DETECTIVE JANE

THUHMA: Detective lam hi vawi 2 ka ziak tawh a, duhthu erawh a sam lo viau a. Mahse, chhiartu te lam aṭangin ziak leh tura ngenna ka dawng leh nual a. In sit tak chungin a ṭum 3 na turin ka rawn ziak leh dawn a, khawngaihin min lo chhiar chhuah sak leh hram turin ka rawn ngen leh che u a ni e. 

CHAPTER--1

BY:- Rs Thangluah

Zing dar 7:00am velah pawh Amy chu a la hnar ring khawp mai. Thingpui in pahin nitin chanchinbu chhuak Vanglai Phek chu ka bih leh ngur tawh a. A headlines-ah chuan hmeichhe tleirawl kum 16 mi rukbo thu a rawn chuang kalh mai a. Ka mit a la kher mai, uluk lutuka ka chhiar mek lai chuan Amy chuan ka hnung lam aṭangin min rawn zuan leh thut mai a. He nau tak hi chu aw, engtiklai mai pawh hian a thawveng em em ringawt mai a,"Lalthawveng, hei hna kan neih leh hmel,"tiin chanchin phek chu ka entir nghal a. Amy chu a ner nghal nung nung a,"Peihawm loh ṭhin ve aw,"a ti sup a. Ka nuih var var a,"Peih reng reng i nei ngai hleinem,"tih pah chuan ka thingpui chu ka lem leh khalh a. Amy chuan,"Sawmna kan dawng tawh em ni?,"a lo ti nghal vat a. Ngawi rengin kawngkhar lam ka melh ringawt a, Amy chuan a hrethiam nghal a. Rang lutukin kawngkhar lam panin a tlan phei nghal a, kawngkhar a hawng a gate lam panin a tlan phei leh nghal a. Gate pawna Letter Box chu a va hawng nghal a, a rawn hawi let a,"Yesss engmah a awm lo,"tih pah chuan a zuang vel awt awt a. A hnu rei vak lovah Dak pu a rawn thleng ta, Envelope an inpe lai chu ka en reng a. Amy zuang awt awt pawh a tawp chiang kher mai, Dak pu chu a kal leh nghal a. Amy chu phur lo zetin a rawn let phei leh a, veranda-ah chuan ngawi rengin ka lo nghak a.

"Envelope huat thla la tak a niin ka hria,"tih pah chuan min rawn pe nghal a. Tum deuh bur chungin choka lamah chuan a phei nghal nul nul a, a ri nghal rawk rawk mai a. Ka ngaihven zui duh lem lova, kan lehkha dawn chu ka phelh nghal sawk sawk a. Ka rin ang ngeiin Police Department lam aṭanga sawmna a ni, in ruk bo chungchanga thawhpui tura sawmna a ni. 

Hnu chhui tur mumal nei lova kan chawlhna pawh a rei ve ta, chuvang te pawh chu a ni ngei ang tuna min sawmna pawh hi hnial ka tum lo. Ka phûr em em zawk a ni, kidnapper chu man a chhaih kawlh leh vel ka châk leh et et tawh mai. Amy chuan,"Kan Lal Fapa hi kan team-ah a rawn tel ve dawn lo em ni?,"tih pah chuan min rawn melh a. Ka lo nui mai a, dik tak chuan Rsa hi chu dinhmun hlauhawma din tir ka rem ti tawh lo a ni. Mahse, a tel lo chuan tih theih kan nei tam leh awm si lova. Amy chuan ka hnarah min rawn pawh sak a,"I ngaihtuah chu ka hria lawm. Mahse, a tel lo chuan engmah kan ni dawn lo a nia,"a rawn ti leh a. Ni e, Amy pawh hian a sawi sual lo a ni,"Ka lo be dawn nia,"ka ti sap a, phûr erawh ka phûr teh chiam lo a ni. Amy pawh chuan min hrethiam a ni ngei ang, min rawn kuah a,"Ka hrethiam lutuk che a. Mahse,...,"a thusawi lai chu a tawp chawt a, a ṭap a ni tih ka hre thei nghal a. Roy a ngaihtuah a ni tih pawh ka hrethiam nghal mai,"Bawihte, ka tihpalh lutuk aw. Vawiinah kan 3 in Police Station lamah kan kal dawn nia,"tih pahin a mittui chu ka hru hul mawlh mawlh a. Ani pawh chuan min rawn nuih var var a, a lu a bu nghut nghut a,"Awle ka hrethiam e,"a lo ti ve nghal vat a.

