NESO in CAB16 dodal chhunzawm zel; MZP leh NESO huaihawtin Aizawl-ah hun hmang

Aizawl | November 19, 2019: India Parliament thlasik thutkhawmin Citizenship Amendment Bill (CAB16) tharthawh leh a tum duh lohna North East State hmun hrang hrangah NESO hmalakna in dodalna hi nimin khan a rualin an nei a. Mizoramah pawh MZP bultumin Vanapa hall kawtah Sit-in Protest an nei.


 

He hun hi Pu Peter chhangte, Vice President chuan a kaihruai a, Pu Lalnunmawia Pautu, General Secretary chuan MZP leh NESO ten Citizenship Amendment Bill a tir atanga dodalna kawng hrang hrang report a pe a. Pu B. Vanlaltana, President leh Pu Ricky Lalbiakmawia, NESO Finance Secretary ten thu an sawi. *Sit-in Protest an neih zawh hian Governor hnenah Memorandum an thehluh nghal.
He huna thusawitu President chuan, “Citizenship Amendment Bill hi North East mi te mai ni lo Zofate tan a him lo em em a. He bill pass tum anih dodal nana Republic Day Boycott tum anih lai a Mizoram sorkarin a intiam tawh ang ngeiin a tihtur ti ve turin a ngenin a phut nghal bawk a. Central BJP Sorkar hian he Bill hi a pass lui anih chuan Mizo thalai ten kan tihtur kan ti ve ang," a ti bawk a ni.
NESO Finance Secretary chuan “Citizenship Amendment Bill chu Hindu sakhua duhsak bikna bill a ni a. Kristiante nek chep tumna hmanrua anih avangin he bill hi a hlauhawm hle a, ‘North East State’ hi duh loh paih khawmna hmun atan emaw Sakhua duhsak bik dahkhawm nana hman kan phal lo a, he Bill hi NESO chuan a tawp thlengin a dodal zel dawn a ni a ti a. Tunhma a Mizoram Chief Minister in a lo dodal thin na chu fakin, tunah hian hma a la chhunzawm dawn em tih chu North East mipuiten kan thlir mek a, mahni Party leh mimal hamthatna dah tha a Ram leh Hnam himna turin he Bill hi min dopui turin kan ngen a ni.” a ti bawk. 

nimin vek khan MZP president B Vanlaltana kaihhruaiin MZP executive meeting an nei a, Meeting-ah hian MZP Appointed Secretary ruat chungchang te, MZP Inter-High School Quiz 2019 leh MZP Assembly 2019 rorel bawhzui chungchang te an rel. 
 MZP Inter-High School Quiz neih leh an rel a, Mizoram chhunga High School zawng zawng chu lo tel turin MZP General Headquarters chuan a sawm a. MZP Rorelna sang Assembly in a lo pass tawh  “Mizoram leh Assam ramri chinfel anih theih nan MZP in hma a lak mek hi chak lehzuala hmalak chhunzawm ni rawh se”, tih chu ruahmanna tha tak siamin Mizoram sorkar ah na zawka nawr nise a ti.











Meeting chuan Appointed Secretaries heng a hnuaia mi 10 (sawm) te hi a ruat an ni :  

1. Lalvansanga Pautu - Secretary i/c Establishment
2. Sanghmingthanga - Secretary i/c Sports
3. Ricky Lalchhandama - Secretary i/c Higher Education
4. Lalruatfela - Secretary i/c Social & Culture
5. V. L Muansanga - Secretary i/c Information
6. R. Lalkhawngaiha - Secretary i/c External Affairs
7. Lalthakima - Secretary i/c Publicity
8. Lalhmangaihzuala - Secretary i/c School Education
9. Lalhuapliana - Secretary i/c Organisation
10. Lalduhkima - Secretary i/c Property & Library

Post a Comment

0 Comments