PHULOH LENMAWI

- C Lalthazuala

Columnist,

Exploremizoram.com

Tlangval, palian thelh thawlh, inkhaithli nalh tak, sambu tha tak, sam dum tha hlep hlawp bawk si, sam ngil tha tak, dar pharh hlai mawi tak chen vel suau a sam zuah, a sam zuah hi a va inhmeh tak em ti tu ngah tak, zai thian ropui Vanlalruati leh a u Vanhlupuii te telna Beat Group “The Vans”(Vanlalruati leh a u te pahnih, Vanhlupuii  leh Vanhmingliana telve na) a lead guiterist mawhphurhna la tu, mipui hmaa a inlan hnu a rimawi khawvel boruak mai baka a sakhmel ṭhat larpui tel zel, mizo rocker ropui Jeremy Zobiakvela sangawi zawnpui hlun, perhkhuang hrui thum perh thiam hmingthang, PB Liantluanga hla phuah ‘Pholoh Lenmawi’ tih hla zet hi chu a mawi zia sawifiah zo thei tur hian duhlian tawng hausakna leh rilna hian a tlin phak lo, a phawk phak lo a ni ber awm e. A thluk kal phung mawlte si hi a mawi em a ni.

Sarah Ralte

He Pawih bawihtlung tlangval hmelchhelo tak mai hi zorimawi chanchinah hian a bung pawimawh lai taka sawi tel zel a nihna chhan tur hi kawng hrang hrang in a awm a ni. Kum 1972 vel atanga hriat hlawh chho tan a ni ber ang. Zaithiam hmingthang Vanlalruati te unau te nena an Beat Group din ho ‘The Vans’ ah lead guiterist a nih hma pawhin, thianthate nen band angin an lo play ho tawh thin a. “The Vans” a a telve lai hi a hringnun kawnga a bung pawimawh lai leh amah ngei pawhin nuam a tih lai ber a nih a rin thu ‘The Vans’ a a perhkhuang thum perhtu, a nau (A chhang chhang leh chiah) PB Lianzama chuan a sawi. 

‘The Vans’ a tel hnuah Mizo Rocker ropui leh huhang ngah tak Jeremy Zobiakvela te nen ‘Creation Flame’ an din leh a, Creation Flame ah hian perhkhuang hrui thum a perh ta thung a, ‘Creation Flame’ an din kum hi Kum 1977 ah khan a ni a, a tel ve tawhna group hian state level beat contest ah lawmman pakhatna an hui deuh zel a ni. Kum 1979 kum tawp lamah Jeremy Zobiakvela te nen vek hian ‘Crimson Dust’ an din leh a, crimson Dust ah hian Chaltlang pum chhuak, guiterist ropui, hla phuah thiam leh hla thluk siam thiam hmingthang, Rohmingthanga (Rawa) chu lead guiterist a ni nghe nghe a, perhkhung hruithum a chang zui leh bawk.

Mizo chanchina, zirtirtu hmasa ber zinga tel ve Pu Chhunbura fapa hming koh Upa P Lalzuala chuan fa pasarih a nei a, mipa pathum leh hmeichhe pali an ni a, PB Liantluanga hi a upa ber dawttu niin, an unau zingah hian PB Lianzama leh PB Lianthangpuii(Tun a I&PR deputy director ni mek) phei hi chu tun thleng a rimawi lama rampum hriat hlawh an ni reng a, mizo hmeichhia te zingah hian PB Lianthangpuii anga Keyboard tum thiam lama hriat hlawh leh hming chher ,  CKṬP General conferenceah hial pawh a  keybordist tur a ruat  zing a tel  phak, Zaithiam bawk si hi an la awm lo tiin sawi ta ila dawt sawi kan nih loh hmel hle mai.

PB Liantluanga nau PB Lianzama hi a u PB Liantluanga te nen a play ho thin, unaua group khata lo che tla ho a, rimawi thlarau lo chang ho thin an ni a, a u PB Liantluanga pianpui mizia hrechiangtu tur  pawh a ni ve hrim hrim e.

PB Lianzama’n a u hla phuah chungchasng a sawi danah chuan, amah ngei pawh a la upat bik loh avanga a u hla phuahte, a hun laia a phuah ni leh kum te nen a lo chhinchhiah thlip thlep nachang a hriat bik loh thu sawiin, miten an hriat tlanglawn ve deuh, PB Liantluanga hla phuah te chu paruk vel an nih a rin thu leh miten an sak lar lem loh, tlangzarh lem loh hlaphuah eng zat chiah nge a neih a, a lo vawn that a hriat bik loh thu leh lo awm ta pawh nise hriat chhuah leh emaw, han hai chhuah leh emaw a har tawh tur thu a sawi a ni.

Rebecca Saimawii leh Vanlalhmangaihi te pawhin an sa nual bawk a, Radio kaltlang a ni emaw, audio album kaltlang a ni emaw, a hun lai na na na chuan PB Lianzama hla phuah, a hun laia zaithiam lar ten an sak hi an lar thei thin hle a, mipui nawlpui rilru hneh thei chi, mite rilrem zawng tak hla thluk siam thiam lamah ama thian te ngei, rimawi khawvela a sangawi zawnpuite fak a hlawh thei thin  hle a ni.

A nau PB Lianzama hi, PB Liantluanga’n Jeremy Zobiakvela te, eizawnna thil avang a a play pui hman tak loh hnuah pawh Bassist rawn ni chhoin, ‘Crimson Dust’ hunlai te phei kha chuan Mizoramah PB Lianzama aia Bassist hriat hlawh leh lar hi an awm bik lo. Tleirawl tirh te atanga zu in ngai lo, Crimson Dust vanglai vela, bass pertu lar, concert nikhua a, a thiante, a sangawizawnpuite, zu in pawh dawhthei taka nghak zel thin a ni a, a fakawm hle a ni.

PB Liantluanga hi hla phuah leh guiter play ah ringawt talent nei tha a ni lova, zai pawh a thiamin a aw a mawi hle niin, a sangawizawnpui thin, a thian hlui ten an sawi thin bawk a ni. Concert ni khua a hla hnih khat han sak ve zoh bak hi mipui hmaah a zai tam vak lova, zai lama han intihlar tumna a neih lem loh bakah, han inthehlar tum viau mai kha a pianpui mizia a nih loh thu a thian hnaivai tak pakhat chuan a sawi.

An pu, primary zirtirtu hmasa, missionary ho chher chhuah, Chhunbura atanga sakhaw mitak chhungkua an ni a, zai ngaina, inkhawm peih, chhungkua a tui tak a zai ho dal dal thin, kristian hlabu a sap hla lehlin thluk mawi tak tak hre tam leh sa hnem, zai ngaina thlah kal zel an nih avang a ni’ang e, an unau ho hi music kalphung an man hle mai a, a nau te pahnih PB Lianzama leh a farnu te zinga naupang ber PB Lianthangpuii phei hi chu tun thlengin ram pum huap rimawi lama puipunna ropui tak takah hmatheh ber ber an la ni ta fan reng a nih hi. PB Lianzama ngat phei hi chuan rimawi lama a talent tha tak mai hi rawngbawlna lam huang thlengin a hmang tangkai hle mai a, Dawrpui vengthar kohhran zaipawl, Pastor bial zaipawl, Central YMA Zaipawl, Dawrpui Vengthar Branch YMA Zaipawl ah te conductor lo ni tawh thin in, Rev. Vanlalnghaka rawngbawlna, Canada leh USA ah te zaipawl ang leh Quarted ang tein a lo tawiawm ve tawhin   heng  thilah te hian a lo  inhmangkual ve thin tawh bawk a ni. E!!!..tak ana!!.. ‘Pathian hmangaihna’ Gaither Vocal Band(GVB) ho hla mawi tak mai mizo tawnga letling tu hi PB Lianzama a ni a, sap hla pahnih ‘Hard & Soul’ tih leh ‘Rock N Roll’ tih hla a phuah bawk a ‘Rock N Roll’ tih hla chu Zonet Cable TV buatsaih ‘Justice for Christ’ beat contest endiktu te zinga a tan ve khan a mah ngeiin a sak nghe nghe kha, khami tuma a lo puibawmtu, guiterist Hmingpuia guiter play mawi zia mawlh mai kha kan hla hre hlawm ang chu. Hauhnar recording  neitu  Musician   Pu Chhuantea'n  khuang a lo khawn  nghe  nghe   kha.

Hla phuahtu ropui Vankham fate nen a, Beat Group te lo din ho tawh, hmun tam taka lo zai hova, hla te lo zir ho reng reng thin, Aizawl veng pakhat Dawrpui venga lo seilian ho ta chu, Vankhama hla thu ten PB Liantluanga hringnunah hian nghawng thuk tak a nei chu a ni phawt mai a, ‘Phuloh Lenmawi’ tih hla ah hian Pu Vankhama hlaphuah dan zia rang a lang thei tlat maia, a hla thu hman te leh a remkhawm dan kalphung hi Pu Vankham hla phuah dan kalphung nen a inhnaih hle a ni. A hla hrim hrimin ngaihno a beina laiah erawh Pu Vankhama aiin a sangin a thuk mah zawk hial niin a lang  han  ti  mai   i la  kan uar  lutuk palh ange. A thluk mawlh mai hi a amawi chung chuang em a lawm mawle!!!

He hla, lung ti run ngei ngawih tak mai hi Ni 17.3.1977 kum khan All India Radio Aizawlah Vanlalruati hian han thunin a thun ni la la, zan lamah tih chhuah (Broadcast) a ni a, AB - 95 leh CDM - 1312 ah vawn that tlat a ni a, Radio lam hotu te pawhin an roh hle a ni. 

Sial rangin Sial rang a hring tiin kan pi puten an lo sawi thin a, a lo dik nangiang mai le, PB Liantluanga fate, PB Lianhminga, PB Liansangzuala, PB Lianmawia (Ate-a) te hi zorimawi khawvela mite hriat hlawh, mahni tawka hmingchher thiau, niin, PB Lianmawia (Ate-a) hi Boomerang Vocalist niin,  Boomerang bandin india rampum huap pawh a an tawn san zia chu mitam takin kan hre ngei ang.VH1-ah hial an zai a awm ve a ni lawm ni? a u chiah PB Liansangzuala hi Magdalene Band member ni bawkin, an upa ber PB Lianhminga hi Albatross Keyboardist a ni bawk.

PB Liantluanga fate zinga upa ber PB Lianhminga ngat phei hi chu zo rimawi khawvelah hian a thawh hlawk hle a, Vanlalsailova lengzem audio album lar takte kha a kut chhuak anga sawi theih a ni hial mai. Kha album a hla pathum tih chauh loh chu PB Lianhminga music track siam vek an ni nghe nghe. BD-a hla phuah ‘Lungrun’ tih hla Elizabeth Zodinpuii sak music track kha a kutchhuak a ni bawk a, C. Sanga hla hi a music track siam deuh vek anni bawk. Liandingpuii audio album, mizo leh english te kha a kutchhuak deuh vek anni bawk a, Joseph Zaihmingthanga audio album ah te kutchhuak a ngah ber bawk a ni. HC Sanglura hla phuah, ‘A mak mang e’ tih hla Lalrindiki Khiangte leh Lalngengpuii tochhawng ten mawi taka an sak a, Lalrindik khiangte music track zawk hi PB Lianhminga kut chhuak a ni bawk. A thawh hlawk teh a sin mawle!!!!

Pi Vanlalruati

Hla hi, a thui leh thui loh lam emaw a chang tih sei duah lam emaw hi a lo ni ber lem lo a ni maithei, ‘Phuloh Lenmawi’ tih hla ngei pawh hi chang khat leh a thunawn chauh a ni a, mahse, a thluk leh a thuin rilru a hneh dan leh a fan dan hi a thuk deuh raih mai a, dangdai ve tak chu a ni chiang khawp mai!! He hla phuahtu PB Liantluanga leh a sa lartu zaithiam hmingthang Vanlalruati te hian famdairial chang tawh mahse zo rimawi chanchinah hian an hming hi a dai ngai lovang.

PB Lianhminga naute ho, a hma a kan sawi tak te- PB Liansangzuala hi Magdalene bassist a ni a, Atea hi Boomerang vocalist a ni a. PB Lianhminga te unau hrim hrim hi Zorimawi khawvelah hian mahni tawka hmingchher thiau vek an ni. An va chhuanawm em!

‘Phuloh Lenmawi’ tih hla mawi dangdai tak mai hi Late 70s leh Early 80s vela hla lar ber pawl a tling phak a, tun hnaiah, LPS  Youth Icon Star Hmingsanga’n a rawn sa thar ve leh bawk a, awle, a tawp khar nan ‘Phuloh Lenmawi’ tih hla thu lung ti run ngeih ngawih tak mai hi i han chhawp chhuak tel teh ang hmiang.

Phuloh Lenmawi

Phuahtu - PB Liantluanga

Satu - Vanlalruati,   Hmingsanga(Youth Icon top-3)

  Awmkhua a har dawn changin,

  Lunglai a dam thei si lo;

  Chungkhuanu ruata ka chan reng chu,

  I thinlai haltu mai ni maw.

  Tawnmang mawl mai thleng pawhin,

  Linglai a dam thei si lo;

  Min tiriang thlawn mai tur reng’an,

  Ka tawn che Phuloh Lenmawi.

 Awle mangtha ka thinlai khamtu ber,

 Mual chu liam rawh -

 I zun ngai hnuchhawnin;

 Ka nghilh lawng che aw Parte,

 Fam dairial chan thleng pawhin;

 Hei hi maw an sawi Di zun ngaih

 Tuar ka thiam lo Di lenmawi.