A HRANG CHU ANI BER E

A mak angreng khawp mai. Ka thiannu pakhat te in hi, anmahni pawhin an luah ngam tawh loh avangin a nute an fin ta ringawt mai a, a buaithlak angreng khawp mai.

Aizawl veng pakhat, anmahni leh an veng chu thupsak ta ila, ka thiannu te in chanchin hi ka'n sawi ve mai mai ang e. Hetiang lam, a tak ngei si hi ka tawng ve ta nual mai a. Inlo chhiar ve duh takin ka tia hmelthaho...

Ka thiannu te nupa hian a nu te inhnuai an luah a. Anmahni hi naupang te ve ve an la nih avangin dawih pawh an la dawih angreng khawp a, an pa zawk pawh hi mipa mah nise a dawih chi chu a ni ve hrim hrim mai. Fapa pakhat an nei ve a, an fapa lah chu a hmeltha kher mai lehnghal.

A hrang han tihsak teh hluai hi ka inthlahrung deuh viau a. Mahse, a hrang lo han tih dawn chuan thilmak angreng tak tak hi a thleng fo lawi si a. Tin, anmahni berin a hrang an tih avanga awm ngam lo an nih lawi si avangin ka inthlahrung lo mai ang.

He an ina thil thleng thin hi sawi vek sen pawh anih loh avangin a tlangpui chauh ka'n sawi ang e. Ka sawi tawh angin ka thiannu te nupa hian fa pakhat, kum hnih mi an nei a. A nute inhnuai luahin an khawsa ve nawk nawk a.

A nu te chhungkua hi an tlem tawh avang leh ka thiannu te fapa, (An tupa anih chu) an ngaih em avang hian a ni te inah chuan an riak chho deuh chawt thin a. Chaw pawh anmahni inah aiin an ei ngun zawk mah ang tih tur hi a ni. An pa hi nitin hnathawkin a chhuak thin a, ka thiannu hna ber erawh chu nau awm a ni deuh chawt mai.

An in hi kawngpui atanga hniam deuhah a awm a, in pangngai tak ni vein room pahnih a awm bawk a. Mahse, a in awmdanin a zir chiah loh avangin tukverh pangngai chu room ah chiah a awm a, ventilation erawh chokaah pahnih a awm. Chuvangin an in hi a thim hle a, chhunah pawh current hi on reng a ngai thung. Tin, an bath room ah tukverh tereuhte, khar khat chi kha a awm ve bawk.

Sawi tawh angin ka thiannu te hi an inah hian an awm tam lo khawp mai a. Hei hi a chhan ber pakhat chu nuam an ti lova, an tri deuh tlat mai a ni.

A mak angreng khawp mai, mahni in ngei pawha han thlamuan loh tlat mai chu. Bakah mihrang daih in luah pawh an ni lova, mahni nu leh pa te ngei in nisi, hetia an thlamuang lo tlat mai hi an dawihzep vangah ka puhsak mai a kei chuan. Mahse, thlamuan lohna tur an lo hriat zeuh zeuh tawh vang alo nia.

Chu an thil hriat chu eng thil nge nita ang? Min hrilb tirh phei chuan ka awih sak lem lova, a chhan chu thlahrang tih vel hi ka rin zawng anih ve vak loh vang ani maithei. Mahse, han hriat/hmuh ve takah chian ka hriatthiampui ta thlap mai.

He an ina ka thiannu in a thil hlauh a tawn hmasak ber tum chuan zan dar sawmpakhat a pel tawh a. Zan dang ang bawkin ka thiannu te chhung chu a nute ina riak turin mut an tintuah mek a.

Mahse, an fapa kekawr zun huh thlakna tur an ken theihnghilh tih an hriat avangin chumi la leh tur chuan ka thiannu chu an in lamah chuan a chhuk thla leh ta a.

Kawngkhar kalhna hawngin an room lamah chuan a lut tlang nghal a. Chutia naute kekawr a zawn buai lai tak chuan an room ah chuan thil rimtui em em mai hi a rawn nam lut ta chek chek mai a.

