Education Centre School Education minister in hawng

Aizawl | November 15, 2019; vawiin khan School Education Minister Pu Lalchhandama Ralte chuan Education Centre sak thar, Aizawl Treasury Square a mi chu a hawng.

Minister chuan hawnna thu a sawiah Mizoram sorkara Department lian ber thawktu tamna ber enkawlna tur Directorate building thar hawn a ni ta chu lawmawm a tih thu a sawi a. He building sak anih theihna atana bul tumtu leh thawktu zawng zawng chungah lawmthu a sawi a ni.

Minister chuan Building thar kan neih hian rilru thar, ngaihtuahna thar thawktute thinlungah pe tel se, office hun ngaihpawimawhte, office dawrtute chungah hawihhawmna keng tel se a duh thu a sawi a, he building thara thawktute chu biak nuam midangte tanpuitu ni turin a chah a ni. 

Minister chuan zirna atana sorkar hmalakna chi hrang hrang a sawi a, HRD Board hmang hian Education reform pawh sorkarin kalpui a tum mek a ni a ti a. Kum khat tling lovah hna sang chuang lak a ni tawh a. Hindi Teacher thar lakna tur central atangin phalna kan dawng a, kan state dinhmun en chunga zir chian leh a ngai a, tuna phalna kan hmuh hian 2020 March thla thleng chauh hlawh a huam a. A hnu lama Central sorkarin kalpui zel a tum dan te kan zawtfiah mek a ni a ti. 

He Centre hawnnaa khualzahawm Pu L.Thangmawia HRD Vice Chairman pawhin thu a sawi a, Sorkarin computer leh generator School hrang hrang a pek te chu hman tangkai dan kawng zawn a tul thu te, Education a thawktu hrang hrangte thuikhawm nan thla tin chhuak Magazine chhuah a pawimawh thu te, Achievement report tihchhuah thin a pawimawh thu a sawi bawk.

Education Centre hi cheng nuai 974 senga sak a ni a, a vaiin floor 7 a awm a, motor parking LMV 30 leh 2 wheeler 40 dah theihna a awm a, a chung berah conference hall a awm a, lift dah a ni bawk a, he building thar hi School Education Directorate building atan hman a ni dawn a ni.

He Centre hawnnaah hian Dr ZR Thiamsanga MLA, Dr Vanlaltanpuia MLA,Pu H.Lalbiakzauva MLA, leh Pu Lalrinsanga MLA te an tel a. Education Department a thawktu Officer leh staff te bakah Officer  pension tawh engemawzat an tel bawk a ni.