Chawhnu dar 1:00pm ah chuan Aizawl Police Station chu kan thleng phei ta ngei a. Anni ho pawh chuan min lo lawm thiam khawp mai, Inspector Zohmaa chuan min lo chibai nghal vat a, in hmelhriat tirna te neiin kan thupuiah kan lut chho ta a.

Inspector Zohmaa chuan,"Awle, hei kan thupuiah lut dawn ila. Kan hriat ṭheuh angin hmeichhe tleirawl kum 16 mi rukbo a ni a. A rubo tu hian a chhungte bulah a engmah thil dil a la nei lova. Mahse, he hmeichhia hian kar 1 chiah hun a neih tawh thu erawh a chhungte bulah a sawi a ni. Nizan lamah kan theih ang tawkin hma kan la nghal a; mahse, hnuhma thar lam engmah hmuh kan la nei lova. Kemahni chauh chuan he thil hi kan chhui chhuak thei dawna kan rin loh vangin nangni hi kan rawn pun che u a ni,"tiin a sawi deuh duah a. Amy phei chu a lo muthlu hman pek a, a keah ka va pet a, a rawn phu deuh zuk a,"Aww nia a ṭha ka ti e, kei pawn ka pawm thlap e,"harh chiang mang hlei lo chuan a rawn ti thla ngawt pek a. Min van ti zak ṭhin êm! Rsa chuan,"Aaa nizan lamah a meng rei deuh a, in lo hrethiam mai dawn nia,"tiin a lo thup mawi vat a. Inspector Zohmaa chuan nui chungin,"Awle kan in hrethiam tlang zel mai a niang, eng pawh nise vawiin aṭangin hna hi ṭan nghal ila ka ti deuh a,"a ti leh a. Rsa chuan,"Ni e, a pawi hleinem,"a lo ti ve nghal vat a. Inspector Zohmaa chuan,"Awle, a hmasa berah hmeichhe rukbo te In lamah kan kal hmasa ber ang a. Zawh duh te in neih ka ring deuh a,"a rawn ti ve bawk a. Tichuan, constable 3 hruaiin hmeichhe rukbo te In lam pan chuan kan in zui chhuak ta a.

Ka rin aiin an chenna In chu a fâl zek a. Mahse, chhungkaw awmthei tak an ni tih erawh hai rual a ni lo. An compound chu a zauh mai bakah a rem em em mai bawk si, an In sirah chuan Garrage a awm a. Car 3 leh Bike 2 a lo in hung ṭhat a, an in compound vel cover tur chuan CCTV Camera an vuah vek chuan chhungkaw fimkhur tak an ni tih a ti lang chiang viau bawkin ka hria. An In pawh a lian in a ropui khawp mai; mahse, kidnapper hian sum leh pai engmah a dil lo hi mak ka ti. Nge a la dil lo zawk le? Eng pawh nise, zawhna ka zawt leh ṭeuh dawn a ni mai ni.

Nu ber ni awm tak chu a lo ṭap keuh keuh a. A bulah chuan a pasal ni awm tak chu a lo ṭhu ve bawk a. Midang hmel erawh hmuh tur a awm lo, kan hmel an hmu chu nui sângin min lo chhawn nghal a. Pa ber chuan,"In rawn lang chu thla a muang sawt mai, lo ṭhu rawh u,"tiin ṭhutna te chu min kawh hmuh nghal sawk sawk a. Inspector Zohmaa chuan,"Hei ani hi kan Detective chhuan vawr a ni a. Zawhna zawh duh che u a nei a, in fanu chungchang kha engmah zep ruk nei lovin a zawhna te min chhan sak dawn nia aw,"tiin thu a rawn ṭhet a. Pa ber chuan a lu buk nghat pahin,"Tehreng mai, i zawhna te chhang turin kan inpeih reng e,"a lo ti vat a. 

"In fanu hi rukbo a nih hma khan amah ah danglamna eng emaw a awm em? Entir nan, nidang aia hlim loh na te a nei em?,"tiin ka zawt nghal tawl a. A pa(Pu Ruata) chuan,"Chutiang engmah a awm âwm kan hre miah lo. A bo hma ni pawn an Class-a a chet chhiatna te min hrilh a, kan pafa in kan nui nasa a sin,"tiin min chhang a. 

