Mizoram District Gazetters Aizawl lehkhabu tlangzarh

Aizawl | October 15, 2019: Art & Culture Minister R Lalzirliana chuan niminkhan Art & Culture Department hnuaia awm Tribal Research Institute buatsaih Mizoram District Gazetters Aizawl tih lehkhabu chu a office chamber ah a tlangzarh.

Art & Culture Minister R Lalzirliana chuan District Gazetter hmasa chhuah lai kum 1989 leh tunlai hun tehkhinin hun a inher danglam nasa tawh a, kawng hrang hrangah hma kan sawn a, heng hmasawnna chanchin ziahna bu kum tam tak hnua buatsaih a ni leh thei chu lawmawm tiin hetiang lehkhabu hi ro a tling a, nakin zelah Mizoram leh Mizote chanchin ziahna kawngah mithiam ten an tangkaipui theih thu a sawi.

Art & Culture Department chu Department lian vak lo ni mahsela Department pawimawh tak anih thu R Lalzirliana chuan sawiin Mizo te mahni hnam ziarang ngaihhlutna leh chawisan zelna kawngah hna pawimawh tak Department in a thawk a,  Mizo nationalism thalai te an hriat zelna atan pawh a tangkai thei hle in ka hria a ni, a ti a. Hnam zia rang ‘culture’ leh hna lam te hi tunlai mil a tih danglam chu tha a tih lo thu sawiin tunlai khawvel mil a hnam lam te kan modernise chuan a hlutna a bo thei a ni, a ti.

District Gazetter hi British hunlai khan British hovin District chanchin hrang hrang ziaka an dahkhawmna bu a ni thin a. Kum 1989 khan Art & Culture Department in Mizoram District Gazetter hi a lo buatsaih tawh a, vawiina lehkhabu tlangzarh tak hi kum 1989 hnua Gazetter bu an buatsaih leh chu a ni.

Mizoram District Gazetters Aizawl District hi cheng 400 man niin phek 575 a ni a, Tribal Research Institute ah lei theih in a awm a, copy 500 chiah chhut a ni. He lehkhabuah hian Mizoram chanchin hrang hrang tarlan niin reference atana lehkhabu pawimawh tak a ni.

- DIPR