MZP INKHÂWMPUI—2019

(Hmãn leh Tûn)

~Revd.Chauathuama

 Kumin 2019 MZP Inkhâwmpui Lian, November 6-ah khân hun serh hmang tûrin min rawn ruat a; kum 46 zet hnûa MZP inkhâwmpuia ka tel lehna a ni. MZP—hmãn leh tûn chu a lo danglam ta khawp mai. Keini hun lai kha chu Dàwrpui School emaw Aijal Theatre Hall emaw kha kan inkhâwmpuina hmun awm chhun a ni. Tûn ṭumah erawh chuan Dàwrpui Multipurpose Hall-ah inkhâwmpui chu neih a ni a; he hall-ah  hian ka luh vawi hnihna a ni. Hall hmun tùr an inchuh lai khân thãwm a lian viau a; Gauhati High Court-a PIL theh lût táwkte pawh an awm ni tain ka hria. Tûna hetianga a lo din tákah chuan hmangtu apui an tam viau niin a lang a; a hmun a lo laili bawk a, a ṭangkai hle a ni ang. A enkawltuten tûn ai hian changtlung zâwkin siam sela, a chhûng tih vawhna tùr hi tûna mi aia changkãng záwk dah sela; chutianga ti tûr chuan an tlin ngei ang tih a rinawm.

Rev. Chuauthuama Thlalatu: Ela

 Kum 46 kal taah kha chuan MZP inthlang tûr boruak kha a lian ve lêm lo; hotu nihna hrang hrang atân candidate pawh siam a ni ngai lo. MZP hi ram buai ṭan tirh lam kha chuan a hmingin a ding der der a ni ber a. Kum 1971-ah khân Aizâwl High School Students Union (AHSSU) kan din a; chu chuan MZP tih chak thar lehna kawngah hma a hruai thui hle. Kum 1971-a MZP inkhâwmpuiah chuan Bharat Darshan-a ka zin bo hlànin Headquarters Assistant Secretary-ah min lo thlang a; kum 1972-ah chuan General Secretary-ah thlan ka ni leh a. Khatih lai khân kum tam tak chu MZP hruaitute kha zirlai ni tawh lo, sawrkar hnathawk leh mi dangin an chelh ṭhin a; zirlai zîngah chuan a hmunpuia  hotu nihna chelh tùra thlan hmasak ber ka ni ang.

 MZP khân kan theih tâwpin zirlaite tân kan bei ve a; hnam thil kan ngaih pawh kan buaipui nasa ve hle. MZP-in kawng zawhpui a neih hmasak ber pawh Châltlâng Bethel bula nula pakhat BRTF Jonga-in a chìl hlum avànga lungàwi lohna kawng zawh kha a ni. Dàwrpui School aṭangin Châltlâng thlengin kawng kan zawh chho a; nula phùmna tùr Châltlâng thlànmual kawngdungah kan intlar phei zui mai a nih kha. Aizâwla zirlai kawng zawhpui hmasa ber a ni ang.

 Khatih laia kan buaipui tak pakhat chu Matric Certificate dik lo kha a ni a; certificate dik lo hmanga hna hmu eng emaw zât an awm a. ‘Suantaka Matric’ an tih kha a lãr hle! Suantaka Matric Certificate hmanga hna hmute kha kan chhui a, sawrkara thu neitute hnênah kan thlen a; mahse eng vak kan ti hlei thei lo. Mizoram hmàrchhak lama zirtîrtu pakhat, Suantaka Matric Certificate hmanga hna hmu kan chhui pawh a chhûngte zînga mi, khatih laia politician lãr tak  pakhat khân min rawn lènchilh a. |an an khawh nasa hle a; khati taka lamṭang an neih ṭhat tákah kha chuan MZP-in tih theih kan nei tlêm hle.

 Tûnah chuan MZP Inkhâwmpui chu a lian tham ta hle a. Inthlang nghâl tùr kan nih avàngin inkhâwmpuia tel tùr chinte chuan identity card (ID) neih vek a ngai. Hall pan chhohnaah ID chu an lo endik a; police an lo duty thlap bawk. Kei chu tlang angreng takin ka chho a; ID an lo endiknaah chuan ka ID ve tùr, awrh chi chu min lo hlàn a. Hall chhûngah pawh a chuanchunga ṭhuho zîngah MZP President bul chiahah ka va ṭhu ta a ni.

 Inkhâwmpui kal tùr an ṭhahnem a; ID endik zêl a nih avàngin hun a duh rei deuh bawk a. |an hun dâr 12-ah chiah ṭan theih a ni ta lo. Ṭan dâwn tak takah chuan ID nei si lût hman loa kawng khàr hnante pawh an awm nual a; a chhûnga ṭhut theihna awm zawng zawnga ṭhu chu mi sàng khat zet kan ni ang. Thlasik rim nam ṭan tawh mah se, hall chhûng chu a lum khawp mai. Thil danglam tak pakhat chu inkhâwmpui ṭan hma chuan han hawi kual ila, zirlai tam tak chuan phone an khàl char char a; tû mah dang an ngai lo! Phone khàl zîngah chuan mipa aiin hmeichhia an tam záwk.

 Ṭan a lo hun chuan ka tih ve tùr ka tih hun a lo thleng a. Kei chuan Pathian thu—Thuhriltu 12.13–14; 1 Petera 3.10–12 leh Johana 5.17 ka chhiar a, ka ṭawngṭai a; kan chanvo chu ka zo ta dèr mai. MZP Federal Council-in a lo ngaihtuah tawh, Inkhâwmpui lianin a pawmpui tûra an rawn chhawp chhuah thil pali chu President-in a chhiar chhuak a; lungrual takin kan pawm tlâng thei a. Chûngte chu:–

 (1) Kum 2020 chhûng hian Zo Hnam Inkhâwmpui Lian ZOFEST neih leh ni rawh se.

 (2) Mizoram leh Assam ramri chin fel a nih theih nân MZP-in hma a lák mêk hi chak lehzuala hma lák chhunzawm ni rawh se.

 (3) All India Services/Central Service hrang hrangah Mizo ṭhalai tam záwk kan luh theih nân MZP-in hma la rawh se.

 (4) ILP hi khauh záwka kalpui a nih theih nân hma lák ni rawh se.

 MZP inthlang tùr chu pui tak a ni tawh. Voter ID nei chin chhiar an ni a; inchhiar chhûng pawh a rei phian. Tùn hma nèna thil danglam tak chu hnam bil zirlai pâwl hrang hrang an lo tel kha a ni. Palai lah chu an kal ṭha êm êm vek mai a. Khatianga hnam bil zirlai pâwlte nèna thawh hona ṭha tak kan nei thei kha thil làwmawm tak a ni. Mizote hi ṭan rual a ṭûl a; Mizorama chêngte hian ‘inpui dinhmun’ kan chan thiam hle  a ngai. |awng hrang hrang hmangte pawh a tûate mah inhmusit bîk loa lungrual taka hnam inpumkhatna tùrin kan beih tlàn a ngai a ni.

 Hnam bil zirlai pâwl hrang hrang an han chhiar chhuah lai chuan tûnlaia ka rilru luah tak pakhat Joicy Lamnunêm Touthang hla sak ‘Inṭhen thei kan ni lo’ tih kha rilrûah a lo lang chhuak lo thei lo a; he thu ka ziah lai mêk pawh hian kan zai nawntîr reng mai. MZP inkhâwmpui lian neih ni khân chawhma lamah WhatsApp Group pakhatah chuan ‘Mizo hnam inpumkhatna’ thu hi chai laih laih a ni a. Joicy hla sak video, Mizorama hnam hrang hrang thlalák 20 awmna kha ka han dah a; chu chuan hnam inpumkhat thu sawi hona boruak chu a ti tho lehzual bawk a. Kei phei chuan ‘Bâwih leh sal anga tâng mêkin zalènna kan la hmu lo’ tih a sak lai aw pai chiat hi a hla sak timawi zualtu a ni tiin ka sawi ve a. Kum 2020-a ZOFEST neih hunah chuan ‘Inṭhen thei kan ni lo’ tih hla satu Joicey Lamnunnêm Touthang hian min rawn uap ngei phei sela chuan inpumkhat kan duhna brouak hi a châwi kâng sâng lehzual ngei ang.

 Assam nèna ramri leh ILP chungchângah hi chuan tha thawh hláwk ber tùr chu Mizoram sawrkar leh a hna thawktute an ni. MZP leh NGO-te hian theih tâwp chhuahin bei mah se, Mizoram sawrkarin chak taka a beih ve loh chuan kal thui theih a ni lo ang. Mizoram sawrkar hian tih tak arpa tuihãlin bei teh se. Ramri hrûl hi tihmasâwn sela, sawrkar hmun pawimawhte pawh dahin chènna tlákin siam sela; mipui mawh erawh chu chûng hmunahte chuan lungâwi taka hna thawka awm a ni ve thung ang. Keimahni záwkin ramri hrûla kan ramte kan enkawl duh miau loh chuan a chheh vêla vaiho bawkin rawn luah an tum zêl ang a; awmchilh duh lotu keini tân tih theih a awm tak tak ngai lo ang. Zophaia Muslim mosque sak mêk tihtàwptîr kan duh pawh hi Mizote kan thiam lo hmasa niin a lang; engati nge kan ram chhûngah mosque sakna tûr hmun kan lo pêk rêng rêng? Kan khaw thlìr hi a thui lo lutuk ṭhin; a tàwpa a buai záwka chu keimahni kan ni. Zophaia mosque sak mêk chungchângah pawh hian ṭan hmun chhe zâwkah kan ding ta a nih ber hi. ILP khauh záwka kenkawh pawh hi sawrkar mawh a ni.

 All India Services & Central Services-a lût tam tùr zawnga beih hi a tûate pawh hian kan vei tlâng ta a. Kum 40 kal ta MZP inkhâwmpui neih lai kha chuan India ramah a mihringa tehin Mizote kha All India Services & Central Services-ah lût tam ber pâwl kan ni ṭan. Kum 40 vêl a ral meuh erawh chuan Mizoram Chief Secretary leh DGP tûr pawhin Mizo officer an kang chat  zo titih a ni ta mai si!

 Mizoram zirna hian All India Services-a tling tùr hian a pha ta lo záwk em ni? Kum tin HSLC/HSSLC Exam-ah Distinction an tam tual tual a; mahse College an han zir chhuah  meuh chuan India rama hna ṭha thawk tùrin kan tling táwk ta lo emaw ni? MZU pawhin doctorate degree nei thlengin a chher chhuak tam tial tial a. Zirna kan kalpui dàn hi chîk záwka en fiah a ngai a ni ang. Degree/Certificate neih ṭhat ringawt a tâwk lo; thiam a pawimawh ber. Rev. Zairema’n “Pass tùrin ka zir lo a, thiam tùrin ka zir záwk a ni,” a tih kha kan entawn tùr a ni ang. Mi thiam na ná ná chuan eng exam pawh bei se, vawi khatnaa a hlawhtlin loh pawhin vawi hnih/vawi thumnaah chuan a hlawhtling ngei ngei ang. Ṭan a ṭûl! (9.11.2019—Revd CHṬ)