Chutiang taka rimtui chu apian ahnu lamah ala hre ngai lo. Mak a tiin rimtui a ti em em a, eng rim chiah nge tih erawh chu sawi fiah ngaihna a hre lova. A tehkhin tur takngial pawh a hre lo, rimtui tih baka rimtui ani tawp mai.

Chutiang thil rimtui lutuk mai mai, eng rim chiah nge tih sawi fiah thiam siloh, zanlai dawn tawha an room a arawn nam veng veng ringawt mai chu mak a ti hle a. Engnge anih a khawi atanga rawn nam nge tih hriat tumin a hawi kual ruai a. Mahse, engmah a hre thei lem lo.

A kekawr zawn lai theihnghilh thak chuan chu thil rimtui lutuk mai chuan a ti a huih mai a ni awm e. Eng emaw chen chu engmah tih nachang hre lovin a ding ngawi reng a. A mit chhingin chu thil rimtui chu a hip vang vang a.

Mahse, rei vak loah a harhchhuak zawk a. A kekawr duh chu pahnih lain room atang chuan a chhuak nghal a. Room a kalh that mawlh mawlh lai chuan room chhaka ngik feih feih ri niawm tak chu a hre ta a.

An room leh room chhak hi banga inpindan mai a ni a. Room chhak zawk kawngkhar leh an room kawngkhar pawh hi inhnaih tak a ni. Room chhak kawngkhar bulah chuan a pen chho hlek a, kawngkhara beng sichat chuan thawm chu a ngaithla chiang a. Mahse, eng thawm mah a hre zui ta tlat lo.

Kalsawn a tum rilruk lai tak chuan thil rimtui lutuk mai bawk chu kawngkharah chuan a rawn nam chhuak leh ta veng veng mai a. An room a rawn nam pawh kha room chhak atanga rawn nam chhuak ani tih a hre ta nghal a. Room ah chuan a lut ang nge lut lovang tih a inngaihtuah buai hle a. Mahse, a hmanhmawh deuh tawh avangin kawngkapui lam chu a pan ta zawk a.

A tuk khua alo var chuan a fapa kum hnih mi nen ka thiannu chu an inah chuan a chhuk thla leh a. Mahse, eng rimtui mah hriat tur a awm zui lo. Chawhma deuh thaw an awm hnuin a nu te inlamah bawk an chho leh ta a.

Khua a rawn thim a, dar riat vel anih chuan ka thiannu chu anmahni ina inbual turin naute leh a u fanu, kum 7 mi chu a hruai thla leh a. Hemi tum pawh hian thil rimtui deuh kha a nam leh ring deuhin a hnar a len vat vat reng a. Mahse, engmah a nam lem lo.

Ani chu inbual turin bath room ah a lut nghal a. A u fanu chuan ka thiannu fapa chu lo awmin an hlim hle a. Nakinah chuan naupang ve ve nana na chu an intitap ta a. Ka thiannu chu ala inbual zo si lo, a u fanu chuan ka thiannu hnenah chuan, "Ani, naute hi a tap a nia, api teinah ka chhohpui mai dawn aw." A ti a. Ka thiannu pawh chuan "Aw, lo han chhohpui mai rawh. I tlukpui ang e fimkhur rawh aw." Tiin bath room atang chuan a chhang a. Tichuan naupang pahnih te chu an chho ta a.

Ka thiannu inbual zo chu bath room atangin a rawn chhuak a, an room ah lut tlangin a thawmhnaw a inthlak mek a. Chutih lai tak chuan ahma zana thil rimtui em em mai bawk kha a rawn nam leh ta chem chem mai a.

Ka thiannu chuan rimtui ti takin a hip vang vang a. A inthlak zawh chuan room kawngkhar chhak zawk bawk chu a han ngaithla leh chhin mai mai a. Chu thil rimtui tak mai chu room chhakah phei chuan a rim a lo nam nasa zual a.

Ka thiannu chuan dim tein room kawngkhar chu a han hawng de de a. Room light chu on in muangchangin a lut ta a. Room rimtui zia chu sawi ngaihna a awm lo tawp. Rimtui em em mai hian room chu a khat chúk mai a. Ka thiannu chuan mak a tiin chu thil chu engnge anih ang tih a hre pha hlawl lo. Tin, chutiang khawpa rimtui chu an room ah chuan an dah lo tih a chiang a, a rimtui dan em em chu a mak a ni tawp mai.

Room kil tin chu a en kual vek a. Engmah thil danglam leh thin han tiphu thei thil a hmu lo. An bungraw neih, thil ho te te anmahni dah ngei ho bak engmah a awm lo. Mahse, a rimtui em em ringawt mai si.

Room atanga chhuah leh mai tumin room kawngkhar lam chu a pan a, kawngkhar a thlen chiah chuan a hnung lama thil tla ri chuan a tiphu zawk a, a ding chiang kher mai. Hnung lam a lehhawi chuan an fapa tana an leisak, Savawm lem Almaira chunga an dah chu chhuatah alo let reng a.

Ka thhiannu chuan hlauhna pawh a nei chuang lo. Savawm lem chu chharin a awmna ngaiah chuan a dah leh mai a. Mahse, chhuahsan a tum lai tak chuan a rawn tla leh ta tlat mai.

Ka thiannu pawh chuan mak a ti ve hle mai a. A chhan chu amaha tla leh mai thei turin a dah lo hrim hrim a, thildang engmah pawh a tlain a che eih hlawm bawk si lo. Mak ti deuh tak chuan ka thiannu chuan ava chhar leh a, a dahna ngaiah bawk chuan tha deuh leh uluk deuhin a dah leh ta thlap a.

Tichuan ngaichang ru ranin room kawngkhar lam chu a pan ta a. A hlauhthawn ruk ang chuan a tla ta lo. Room kawngkhar chu kharin kalh a tum nghal a. Mahse, a mak khawp mai. Chutia room kawngkhar kalh a tum lai tak chuan thil tla ri a hre leh ta. Ka thiannu chuan kalh ta lo chuan room kawngkhar chu a han nam hawng leh ta dek dek a. Chhuata Savawm lem lo awm chu a vaw hmu leh ta mai.

Thawk leh khatah ka thiannu chu hlauhnain a rawn tuam nghal hlup a. Room kawngpawh kalh ngam ta lo chuan a tlan chhuak rang ta a. Pawnah chuan a ding khur dawt dawt a, a tiril a khur zawih zawih mai.

Kawngkapui kalhna tala chu pawn atanga banin a la thei hlauh a. Tichuan khur zawih zawih chunga kawngka a kalh zawh chuan a nu te inlamah a tlan chho ta hlawk hlawk a.

Chawlhni tlai khat chu ka thiannu pasal hian an inah amah chauhin tv a en a. A tv en chu muthilhsanin zan dar sarih velah ka thiannu chuan chawei turin a zuk phone harh a. Hemi tum hian ka thiannu pasal rawn harh chuan mak tih deuh mai a tawng bawk a. Tv lam hawiin a ke chu tv hnaih lamah a dah a, chutia tv en chunga muhil chu nisi, a rawn harh chuan a mut dan zawng chu lo insawnin a lu lam chu tv lamah alo awm reng mai a. Amah a inlet miah bawk si lova, a ngaihna hre lo zetin a hawi a hawi mai a ni.

Tichuan in chung lama chawei tur chuan light te a off fel a, a mut dan lo inthlak mak tak mai ngaihtuah chung chuan pawn lamah tala in a kalh a. A kalh fel, a han inher chiah chu chhung lam atang hian an kawngkhar chu a rawn innam thuai mai a, ka thiannu pasal phu nasa lutuk chu a tlu thuai nghe nghe.

Thlithaw a ni ang han ti turin thli a thaw eih lova, midangin an fiam a ni ang han ti dawn ila, tumah inchhungah an awm si lo. A chhunga lut tha leh a tunge anih fiah turin a ngam tawh si lo. Kawngkhar a rawn nam nat dan lah chu, tala khan kalh hman lo sela chuan kawngkhar kha a chhiat mai te pawh a rinawm a ni. A kalh hman chung pawhin a kau hawk mai a, chhung lamab lah thawm dang a awm zui eih bawk si lo. A mak tih mai loh chu sawi tur a vang angreng khawp mai.

Hetiang hian a khat tawkin thawm leh thil mak deuh deuh hi an tawng ta fo mai a. Sawi vek sen pawh a ni lo. Mahse, zantin erawh a ni lem lova. A chang chuan a zan zawn te pawhin a che a, a chang chuan kar khat dawn te pawh a awl thin. Hetiang anih avang hian ka thiannu te nupa, la naupang ve si leh huaisen em em hran bawk si lo tan chuan a buaithlak thin khawp mai.

Tin, heng thil thleng zawng zawng hi pawn lamah leh mihrang hnenah an sawi duh bik lova. Miten an in a hrang an tih chuan a zahthlak ve mai bakah a hlauh pawh an hlau dawn a. Heng hi an duh bik loh avangin an zep ve hram hram a ni. Mahse, anmahni leh an veng sawi lang lem lova hetia post min phalsak hi ka lawm khawp mai.

Hetianga an in ber alo nih takah chuan an mangang ru ve em em a. An inah pawh hian an khawsa ngai ta meuh lova, a nu te chu an fin a ni ta deuh ber mai. Mahse, ka thiannu erawh hi chu mi chefel leh inchengvawng tak mai anih avangin an in hi chu a thlahthlam tak tak thei chuang lova, nitin deuh thaw in tifai leh inbual turin a la kal thin a ni.

A kal dawn hian mahnia kal chu nuam a tih tawh ngai loh avangin naupang hruai tur a zawng thin a. Hetianga kalpui leh awmpui a neih hi chuan eng thawm danglam leh hlauh tur engmah a awm ngai lo thung.

Tin, a thil hriatchhuah pakhat bawk chu, naupang ringawt pawh hruai se eng thil nge anih a hriat si loh, rimtui em em thin kha a awm ngai miah lo bawk a. Amah chauha a kal erawh chuan kha thil rim kha room ah a rim a khat vek ngei ngei thin thung.

Tlai khat chu naupang hruai mai tur a hmuh loh a vangin pawnah a ding vang vang a. Ni hnih lai a chhuk tawh loh avangin kal ngei ngei a duh si, amah chauh chuan a ngam tawh si lo, a rilru a hah kher mai.

Mahse, vanneih thlak deuhin a hruai fo thin a u fanu chu a rawn kal ta hlauh mai a. Ka thiannu chuan kalpuiah a sawm nghal a. Mahse, chumi tum chuan a u fanu chuan a duh tlat lo mai a, rei fe thil leisaka an inthlem hnu chuan an insawm thlu thei hram a.

Chumi tuma an zuk kal chuan khua ala thim lova. Mahse, sawi tawh angin an in chhung hi chhunah pawh a thim ruih hrim hrim ka tih kha. Kawngka an han lut chu nidang ang lo takin thil alo awm leh ta.

In chhung an han lut chu current alo in on eng vek mai a. Tin, room pahnih kawngkhar chu alo inhawng dar vek bawk a. Hetiang hian vawikhat mah an la kalsan ngai lo hrim hrim. Ka thiannu chuan mak a ti kher mai.

An ina a kal reng reng hian a chhuahsan leh dawnah room kawngkhar a khar vek zel a. Tin, a hawlh kalh thlap thin bawk. Current zawng zawng off lovin a kalsan ngai lova, a kal hnuhnung ber tum pawhin light a off vek a, room kawngkhar pawh a kalh vek tih ala chiang a, mak tih loh rual a ni lo.

Tin, amah lo hi a chhungte dang an kal ngai zen zen lova, an pa phei chu amah aoa a dawih zawk mah avangin ama tel lo chuan a kal ngam tawh si lo, tutih nge ni ta ang?

A nu te inah a nau hruai nen chuan an tlan chho leh nghal a, a nu te chu tunge kal tiin a han zawt vek a. Mahse, tumah an lo kal si lo. An pa hnthawk lai pawh chu phone in a zawt ve hrim hrim bawk a. Mahse, ani pawh a kal chuang lo.

