Aizawl | December 5, 2019: Vawiin hi World Soil Day a ni a. Agriculture Department(Crop Husbandry) buatsaihin Directorate of Agriculture Conference Hall ah Pu Lalhmingthanga IAS, Commissioner & Secretary, Agriculture Department hovin World Soil Day hi hman a ni a, Farmers Workshop neih nghal a ni bawk.
World Soil Day hi kum 2014 atang khan kum tin December ni 5 ah thupui hrang hrang neia hman thin a ni a. Kumin World Soil Day thupui chu “Stop Soil Eriosion, Save Our Future” tih a ni a. Food and Agriculture Organisation(FAO) chut danin second 5 tin hian football field pakhat tiat vel hi lei chunglang hanna luang ral reng ang a ni a. Hei hian a nghawng chu thlai thar chhuah a tlak hniam phah nasa em em a. Hetiang zela lei chunglang hanna hi a luan ral zel chuan reilo te ah buh leh thlai kham khawp leh hrisel tha thar chhuah tur nei lovin khawvel hian tampui kan hmabak thei mai dawn a ni.
Lei chunglang hanna luangral zel hi khawvel pumpuia loneitute tan leh, a bikin tlangram loneitute tan a pawi em em a. Pu Lalhmingthanga chuan hemi titawp tura theihtawp chhuah a tul thu sawiin kal khawmte chu hemi kawngah thahnem ngai taka hma la turin a chah a ni.
Vawiina World Soil Day hmanna hi Agriculture Director, Pu Rohmingthanga Colney-in a kaihruai a. Aizawl pawn lam atangin Soil Health Card Scheme hnuaia District tina Model village te aiawhin loneitu 2 theuh an tel a. Chawhnu hunah Farmers Workshop neih chhunzawmin Pi H.Zodinpuii, Asst.Soil Chemist chuan lei endik tura lak dan leh lei enkawl dan te, Soil Health Card pawimawhna chungchangah te zirtirna a pe a. Loneitute chu Soil Testing Laboratory te enpui an ni bawk.
Post a Comment
He post chungchanga i ngaihdan lo sawi ve rawh: