Fail ai chuan, entawn ve tawp mai ang...!

“Eng thil pawh ti dawn ila, lehkha thiam hmasak a tha” tih inzirtirna nena thiamna kan um suau suau lai hian taimakna leh thawhrimna phenah mihring nuna a 'Side B' lamin inrawlh an lo tum chho ve sek bawk a. Kan ram buaina bulpui nia kan sawi lai ber ‘corruption’ hian hmasawnna kailawna a pawimawh lai berah inrawlh tumin tan a lo la khawh ve ngar ngar tho si.

 

Mihring kan inang vek lo a, zirnaah kan rilru chak dan a inang lo. Thenkhat chu rilru chak tak, chhiar apiang chhinchhiah nghal zung zung chi an awm laiin, thenkhat chu an chhiar ri ngaithlatuten an lo vawn khalh theih khawpa rilru chak lo ve tak takte pawh kan ni nawk ang. Rilru chak loh leh thiam theih loh aia pawi ta ber zawk chu ‘exam hall-a entawn’ hi a ni.

‘Thawhrimna tel loa hlawhtlinna a tlo lo; thawhrim hi chawlhna nuam a ni' tih thute kan sawi ve fo a. Mahse, a dik tak tak a ni tih hi kan chik zui leh peih thin lo. Entawna pawl sawn (passed) hian certificate/qualification neih ve tawp loh chu hlawkna dang a nei tlem khawp a. A hlawk lohna erawh sawi tur a awm teuh thung. Mi tha tak tak tur kha mi rinawm loa chhuahtu leh an inrintawkna paih bosak a, chhungrila inrintawk lohna leh hlauhthawnna pai reng renga an nun zalenna laksaktu leh an hma hun tam tak tihchhiatsak thintu a ni, tih ngaihtuahna nen chuan entawn hi kan hmelma lian, zirlaite chuan a huata kan huat ngawih ngawih tur a ni.

I thian te aiin lehkha i thiam thei lo a ni mai thei, tlaivar vara zir chunga tlar hnih khat lek pawh vawng hlei thei lo khawpin i rilru a chak lo a ni mai thei. Pawi ti suh. Zam suh. Khawvelin mi thiam, mi hlawhtling tia a hriat tam takte hi nangmah ang bawka thiam thei lo leh rilru chak lo, i hmachhawn mek harsatna ang kha lo hneh tawhtute an ni a sin.

Kristian nih leh zirlai nih hlawkna emaw vanneihna emaw hi i lo ngaihtuah ve tawh thin em? Kan mangan leh rilru chak loh lai bera engkim tithei Pathian nung auh tur kan han nei bik tlat mai hi, khawvela hmelhriat tha neih ngawt ai chuan hlawk deuh mai a nia. Khawvelah Isua a len lai khan kan mamawh huna kan hman tangkai tur thilththeihna thuruk ropui deuh min hnuchhiah a. Chu chu ‘rinna thilththeihna’ a ni. “...antam mu fang khat ang rinna in neih chuan...in tan tih theih loh reng reng engmah a awm lo vang” (Mat 17:20) a ti a nih chu maw le.

Exam hall-ah i entawn avangin i thiamna neih tur zawng zawng leh i inrintawkna a bo vek thei. Chu ai chuan i thawhrimna leh he rinna (Pathian nung rinna ngei hi) hi han hmang kawp chhin zawk teh. I theihtawp i chhuah a, amahah i innghah tlat ber a hnu, chawngzawng pawh hawisan ngai lotu khan a kalsan  duh bik che i ring em ni? A hlawkna tel tam ber tur chu nangmah tho i ni.

Fuihna thusawi leh ziak thiam lar hmingthang tak Rev. Norman Vincent Peale-a, a thurawn zawmtu, natna in a eichhiat hmai vun chhe vek tawhte thlengin an  dampui leh company tla chhe tawhten an  dinchhuahpui thin khan, amah pantute apiang  deuh thaw  damdawi atana a lo chawh thin chu, he rinna tho hi a ni.

I lo entawn ve tawh thin a nih pawhin, hun kal tawh chu hun kal tawh ni rawh se. Hun zawng zawnga hlu ber leh kan hmalam hun atana tangkai ber chu ‘tun hun’ kan hman dan zel hi a ni. “Thiam thei lo hle mah ila, ka rilru chak lo hle mah se, ka theihtawp chhuahin ka zir ang a, Pathianin min pui ang a, tha takin ka pass dawn a ni” tih ngaihtuahna nen harsatna i hmachhawn tawh thin dan kha han thlak chhin la. A hlawkna teltu zingah lo tel ve rawh.

Thiam lohnate, hlawhchhamnate hi min hmangaih em avanga a fapa neihchhun meuh pawh kan tana thih tir phaltu khian kan tana a dah a ni lo a. Kan mamawh ang tawk thiamna leh hlawhtlinna min pek a chak zawk em em thin tih hria ila. Chu mi tur chuan thawhrimna leh amaha tluk luh erawh a phut ve thin...

“In zingah tu pawhin finna a zawn chuan, mi zawng zawng hnêna hau lo leh ui lova pe thin Pathian chu dil rawh se; chutichuan a hnênah pêk a ni ang. Nimahsela, ringhlel hauh lovin, rinna neiin dil rawh se” (Jakoba 1:6).

“I rin chuan Pathian ropuizia i hmu ang ka ti lo che em ni?” (Johana 11:40).