Mak ti takin a nau hruai nen bawk chuan an chhuk leh ta a. A nau hruai lah chuan engmah ala hrethiam ve lo bawk a, a engthawl em em zui. Hlau deuh chung chung chuan a tih tur ang ang chu a ti zung zung a, a rilruah chhoh leh vat bak a awm lo.

A nau hruai chu biakna tur a zawng char char a, chutia an inbiak reng chuan a hlauhna pawh a zia ve tlat a ni. Hmanhmawh takin an room chu a phiat sawk sawk a. Chutia khum hnuai vel a hawl lai chuan rimtui em em mai bawk kha a rawn nam leh ta tlat mai le...

Ka thiannu chuan a nau hruai chu a han ko nghal vat a. Mahse, chhangtu an awm ta tlat lo mai. A hma aia ring mahin a han ko nawn leh a, ala rawn chhan chuan loh avang chuan hlauthawng takin ka thiannu chu chokaah chuan a tlanchhuak nghal a. Mahse, a nau hruai awzawng alo awm tawh reng reng lo mai.

Ka thiannu chu rang takin pawnah a tlanchhuak tlang nghal a, a nau hruai chu kawngpuiah alo awm daih tawh chu niin. Eng laiin nge a chhuah tih reng reng a hre hman lo.

Ka thiannu chuan a nau chu a ko let nghal vat a. A nau pawh chu ngawi rengin a lo chhuk ve leh mai bawk a. Ka thiannu chuan "Eng laiin nge i lo chhuah hman a, kal sawn loh tur ka tih kha i hre lo mi?" Tiin a hau a. Ani lah chuan "Ka chhuah lai pawh ka hre lo reng reng." A ti mauh mai...

Ka thiannu in "Ka awih lo chiang lutuk, dawt sawi suh. Dawt i sawi chuan ka thil leisak che kha ka laksak leh mai ang che." A tih pawhin a nau chuan "Ka hre lo, ka hre lo tak tak. Kha la leh mai rawh ka chhuah lai ka hre miah lo." A ti ve tlat mai si a. A hmel leh a mitmengah dawt a sawi lo tih a hriat ve tlat anih chu.

Mahse, ka thiannu tan chuan awih chi niin a lang si lova, tih vak ngaihna hre hek lo, "Lo lut rawh, kalsawn tawh miah suh ang che." A ti ta ngawt a. A nau chuan "A nuam lo e mai ka awm duh tawh lo." A ti ta reuh a.

Ka thiannu chuan "Engnge a nawm lohna?" Tiin a zawt leh kher a, zawi sap hian "Ka hlau a lawm." A ti ve ta mai. Ka thiannu chu a mur deuh ur ur a. Mahse, pangngai takin "Engnge i hlauh a?" Tia a zawh erawh chuan a nau chuan sawi tur a hre nge a ngawi kar mai.

Ka thiannu vek chuan awka nem deuh hian "Ka zo tep tawh alawm bawihte, ka inbual leh lawk ang a ka hman a ni mai. Min lo nghak leh lawk la thil dang ka leisak leh ang che aw." Tiin a thlem tha leh a. A nau chu ngawi rengin a hawi kual hrak hrak a. Tichuan ka thiannu chu inbual turin bath room ah a lut ta nghal a.

Mahse, ka thiannu bath room lut chu a rawn chhuak leh rang kher mai le. A nau hnenah chuan "I pi te han ko vat teh, hmanhmawh rawh. Tlan rawh tlan rawh." A tih zawm nghal zat a, a nau chu a tlanchhuak nghal vat bawk a.

Ka thiannu chu pawnah a ding ngar a. A nu lo chhuk chuan "Eng thil nge ni a?" A rawn ti chhuk mawlh mawlh a. Bath room an han en chuan bath room chu hman zawh hlim ang chiah hian alo huh vek mai chu niin.