"Nichuan, in fanu in an unauah a naupang lam nge a upa lam?,"tiin ka zawt leh a.

"A naupang ber a ni a, kan hmeichhe neihchhun a ni bawk a,"tiin min chhang leh a, an fanu chunga thil thleng vang chuan a rilru a na a ni tih chu hai rual a ni lo.

"Unaupa engzatnge a neih le?,"ka ti leh a.

"Unaupa 3 a nei a, 1 hi Hotel Management zirin phai lamah a awm a. 2 te hi chu kan bulah awmin, 1 hian class a la kal a, 1 hi Excise Department-ah a thawk ve a,"tiin zawh loh thleng thlengin min hrilh ta vek mai a, ka nuih a za ru ang reng phian a. 

"I fapa te 2 chu eng hunah nge an lo haw ṭhin tlangpui?"

"Class kal ber hi chu dar 4:00pm leh dar 5:30pm inkarah a lo haw tlangpui ṭhin a. Excise-a thawk hi chu rawn haw hun bi pawh a nei lem lo. Mahse, zan dar 7:00pm aia tlaiah a lo haw ngai lo,"tiin fel fai takin min chhang leh a. 

"In fanu hi nimin piahah rukbo a ni a. Engtinnge rukbo a ni tih hi in hriat dan? Chuan, engtik hunah nge a School bang a lo haw ṭhin?"

"Kan In hi a fâl deuh vang hian a chang chuan a û class kal nen hian an lo haw rual mai ṭhin a. Chutiang a nih loh chuan 2 wheeler taxi emaw taxi pangngai emaw in a lo haw mai ṭhin a. Tlai dar 4:00pm hma chuan In a rawn thleng ngei ngei tawh ṭhin a. Mahse, nimin tlai kha chuan tlai dar 5:00pm ah pawh a la rawn thleng si lova. A haw rualpui ber ṭhin a û lah a rawn haw daih tawh bawk si a. Dar 5:30pm thleng kan nghak a, a lo la thlen si loh takah chuan School lama an zirtirtu te leh a ṭhian ṭha te leh chhungkhat laina te ho kan be kual a. Mahse, tuman a chanchin hriat an nei si lo. Kan mang a ang ṭan tawh khawp mai, a nu lah a ṭap reng tawh bawk si. Tichuan, zan dar 6:00pm ah kan mangangin Police hnenah F.I.R kan theh lut ta a. F.I.R kan theh luh hnu rei vak lovah SMS in ka Phone-ah kan fanu chu kidnap a nih thu leh kar 1 chiah hun a neih thu min lo hrilh a. A bak chu engmah thu thar dang kan la hre lo,"a thusawi chhung chuan ngawi rengin ka en reng a. Thudik a sawiin ka hria,"I Phone chu ka lo en thei ang em?,"ka ti vat a. A ipte aṭang chuan a Phone chu a rawn phawrh a, min pe nghal a. SMS chu ka en a, a la type ṭha peih lo em em mai leh nghal a;

"In fanu cu k kuth a wm twh e,kar 1 cyah hun a nei twh a nya w."

"A number hi in chhui tawh em? Chuan, in call tawh em?,"tiin Inspector Zohmaa chu ka zawt a. Inspector Zohmaa chuan,"Aw kan hriat theih chinah chuan he number hi a thi tawh a. A book tu hming erawh Abdul Singh a ni, Abdul pawh hi kan be tawh a. Tunah hian Mumbai-ah a awm a, number hi ama hminga book a ni tih chu a sawi a. Mahse, aman a hman loh thu leh a hmangtu chu a unaupa a nih thu leh a unaupa chu thla hmasa lawk khan a boral tih a sawi bawk,"tiin an hriat ang ang chu min hrilh nghal a. Abdula chu biak ve ngei ka duh vangin naktukah Mumbai lama thlawh thlak chu ka tum ta a, Amy leh Rsa te chuan Aizawl lamah a theih ang angin an lo bawhzui ve bawk dawn a ni.

Inspector Zohmaa hnen aṭangin Abdula awmna leh biak pawh theihna tur number chu ka nei nghal a. A rang a rangin Mumbai lamah chuan ka thlawk thla nghal a, mumbai chu ka thleng thla har lo khawp mai. Abdula pawh chu ka be tlang thei nghal a, rin aiin a lo fel phian mai. A chenna Inah ngei ka hmu thei ta, ka rin aiin mizo ṭawng a lo thiam zek leh nghal a. 

"I unaupa chu engtikah nge a boral a?,"tiin bul ka ṭan nghal a. 

"Thla hmasa thla tir lamah khan amah chu boral a,"tiin min chhang vat a.

"I unaupa chu Mizoramah a awm ve ṭhin hrim hrim em?,"tiin ka zawt leh a.

"Aw keimah aichuan la awm tlem ang. Mahse, amah chu mizo ṭawng pawh tiam lutuk a,"tiin ka zawhna chu ṭha takin min chhang a. 

"I unaupa chu a la naupang viau a ni maw?"

"Aw amah chu keimahni unau zingah naupang ber lawm, amah chu kum 16."

"A nih tak chu a la naupang hle mai. A nihchuan Aizawlah chuan lehkha a zir tihna em ni?,"tiin ka zawt leh a.

"Aw keima pa kha Aizawlah hnathawk vangin Aizawlah khan kan awm a ngai a. Keimah nau chu Aizawla pawh  piang lawm, mizo ṭawng pawh amah chuan a tiam lutuk,"tih pah chuan a nui suk a. An banga mipa la naupan hmel tak thlalak chu min kawh hmuh a,"Keimah nau chu amah amah khi, amah chuan mizo hming pawh a nei a lawm  Lalrinpuia a ni a,"tiin a nau hming chu min hrilh leh a.

"Awle ka zawhna te ṭha takin min chhang a, a lawmawm lutuk a nia. Chuan, zawhna dang ka zawt leh zel dawn che a. Dawt tel lova min chhan zel ka duh a nia aw,"ka ti leh a. Abdula pawh chuan a lu a bu nghat nghat a,"Awle ka puih theihna che a nihchuan a pawi lo,"a lo ti nghal vat a.

"Mizoramah chuan engtia rei nge in awm tawh le?"

"Mizoramah chuan kum 30 chuang awm tawh ang. Keimah kum 5 ka nih laiin ka pa kha Mizoramah transfer a ni a, keimah hi tunah kum 35 na hmang mek a. Keimah nu leh pa te pawh tunah Aizawlah awm lawm, keimah chu hetah hnathawk a. Thla hmasa ṭang khan awm tawh lawm,"tiin kim chang takin ka zawhna chu min chhang a.

"Nihchuan, sim card kha engtikah nge in book?"

"Keimah nau khan Phone thar nei a, amah kha la naupang si a. Chuvang khan ID card la nei lova, amah khan Adhaar Card kha tibo bawk si a. Chuvang khan keimah ID hmangin amah number tur kha keimah in book sak lawm. Sim card book hun kha chu, nikum ah ni daih tawh a, keimah chuan chhinchhiah thei tawh lo lawm. Mahse, December tla chu niin ka sia,"tiin nui chungin min chhang a.

"Awle a lawmawm lutuk e, nangmah nu leh pa te chu Aizawl khawi vengah nge an awm le?,"tiin ka zawt leh a.

"Keimah nu leh pa te chu Aizawl ah chuan Zembuk ah awm lawm. Keimah pawh chawlh hunah chho leh ang. Keimahni kha Kristian ni a, keimah nau pawh Aizawlah phum lawm,"tiin Aizawl nuam a tih thu te chu a sawi ve suam suam a.

"Chuan, leh lawkin i nau chu khawi School-ah nge a kal? Class engzat nge?"

"Amah chu St. Pauls-ah kal a, class-XI zir lai khan amah chu thi a."

"A pawi hle mai, tun chiah ka zawt tawh ang che aw. I nau chu engtia boral nge a nih le? A la naupang bawk si a."

"Amah kha dam lo vak a, Doctor-in check a, cancer nia. Amah brain kha cancer a, keimahni khan hre chhuak tlai lutuk a. Keimah nau chu chhan hman lo lawm, thla 1 chiah keimahni khan enkawl hman lawm,"tiin mittui tling pamin a nau nat dan chu min hrilh a. Ka lainat ang reng khawp mai, a darah chuan ka vuan a,"Ka lawm lutuk e aw, engkim nangman hrilh vek a. Nakinah nangmah pawh kha be thut duh dawn che a, hei hi keimah number aw. Keimah chu Detective ni a, ka hming chu Jane a ni a,"tiin a nau number hmanga kidnapper in a thil tih dan te chu ka hrilh a. Abdula pawh chuan mak a ti ve ngang mai,"Keimah nau number chu keimah ngei khan paih daih lawm. Engtinnge misual khan a hman theih ang? Ka pi, a mak ve aw,"a ti ve bap bap a. Ni e, hei hi thil mak chu a ni. Abdula hian dawt min hrilh ka ring lova, hmeichhia hi lo kidnap ta tehreng pawh nise ama hminga book sim card hi chu a hmang duhin ka ring lo a ni. 

Mumbai-ah chuan ka awm rei lem lova, Abdula hnen aṭang chuan ka duh ang ka hre tawh bawk a. Aizawl lamah ka chho leh nghal vat a; mahse, Abdula chu zawhna zawh tur ka la nei nual mai. Chu erawh a tah tawl zelin ka zawt ang, tunah chuan he number hi tu in nge hmang tih hi kan chhui hmasak ber a ngai a ni.

Inspector Zohmaa hnenah chuan ka thu hriat ang ang chu ka hrilh nghal vek a. Ani pawh chuan hmeichhe rukbo chhungte hnen aṭangin thu thar a dawn thu min hrilh nghal bawk a. A rang a rangin Melody(hmeichhe rukbo) te In lam pan chuan kan in khalh chhuak leh nghal a. Rsa leh Amy erawh Zemabawk lama kal tura ka tih angin an kal ve nghal bawk a.

Kan kidnapper chuan Melody tlan chhuah na turin thil ngiat a nei ta ngei e. Melody nu leh pa chu an rilru a hah a ni tih hriat takin an cher dawk a, hmuh an nuam lo ang reng khawp mai. Vawiin chu Melody nuṭa te pawh an lo awm ve bawk a, an vai hian zawhna ka zawt vek dawn a ni. 

"Melody chhangtu chiah i nih ka ring ringawt a,"tiin tlangval la naupan ve hmel tak, a inthuam dan ena street boy ve deuh chu ka zawt a. A nui suk a,"Aw ni e, kan unau zinga mipa naupang ber ka ni bawk,"a ṭawngkam chu a chapo nghal âr mai a, ka tei thei ṭhak lo mai. Mahse, insûm ngaih hun lai a ni.

"Class i la kal em ang chu maw?,"a hmel pawh en lem lo chuan ka ti leh a.

"Aw kal e, B.A 3rd Semester,"min chhang tawi thiam tik tek hle mai.

"Class banah i nau nen in haw rual ṭhin a tiraw? Khawiah nge in in nghah ṭhin?,"tiin ka zawt leh a.

"Aw haw rual reng ṭhin chu kan ni lova. Mahse, kan haw rual hi a tam zawk ngei ang, Kulikawnah sawn min lo nghak mai zel a. Mahse, dar 3:30pm vela a lo awm hman loh hi chuan amahin a haw turah ka ngai mai ṭhin a. A nih chiah ṭhin reng bawk a, chutiang huna a lo awm loh chuan ka haw ve mai ṭhin,"tiin ṭha tak chuan min chhang ve leh mai a.

"Nihchuan, i nau a bo ni khan i nghak tho em?"

"Aw khami ni kha ka Bike tlan loh ni a nih vangin Bus in ka phei a. Kulikawn ka thlen phei chuan dar 3:45pm a ni tawh a, ka nau chu ka hmu tawh lova. Min hawsan a nih ringin ka haw veleh mai a; mahse, In ka thlen chuan ka nau chu a lo la haw si lo. Chuan, tun hi kan thleng ta a nih hi,"tiin zawhna chu ṭha takin min chhang a. 

"Awle ka zawhna te ṭha taka min chhan vangin ka lawm lutuk a nia. Chuan, in fanu kidnap tu chuan eng thil nge a rawn phût le?,"tiin Pu Ruata chu ka zawt leh a. Pu Ruata chuan a Phone chu min pe a, a SMS dawn chu min chhiar tir leh nghal a, kan kidnapper hi tu pawh chu nise a hawrawp a chhe hle a ni.

"In fanu h in la hmagyh a nih cuan, tun thla rl hma in 20lakhs nen in fanu h in rwn la cuak thy ag."

A rawn thawnthu number chu ka dial nghal ngawt pek a. Mahse, switch off a in ti tlat, eng ang pawn switch off nasa mah se ka chhui chhuak dawn a ni tawp mai a ni.