CAB/CAA AIAH ANȚAM TÊL KHAT

- James Ramdinmawia

CAB/CAA vangin a ram pumin kan buai luih luih a. Chutih lai chuan Zàmzo Real Estate Office lamin-a kan thil tawn ve thung hi chu thil dang daih a ni.

Hman nî deuh khan Serkhan naupang (hmeichhe naupang) pakhatin serțawk a rawn zuar a. Kan Managing Director, Pu Valtea nen serțawk eichâk vàng em em pawh ni lovin chu naupangtê-in a Krismas kawr tur a tuakna a nih vang zawk chuan kan lo dawr ve ve a.

Tlaiah ka chhuah hlànin chu naupang bawk chu a nau (a cousin, mipa naupang) nen an lo kal leh a. Hemi țum hi chuan bahkhawr an rawn keng tawh thung. Tichuan kan Managing Director, Pu Valtea aka Pc. Lalramengmawia chuan lo dawrin an Krismas kawr leina tur pawisa a lo pe ve ve a. An lawm thiam hle.

Vawiin tlai khan he naupang pahnihte hi kan Office-ah bawk an rawn kal leh a. Thlalâka kan hmuh ang hian kawngkapui ațanga hnaivai ber țhutthlengah anțam têl khat an rawn dah a, "Kha, chawhmeh kan pe che u," tih pahin chhuah leh nghal an tum a. "Eng nge a awmzia?" tiin kan lo zawt hê hâw a. Anni chuan, "Kan pe che u," tih pahin chhuah an rùal nghal a. "A nih chuan lo ding lawk teh u," kan ti chiah a, an tlan ta nal nal mai. Pu Valtea'n a han umzui a, mahse an tlàn thùi hman êm avangin a kokir zo ta lo.

Naupang rilru thianghlim tak an ni. Anmahni duhsaktute an phak ang tâwka hlu thilpek an pe let ve ngat a ni. He anțam têl khat hi Zàmzo Real Estate-in thilpek a dawn tawh zawng zawngah a la hlu ber hial àwm e. 

Krismas thawmhnaw thar, i duh ang tâwka changkang leh nalh i lei thei lo a ni mai thei, chumi avang chuan i lungngai em ni? A nih loh leh Krismas dawnah i duh angin i 'money' tâwk lo a, i vui em ni? He naupangte hi chuan an phâk tâwkin sum an tuak a, hlim takin midangte hnenah thilpêk an pe asin. Anțam têl khat hi hralh ta zawk se, anni tân chuan a hlu hle dawn si a. 

Ka mittui an tihnâm sawk mai. An lakah hian zir tur ka va ngah tak êm! Krismas leh Kumthar pawh hlim takin an hmang ngei ang, chutiang tur pawh chuan Zàmzo Real Estate-in duhsakna kan hlan e.

_________________

TT Arts, Chanmari Aizawl-ah T Shirt print hrang hrang an ti thei a, Explore Mizoram T Shirt pawh cheng 450 in lei tur a awm bawk e.

Call/ WhatsApp +919615332721