Khawfai inelna lawman sem; Biate a tum thumnan Mizoram khaw fai ber

Aizawl | October 2, 2019: Vawiin Oct 2, 2019 Mahatma Gandhi Piancham pha vawi 150 Na denchhen in Mizoram khawfai intihsiakna lawmman chu Vanapa Hall-ah Mizoram CM Pu Zoramthanga chuan a sem a, a tum thumna atan Biate chuan Mizoram Khaw fai ber nihna an hauh leh a, 'Fai hi a nuam em a kan lo fai ta mai a ni' titu Biate khua hian 2017 leh 2018 khan Mizoram Khaw fai ber nihna an lo hauh tawh bawk a ni.

A pum puiah Biate dawtah hian Zawlnuam awmin, Serchhip in Mizoram khawpui fai ber 3na an la a ni.


 
Vanapa Hall a inkhawmah hian khuallian Chief Minister Pu Zoramthanga chuan Lal Isua zirtirna dungzuia Mahatma Gandhi zirtirna - tharum thawh lova inremna siam chu mipuiin nghilh lova, mahni nun theuh a senglut turin kalkhawmte a sawm a. Pu Gandhi a hmahruai, British lalram laka inpawngnekna tello a India zalenna sualchhuahna chu khawvelin ngaihlu in, Gandhi a piancham October ni 2 chu khawvel pum huap "International Day of Non-Violence" ah UN General Assembly chuan a vuah hial thu a sawi.

Chief Minister chuan Gandhi a piancham behchhana faina lama hmalakna chu thui tak kalpui tawhin, chhunzawm zel a nih tur thu a sawi a. Chumi bakah tui thianghlim mipui mamawh tawk neih chu sawrkar laipuiin a ngaipawimawh thu sawiin, Jal Shakti Ministry chuan state tin te project siam tura a tih thu a sawi a. Mizoram sawrkar pawhin hnianghnar taka mipuiin tui thianghlim an neih theih nan tha zawka van ruahtui dawh a khawlkhawm dan te ngaihtuahin hma a lak mek thu a sawi.

Chief Minister chuan vawiin inkhawmah hian lehkhabu pahnih - Jal Shakti Campus leh Jal Shakti Gram chu a tlangzarh a. Heng lehkhabu pahnihte hi sawrkar laipuia Ministry of Human Resource Development hnuaia Mahatma Gandhi National Council of Rural Education (MGNCRE), National Council of Rural Institutes (NCRI) tia hriat thin hmalakna a siam a ni. Zirna In sang zawk ten tui khawlkhawm a daihzai zawka hman tangkai theih dan an duanchhuahna kawnga puitu ni turin he lehkhabu pahnih hi siam a ni a, Hyderabad an hmunpui atanga an lo kal ten lehkhabu tlangzarhna hi an rawn buaipui a ni.

Khualzahawm Deputy Chief Minister Pu Tawnluia chuan India Hnampa Mahatma Gandhi dam laia a ngaihpawimawh em em - faina leh thianghlimna hre renga India ram pum huapa hmalakna ngawrh taka kalpui a ni chu lawmawm a tih thu a sawi a. Deputy Chief Minister hian Mizoramah pawh department hrang hrang kaltlangin mipuite hmakhua ngaia, faina lama hmalak hrang hrangte sawiin, nasa zawka hmasawn tlan zel theih nan thawhhona tha nei turin mipui leh sawrkar hnathawkte a sawm a ni.

Vawiin inkhawmah hian Information and Public Relations (I&PR) Department in Mahatma Gandhi piancham vawi 150-na puala Short Film insiamsiakna a buatsaih a tithate hnenah lawmman pek a ni a. Lawmman dawngtute leh an lawmman dawn te chu hengte hi a ni:

1st Prize (Rs. 50,000) - "Gandhi" - Zami Vanchhawng
2nd Prize (Rs. 30,000) - "Sakhaw Zalenna" - Albert Zosangliana
3rd Prize (Rs. 15,000) - "Gandhi, Father of the Nation" - Israel Lalmuanpuia Renthlei

Faina beihpui kal zelah UD&PA Department leh PHE Department kaltlanga khua leh district fai enfiahna a titha thlanchhuate hnenah vawiin hian lawmman sem a ni bawk a. Category hrang hrangah then niin lawmman dawngtute chu hengte hi an ni:

I. Mizoram khaw fai inelna, UD&PA buatsaiha Category-I district headquarters fai lawmman:

   1st Prize (Rs. 1,00,000, Memento leh Certificate) - Serchhip Urban Town
    2nd Prize (Rs. 80,000, Memento leh Certificate) - Lunglei Urban Town
    3rd Prize (Rs. 40,000, Memento leh Certificate) - Kolasib Urban Town

II. Category-II lawmman dawngtute chu:

   1st Prize (Rs. 1,00,000, Memento leh Certificate) - Biate
    2nd Prize (Rs. 80,000, Memento leh Certificate) - Zawlnuam
    3rd Prize (Rs. 40,000, Memento leh Certificate) - Thenzawl

III. Category-I leh Category-II kaikawpa khawpui fai ber lawmman dawngtu chu Biate niin, cheng nuai khat an dawng a. Pahnihna chu Zawlnuam niin pathumna chu Serchhip a ni. Pahnihna leh pathumna tan hian lawmman hranpa siam a nilo a. Lawmman dawng ve lote tan participation prize cheng 10,000 leh certificate siam a ni bawk.

IV. Swachh Bharat Mission Gramin hnuaia PHED kaltlanga Mizoram district hrang hranga khawfai lawmman hian Rs. 20,000 theuh a keng a ni:
      Aizawl district - Thingsul Tlangnuam
      Lunglei district - Haulawng
      Siaha district - Zawngling
      Champhai district - Dungtlang
      Kolasib district - Phainuam
      Lawngtlai district - Cheural
      Mamit district - Reiek
      Serchhip district - Hmuntha
      Hnahthial district - Rawpui
      Khawzawl district - Tualte
      Saitual district - Suangpuilawn


Vawiin Vanapa Hall-a inkhawm hi Addl. Chief Secretary Pu J.C. Ramthanga chuan kaihruaiin, India Hnampa Pu Gandhi a sulhnu ropui takte, a hnathawh hlawk tak leh hnam hnuaihnung zawkte tana a thawhna te hre thar leh turin kalkhawmte a chah. Inkhawm hi GAD Commissioner Pu Ashish Kundra chuan lawmthu sawiin a khar a ni.

1. District headquarters intihsiaknaa lawmman latute:
1na Serchhip
2na Lunglei
3na Kolasib


2.Khawpui dang (Other Urban Towns)
1na-Biate
2na-Zawlnuam
3na- Thenzawl

District Wise a Thingtlang khawfai berte
Aizawl Dist-Thingsul Tlangnuam.
Lunglei Dist-Haulawng
Siaha Dist-Zawngling
Champhai Dist-Dungtlang
Kolasib Dist-Phainuam
Serchhip Dist-Hmuntha
Lawngtlai Dist- Cheural
Mamit Dist- Reiek
Hnahthial Dist-Rawpui
Khawzawl Dist-Tualte
Saitual Dist-Suangpuilawn


Thlalak tak zawk hetah a awm.

Post a Comment

0 Comments