Ka thiannu te bath room hi a chhuat leh a bang chanve aia sang mah tile phah vek a ni a. Tin, shower a awm bawk a. Shower lah chu hman zawh hlim tih hriat tak hian tui alo la far zung zung bawk a. A bang te lah chu inbual zawnga tih perna tih hriat tak hian alo la huh vek mai bakah sahbawn phuan la kai te pawh an hmu ta teuh mai.

A nu nen chuan mak an tiin an inmelh vak vak ringawt mai a. Tutih nge ni ang a, tunge lo inbual ta ang le. Chhuat leh bang zawng zawng ala huh zuih vek a, shower lah off that mumal lohin alo la awm bawk si. Tin, bath room thuthleng an dah, plastic thuthleng hniam pakhat awm pawh chu alo la huh vek bawk a. Bath room kil khatah chian chirh nawi niawm tak hi alo tling tun bawk a. A mak khawp mai.

Mihring tih a ni thei ang em? Mahse, bath room tukverh tereuhte awm chu mihring luh theihna chi a ni lo phawt. Room lama tukverh awm chu an en dik leh a. Mahse, chhung lamah tha takin alo inkalh thlap bawk si.

An choka gas dahna chung zawnah chuan ventilation a awm a. Chu lah chu hawn ngai reng reng loh, bal ung khurh mai leh a chhung lama inkalh a ni bawk si.

Mihring tan pawn lam atanga luh ruk theihna pakhat mah a awm lo. Mahse, current lo on vek a, room kawngkhar hawng vektu chu an awm si. Tin, bath room a inbual pawh an awm ngei tih a chiang bawk a, mihring tana luhna awm bawk si lo chu a mak tih loh rual pawh a ni ta lo.

Nihnih a chhuk loh hnua a chhuk lehna hmasa ber a ni a. A chhuk hnuhnung ber tuma a sulhnu kha chu a ni thei tawh lo hrim hrim bawk si. Thlahrang kan tih hi alo awm tak tak em ni ang?

Ka thiannu chu bual pawh inbual ta lo chuan an vaiin an chho ta diak a. An chhuahsan dawnah engkim, tukverh leh room kawngkbar te, light te an en fel vek a. Tichuan tiril khur der der chung chuan kawng an kalh tha ta a.

Hetiang boruak an tawn avang hian fiah ngei hi ka tum ve thin a. Mahni chauha chhuk chang ka ngah a, light off vekin darkar khat te ka zuk awm thul. Mahse, ka vannei nge ka vanduai zawk, engmah an hlauh ang hi ka tawng ve thei si lova, anni lahin an tawng deuh reng mai bawk si a, a buaithla khawp mai.

Hemi hnu hian eng emaw chen chu a reh leh ta vang vang a, an bath room pawh ka zuk ensak fo a, thil danglam engmah ka hmu ve ngai lo. Mahse, zan khat chu a nute ina kan awm khawm laiin ka thiannu chuan thil a hre leh ta.

Pubg khelin ka thiannu pasal nen chuan kan tang dun hle a. Min biakna pawh chu ka aw e liam vel mai mai a ni ber. Chutih lai chuan ka thiannu chuan a fapa chu bual a tum mek a. A thawmhnaw te phelhsakin bath room a panpui a. Rei pawh an awm hma in ka thiannu chu a rawn rak ta chul mai a. "Rawn kal teh u hei a mak lutuk, kan inah awm an awm a nia." Tiin a rawn au vak mai a.

Chu veleh vaivawih aia rangin ka tlan nghal a. Ka hmanhmawh luatah ka phone ka thlauh zui lehnghal. Ka phone thlauh pawh chhar hman lovin bath room ah chuan ka toan lut rawk a. Midang pawh an rawn tlan khawm vat hlawm a.

Ka thiannu thawm hriat chu kan han ngaithla chiang a, inbe nawk nawk thawm chu kan hre thei a. Mahse, a fiah tlat lo. Thawm lo chhuahna chu bath room tui luan chhuahna a ni a. Ka thusawp sauh sauh a, tui luan chhuahna pipe bulah chuan beng si thlap hian ka han ngaithla chiang ta a. An thawm chu ka sawi thiam chiah lo.

