SIKPUI BEHBAWM

- ✍🏻 David Lalromawia Hrahsel

Kumpui linglet a kan nghah mitin ta tur chanchin ṭha lawmawm em em min thlen tu Lal Isua Krista piancham Krismas kan lo hmang zo leh ta der mai. Chhungkaw tin ten kan nghakhlel a, chhungkim tak leh lungrual taka a thlum a al ei za in, he hun pui hi kan hmang ṭhin a.Hei lo liama damlai chen na tur bak hi a awm dawn bik em ni le? Mitinin kan theih ang tawk leh kan tlin tawkin Lal lo piang chibai buk nan, kan intuaithar ṭhin a, midang te tan a he krismas hi luanchhuahna hun atan te, mi inphal te leh mi inpe tak tak te avangin he hunpui hi kan hmang ṭhin.




Mahni chauh in ngaihtuah lova, mahni aia midang mamawh zawk te ṭanpuina hun leh am taka krismas hmang mai lova, midangte tana inpe te avangin he Krismas hi a hlawhtling ṭhin mai a lo ni. Krismas in a ken tel anga kan ngaih tlat tawh chu masi kawr mawi te, thuamhnaw thar te, chakkhai leh eng ilo, lei nan he
hun hi kan hmang ṭhin a, Masi hnaih lai a bazar a i kal anihchuan, krismas avanga mipui punkhawm tam zia i hmu ang, Ni e, he hunpui hi kan nghahhlelh em em nachhan chu, Lal lo piang chibai buk nan a inbuatsaih kan ni tih hrelo tam tak an awm nawk anga, krismas boruak nawm tih vang hrim hrim leh krismas awm chhan pawh ngaihtuah thleng lova masi boruak, a lanna tlang dang daih ngaihtuahna rilru pu kan tam niin a lang.

Sikpui a inher a, boruak a thiang sawt a, ni a tawi sawt a, thlasik khawthiang tak hi a nuam in boruak a zangkhai a, hunpui inher chho tan tur nen mitin kan phur in, krismas lo thleng tur atan kan rilru in Bethlehem lam a hawi hma pauh leh krismas a nuam mai ṭhin. Han hawi vel ila, tlang tin ah bawngpu par leh tlangsam ten an par mawina an chhuah a, thlasik khawvawt tak hmachhawn turin chungleng sava te pemkhawm turin an chiar nghing ngheng a, thlasik kawleng tak chu en nawm thlir in kan thlir ṭhin.Ni a lo sang deuh deuh a, siamtu duan mawi tak ni chu hringmi te tan lumna pe chhuak in, thlasik nilum ngei mai chu chhungtin tan lumna muanawm tak leh nuam takin chu thlasik nilum chu kan ai ṭhin.

Nipui lai erawh zawngin a lum zia hahipin kan sawi a, sikpui ah erawh zawng kan kianga chhun reng tur atan kan va iai lo em. Thlasik boruak hi zawng hringnun damchhung tawite ah hian a boruak hi a reilo lehzual a, zan rei zawng erawh a rei in meilum nen thuamhnaw lum nen thlasik khawvawt kan hmang ṭhin a, chhungtin in he hunpui hi kan urlawk ṭhin a nih hi.Nipui lai chuan zan lamah meilum ai chi ni heklo, mitinin khaw lum kan ning a, thlasik khawvawt ngaih a zual letling zawk. Sikpui lai erawh chuan tapchhak ah leh ṭhutkhawmna pindan ah chhungtin in meilum aiin kan titi tlang thei a, khawvawt tak chu meilum nen kan hmachhawn a, he sikpui hi zawng a vawh avangin meilum aiin, inkawmhona a hring a, kan chenna apiangah lungrual takin kan awm khawm thei ṭhin.

Krismas kawrmawi lei na pawh nei zo lo, khawsak harsa tak, mahni ei khawp hmu zo tawk tawk hi engzah tak awm ang maw? Heng mi kan sawi te aia chan chhia, krismas hi thleng lo se, kan nghakhlel satliah ve tawp a, khawilam atangin nge mi ṭanpuina tur lo thleng ang? tihna rilru pu hi an awm ṭeuh ang le.Heng mi te tan hian krismas lo thleng hi nghahhlelhna aiin sikpui boruak hi thleng lo law law ila, tihian mahni khawsak rel chawpin kan ei tur kan thawhchhuah theih chuan lawm ang u, ti a krismas nghakhlel aia huphurh taka nghak hi kan chhehvel ah hian engzah tak awm ang maw? Heng kan chhehvel a mi te tan hian kum tin a tih ṭhan a, lo nei tawh pawl hrang hrang te, midang te tana luangchhuak ṭhin te hian kum tin krismas thilpek pek hi an tih turah an ngai tawp a, heng mi inpe te avang hian krismas huphurhawm taka nghak ṭhin te chuan krismas chu hnung lama sa barh ang maiin, lawmna mittui nen an hmang ṭhin a.

Mi inpe te hi awm lo ta se, khawi lam aṭangin nge mi ṭanpuina tur lo thleng ang? tiin krismas khawhar tak an hmang ngei awm thin si a. An tan Samari mi ṭha midang te tana inpe te avang hian an thinlung khawhar tak kan hnem a, an biangah lawmna mittui a luang a, sawi tur pawh hrelovin malsawmtu Lalpa hming lamin Lalpa'n malsawm che rawh se, tih zawng hi an sawi theih chu a ni! Mahse a va lawmawm si em, midang te ṭanpui thei turin Lalpa'n min pui a, kan thawh theih nan Lalpan damna min pe a, kan dam man ringawt te, hi a hausak ren rual loh Lalpa vang a va ni em! Sumin a lei theih loh kan hriselna te hi man tam tak a ni asin. Mi tanpui theihna tura hriselna min petu hian a let tam taka mal min sawm ngei ka ring a ni. Hawh u, he sikpui hunpui  hi midang te keini aia mamawh zawk te tan luanchhuahna hunpui,  ṭanpui ngaite ṭanpuina hun leh masi hlimawm tak zawngchhang tlak tak hmang turin i inbuatsaih ṭhin ang u. Mahni chauh in ngaihtuah lovin, midang te tan inpe in he hunpui hi am ten hmang ṭhin ila, naupiang chibai kan buk na tur ṭha tak leh hlawk thlak tak a va ni leh zual dawn em.

Post a Comment

1 Comments

He post chungchanga i ngaihdan lo sawi ve rawh: