PATHIAN ṬANPUINAIN ARSI A ENG ZUAL ZEL DAWN - Zoramthanga

Aizawl | October 22, 2019: MNF chuan vawiin khan Mizo Hnam Run-ah an dincham tum 58-na lawmna hun an hmang.



He hunah hian MNF President, Chief Minister ni bawk Pu Zoramthanga chuan thusawiin, “Pathianin MNF a kaihhruai nasat dan hi a makin a lawmawm tak zet a, Pathian chhanchhuahna ropui tak tak a dawn dante hi a ropui hle a. Pathianin he hnam movement a hruai dan mak leh ropui tak hi thang leh tharteah pawh kan inhrilh zel a pawimawh hle a ni,” a ti a. “Party thenkhatin vawi 8/9 emaw lai an party hming an thlak tawh laiin MNF chuan hming dang a la pu ve lova, MNF Founder President Pu Laldenga sawi angin ‘MNF chu MNF a ni mai’ a tih hi MNF nihna dik tak a ni,” a ti a. "Pathian tanpuinain Arsi a eng zual zel dawn,” a ti bawk. 

MNF President chuan Congress Party chu phai lamah leh Mizoramah an chhe deuh vek tawh tih a sawi a. “Party President tur pawh an inhmu zo tawh lo a, search committee-te hial an indin a, an tihngaihna hre lovin Sonia Gandhi bawk an hnawn leh a. Central leh State hrang hrangah an dinhmun a hniam mek zel a ni. Mizoram Congress pawh hi phai lama Congress tihnun chawp an ni a, a tinungtu lam engmah an ni tawh si lova, thingtlang lamah nen lam an hniam ta hle a ni,” a ti a. “An chhiatna turin Pathianin Congress party Mizoramah a chawisang a. Tute nge an nih chiah tih mipuiin kan hriat theih nan thuneihna an kutah dah a ni a, zute zuarin an chetna hrang hrangah leh he ram enkawlna kawngah neitu nihna thinlung an pu lo tih a chiang hle,” a ti.

Pu Rama chuan, “Kan Airport neih chhun Airforce hnena pe turin thutlukna an lo siam hman a, keini chuan kan thlawhna tumhmun neih chhun hi midang kuta pek kan remti lova, a neitu ngeiin enkawl zui zel kan duh. India ram khawpui pahniha kan House-te PPP Mode-a vai nen intawm turin an lo ti a, kan chhuh zar zar a ni. Hriat chian poh leh Congress thil tih pawi kha a tam. Project thenkhat 1st installment la zet a, chhunzawm hleih theih loh a awm nual a, Project thenkhat delay leh thil hrang hrang a awm nual. Kihhnawk buaipuia buai buai rualah kan inngai lo a, kan thian zel a, thil thenkhatah erawh hi chuan kihhnawk tak ngial pawh an peih lo a ni,” a ti. 

MNF President chuan, “Inthlan dawn khan ZPM-te an inzuar thiam hle a. Ke lehlama BJP rap tau tau chunga vawi 7/8 lo inthlak kual tawh an ni chungin, inthlanah MLA 8 lai an nei a. Tunah chuan an rawng dik tak lang chhuakin Party-ah an inlet ta a,” a ti a. “Tunah hian ZPM MLA-te kha ‘ZPM-ah i tel em?’ ti ila ‘ka tel’ an ti ngam tawh lo reng reng. ZPM MLA-te buaina chungchang hi MNF-in kan tih a ni lova, Congress tih a ni hek lo. Anmahni buaina insiamchawp liau liau a ni,” a ti.

Pu Rama chuan, “ZPM MLA-te kum 5 vel ZPM-ah an tel ngam loh chuan an tel lovin Pu K Sapdanga-te’n party an lo kaihruai dawn a ni a. Kum 5 hnuah Pu Duhoma hian Chief Ministerial candidate nih leh ngawt tum se a har viau mai thei. Duh duha awr sen a, duh duha awr dum leh thei party an ni tih mipuite’n an hriat a tul hle. ‘Ni a chhuak dawn’ an ti a, ni chhuak thlen diktir an tum a, chu ni chhuak tur an tih chu lukhumin a hliah ta a ni,” a ti bawk.

Chief Minister chuan SEDP kalpui tan a nih thu a sawi a. “SEDP hi hriselna lam hawiin hmalakna hmasa kan tan a, SEDP Health Care duan niin chhungkaw tinin kum khatah nuai 2 chin an bill thei dawn a. Tunah hian Economic Programme kan la tan lo deuh a, Delhi lam an phur tan a, a lawmawm hle a. Chaw, ei leh bar leh sa-ah intodelh tumin theihtawp kan chhuah dawn a ni,” a ti.


MNF dincham lawmna hun hi Pu R Tlanghmingthanga, Vice President-in a kaihruai a, Upa R Khawpuithanga Ex MLA PAC member-in hunserh a hmang.

He hunah hian Pathian leh ram tana martar-te hriatrengna leh sun nan ngawi rengin minute 1 kalkhawm mipui an ding a ni.

Post a Comment

0 Comments