"BJP chu, 'kan sem ang,' tia sem leh lo party kan ni lo," - Vanlalhmuaka

'Mizoram-ah a mamawhtute tana hmasawnna thlen hi BJP thiltum a ni'

BJP Mizoram President Vanlalhmuaka | Pic - BJP Media Cell

Aizawl | January 16, 2020: BJP Mizoram State office kum thar atana hawnna leh inhlan tharna hun vawiin khan BJP Mizoram State office Atal Bhavanah neiin, BJP Mizoram State president thar Vanlalhmuaka chuan, thu sawi tawh tihlawhtling thin party an nih thu sawiin, "BJP chu, 'kan sem ang,' tia sem leh lo party kan ni lo," a ti.

Vanlalhmuaka chuan, CAB tuna CAA ni ta chungchangah pawh BJP in inthlan manifesto a an dah ang ngeiin an tihlawhtling niin a sawi a. Pass ngei a nih dawn vanga Mizoram huam lo tura ngentu pawh Mizoram BJP ngei an nih thu a sawi bawk.

BJP Office sak mek leh a hmun nen Lunglei, Champhai leh Chawngte-ah te nei tawhin, kumin hian District headquarter dangah pawh office neih ngei an tum thu a sawi a. 

BJP president Vanlalhmuaka chuan sawi chhunzawmin, "Mizoram-ah a mamawhtute tana hmasawnna thlen hi BJP thil tum a ni," a ti a. Tuna BJP member ni mek mi 70,000 te chu kumin chhung hian member pakhat theuh senglut tura hma la turin a chah a, nakkum-ah pawh kumin a member ni tawh zawngin pakhat theuh hruailut zelin, chutianga an kal chuan 2023 ah chuan sawrkarna an chang ngei dawn niin a sawi a. BJP beitute hian BIP chhungkua an tichhe lova, an tipumkhat zawk a ni a ti.