ni.
Minister chuan Mizoramin Cancer Hospital changtlung leh tha zawk a neih theihna tura theihtawp chhuaha tan lak mek a nih thute, sum leh pai lama harsatna awmte pawh sukiang tura sawrkar lam pawhin nasa taka tan a lak thu a sawi.
Dr Thangte chuan, "Damlo leh thawktute harsatna hrang hrang sukiang turin Sorkar chuan theihtawp a chhuah ang," tiin Cancer Hospital a tlawh chungchang instagram-ah post-in a sawi.
Health Minister Dr. R.Lalthangliana hi HFW secretary H Lalengmawia IAS
MSCI director Dr Zoramthanga, NHM director Dr Eric Zomawia, TCCC Project Coordinator Dr Jeremy L Pautu leh party mi pawimawh dang ten an tawiawm.
Post a Comment
He post chungchanga i ngaihdan lo sawi ve rawh: