Aizawl Civil Hospital Blood Bank in thisen an dawn tam ber kum-ah thisen unit singkhat chuang dawng; Thisen mamawhna phuhruk zo lo

Aizawl | January 8, 2020: Aizawl Civil Hospital Blood Bank in thisen an dawn hnem/tam ber tum tawngin nikkum 2019 chhung khan thisen unit 15,694 an dawng niin Aizawl Civil Hospital Model Blood Bank head of department Dr K Rothangpuia chuan EXPLOREMIZORAM.COM a hrilh. Thisen petute hi Hmeichhia 2,741 niin, Mipa 12,953 an ni.

Aizawl Civil Hospital Model Blood Bank head of department Dr K Rothangpuia chuan, 2019 kha Aizawl Civil Hospital Model Blood Bank in thisen an dawn tam ber kum a  nih thu sawiin, kum dangah hetianga tam an dawn ngai loh thu a sawi a. Mi nunna chhan nana thisen pe thinte chungah lawmthu a sawi bawk.

Kum tina Aizawl Civil Hospital Model Blood Bank  in thisen an dawn dan record a lan dan chuan 2011 khan unit 9753, kum 2012 khan unit 9538, kum 2013 ah unit 9768, kum 2014 ah 10,669, kum 2015 ah 12,686, kum 2016 ah unit 13,605, kum 2017 ah unit 13,280 leh kum 2018 ah unit 13,902 te an dawng a ni.

Zawhnna chhangin Aizawl Civil Hospital Model Blood Bank head of department Dr K Rothangpuia chuan, Thisen an dawn zingah hian Voluntary chu unit 14293 niin, heng zinga 11,765 niin 2528 hi hmeichhia an nih thu EXPLOREMIZORAM.COM a hrilh.

Thisen an dawn zawng zawng unit 15,694 a nih laiin Voluntary a dawn zawng zawng hi unit 14,293 a ni a, Replacement (dam lo chhung leh hmelhriat ten dam lo an pek thin) hi  thisen unit 1401 a ni thung.

Private Hospital a inenkawlte atangin Thisen unit khatah processing fee cheng 550 an la a, Blood Bank in a sen ral erawh unit khatah cheng sangkhat vel a nih thu Aizawl Civil Hospital Model Blood Bank head of department Dr K Rothangpuia a sawi bawk.

November 2019 khan thisen unit 1223 an pechhuakin, Thisen an dawn hi unit 855an dawng a. November thla chhung hian Nitin thisen unit 40 vel pechhuak reng ang an ni a, nitin unit 28 vel dawng reng an an ni bawk. 2019 chhung hian ni tin thisen unit 60 vel zel pechhuak ang an ni thung.

Thisen unit 15,694 an dawn hian ni tin unit 42 vel dawng reng ang an ni a, ni tina an mamawh a phuhruk pha lo niin Blood Bank thawktu pakhat chuan a sawi a. Hunpui Krismas leh Kumthar vuakvetah thisen pe an tlem thu sawiin, thisen mamawh erawh an tam thung si a, Thisen pe thei tur thahnem ngai an sawm tawp thu a sawi bawk. December 2019 khan 2019 chhunga thisen an dawn tlem ber tum tawngin unit 690 an dawng.

Pawl anga thisen pe hi kumin ah an la dawn loh thu sawiin, a hmasa ber atan January 14 vel khian a awm dawn niin thu an dawn thu Exploremizoram.com a hrilh bawk.

_________________

TT Arts, Chanmari Aizawl-ah T Shirt print hrang hrang an ti thei.

Call/ WhatsApp +919615332721

(A hnuaia fakna hi lo hmet ve rawh.)