Inhau thawm ka tih dawn chuan a chang leh an nui niin ka hre bawk a. An tawng chu a thum dut dut a, an sawi tak erawh hriat a har ngang mai. Tawlh rawh tawlh rawh ti niawm tak te a ni a. A chang leh thi suh tih ri niawm tak te a ni bawk a. A mak teh nuai khawp mai. Mahse, awm chu an awm ngei tih erawh a chiang.

Ka thiannu pasal chuan ngaihthlak ve alo chuh nasat avangin ka ngaihthlak tir ve a. A ngawih vung vung hnu chuan "Phuarbeh tur an ti" a rawn ti chhuak phawng mai a. Midang awm veho chu an ka hau hlawm mai, ngaihthlak an inchuh nasa ta mai.

Ka thiannu nu te bath room pipe atang hian ka thiannu te in chhunga tawng thawm hi a hriat theih thin hrim hrim a, tun hma pawhin an hre fo mai. An bath room pipe hi ngil takin ka thiannu te inah chuan a chhukthla a, tatang chuan thawm hi a inhriat pawh theih a ni.

Chutianga ka thiannu te thawm leh an tawng ri an hriat chang pawhin a nu te chhung chuan engah mah an ngai lem lova, thil mak leh hlauhawm pawh a ni hek lo. Mahse, tuna a makna ber chu tumah inhnuaia an awm loh laia inbe nawk nawk thawm awm tlat chu a ni. Hmun dang aniang han ti dawn ila, ka thiannu te in leh a nu te in zawng a ni mai bawk si a. A chung lamah emaw a hnuai zel lamah in a awm der mai si lo.

Kei chuan, "Khawi chabi, tikhan lo ngaithla ula ka zuk kal ang e." Ka ti a. Mak an ti hlawm kher mai. Ka thiannu chabi min pek keng chuan hmanhmawh takin ka thiannu te inah chuan ka tlan thla nghal a.

Kawngka ka han hawng a, light ka on nghal a. Bath room chu hawngin ka en hmasa ber a, engmah thil danglam a awm lo. Room ah ka lut leh a, engmah a awm chuang lo. Room chhak zawkah pawh engmah hmuh tur hlauhawm a awm chuang lo. A va ho ve maw le ka ti chhuak nuah nuah a.

Ka kal kual zung zung a, engmah thil danglam awm lo nana na chu a beidawn thlak viau mai. Engmah ka hmuh tak si lohah chuan room te chu ka kalh tha leh vek a, light ka off leh vek hnu chuan ka chhuak leh ta a.

Kawngkhar ka kalh a, muangchangin stepah ka chho chhat chhat a, hmun dang ka hawi kual vak vak bawk a. Chutia step ka chhuak tel, a tawp ber na ka rah rual chiah chuan ka kawngka kalh chu vawi leh khatah chhung lam atang chuan an rawn nam ri ta thuai mai a. Kei pawh chu ka phu ve dawrh mai nia.

Tunge tih leh tlan thlak ka rual a, kawngka kalhna chabi lah chu ka hmanhmawh luatah ka hawlh fu thei reng reng lo mai a. A thim si, uluk deuha tih ngai leh ka hmanhmawhna chu inmil lo tak a ni.

Ka hmanhmawh lutuk leh chabi hawlh fu thei lo chu ka insehruh teuh mai a. Chutia ka buai phili em em lai chuan ka thiannu pasal chu a rawn chhuk thla ve mek a, "Lo tlan teh lo tlan teh, i phone khan min lo en vat rawh." Tiin ka lo ko nghal vat a.

Phone light hmanga min lo en takah chuan kawngka chu kan hawng thei ta a. Mahse, a ngai ang bawkin engmah thil danglam hmuh tur a awm lova, hlauhawm hriat tur lah kan hmu zo hek lo. Beidawng bawkin kan chhuak leh ta nge nge a. Heta tang hi chuan ka thiannu te in hi a hrang chu a ni ber e ka ti rilru ve ta a ni.

- Dwm Pachuau