BHA-te nihna dik tak puangzar turin MPYCC in Mizoram sawrkar phut

Aizawl | September 13, 2019:  Bharat Hitaraksha Abhiyan (BHA) inti Indore, Madhya Pradesh behchhan NGO member mi 140 lai chuan kar kalta Inrinni September ni 7, 2019 khan Mizoram Chief Minister Office (CMO) tualah Bru raltlante dinhmun tha zawka Mizorama an kir leh theih nan 'Demonstration' an nei a. Heng hnamdang za chuang zet Bru thlavang hauhtute hi Hindu kulmuk, India ram Hindu rama siam tumtute Rashtriya Swayamsevak Sangh (RSS) nena inthlunzawm annih laiin Mizorama lo kal tura Inner Line Permit (ILP) an neih dan, an Memorandum thehluh, sponsor-tu leh an lo kalchhan hi sawrkar chuan a thup tlat a. Hei vang hian vawiinah Congress Thalai : Mizoram Pradesh Youth Congress Committee (MPYCC) chuan Chief Minister Office panin BHA te Memorandum thehluh enfiah tur leh an nihna hre turin an kal a, Mizoram sawrkar chuan Chief Minister Office gate-ah hian Police tam tak lo dahin luh an phal loa an lo dang a ni.

Hemi chungchanga MPYCC thuchhuak chu a hnuaiah hian dah e.

MPYCC _No. MPYCC/Mz-B/2019/PR-23    Dated Aizawl the 13th September, 2019_

PRESS RELEASE

HINDU PAWL MI ZA CHUANG PUNGKHAWM AN PHALNAAH MIZO THALAI CM OFFICE-AH KAL AN PHAL LO

BHA-te nihna dik tak puangzar turin Mizoram sawrkar kan phut

Bharat Hitaraksha Abhiyan (BHA) inti Indore, Madhya Pradesh behchhan NGO member mi 140 lai chuan kar kalta Inrinni September ni 7, 2019 khan Mizoram Chief Minister Office (CMO) tualah Bru raltlante dinhmun tha zawka Mizorama an kir leh theih nan 'Demonstration' an nei a. Heng hnamdang za chuang zet Bru thlavang hauhtute hi Hindu kulmuk, India ram Hindu rama siam tumtute Rashtriya Swayamsevak Sangh (RSS) nena inthlunzawm annih laiin Mizorama lo kal tura Inner Line Permit (ILP) an neih dan, an Memorandum thehluh, sponsor-tu leh an lo kalchhan hi sawrkar chuan a thup tlat a. Hei vang hian vawiinah Congress Thalai : Mizoram Pradesh Youth Congress Committee (MPYCC) chuan Chief Minister Office panin BHA te Memorandum thehluh enfiah tur leh an nihna hre turin an kal a, Mizoram sawrkar chuan Chief Minister Office gate-ah hian Police tam tak lo dahin luh an phal loa an lo dang a ni.

Congress Thalai President Dr. Lalmalsawma chuan Police-ten MPYCC te an lo danna hmunah hian thu sawiin, "Hemite (BHA) nihna dik tak puangzar tur hian sawrkar hi Congress Thalai chuan kan phut a ni. BHA te zalen taka lo luta CM office tuala an sapatal thei hi MNF sawrkar hian an hriatpui ngei a nih kan ring," tiin a sawi a. "September ni 6, 2019 khan Hindu kulmuk pawl hi Tripura atangin Kanhmun Police paltlangin Mizoram an rawn lut a, hei hi Mizoram sawrkar hian a hre lo thiang lo. BHA hian Mizoram sawrkar hnuaia District Magistrate hnenah an kal tur thu hi lehkhain an hrilh hre hmasa a, Ni 7-ah CM tualah duhtawkin lungawilohna an lantir thei a ni. Bru raltlante thlavang hauha Mizoram leilung fate duh loh dana thutlukna siamtir tumtute zalen taka an rawn kal laiin, kein kan ram, hnam leh sakhua himna tura hma la-a tharum thawh loa CM Office-a kal tumte min dang tlat thung hi a na kan ti a ni," Congress Thalai President chuan a ti

"BHA inti-te hian Tripura-a Bru refugee camp chu Mizoram an lo kal hmaa tlawhin Twitter hmangin India ram Prime Minister Narendra Modi hnenah chhe takin Mizo mipui min hek a. 'Pu Prime Minister, Mizoram Kristian te vanga tuartu Bru te dinhmun hi a rapthlak hle a ni, anmahni hi Hindu an ni, an dinhmun hi kan lo hriattir che,'  tiin an zinga mi Dharmadhikari Singh chuan Prime Minister a hrilh hria a. Mizo te hekin Bru Hindu te dinhmun chhiat thu hi Prime Minister hnenah hian vawi tam an thlena Tripura Governor pawh an hmuh thu leh Mizoram Chief Minister hnenah Memorandum an thehluh thu Social Media kaltlangin an puangzar," tiin Mizo Kristian-ten Bru Hindu te dinhmun rapthlak takah an dintir tih ang zawngin sawrkar laipui lamah a sakhua angin an zualko a ni tiin MPYCC President chuan a sawi. "Nationalism sawitu MNF party hian BJP an thawhpui tak avang hian Mizorama thleng ngai lo RSS te kaihhnawih an rawn huangtau ta a, BJP laka dawl zawra zawr MNF hian Zophai ramri chungchangah pawh engmah an ti thei ta lo a ni," Congress Thalai President chuan a ti.

Hetiang taka Bru thlavang hauha Mizo mipui min hek chhiaa sawrkar laipui hnena thlentute hi an nihna dik tak hriatchian tuma Congress thalaiin hma a lakna chu a hlawhchham a, Sawrkar hian Hindu kulmuk lo kal te nihna hi a thup tlat a, sawrkar laipui leh Mizoram state inthlana MNF-in BJP a thawhpui vangin Hindu kulmuk lo kalte hi Sawrkar hian a hum ta mai em ni tih kan zawt a ni.

RSS naute nia ngaih BHA pawl nia inchhalte Hindu rual hian Tripura Refugee Camp-a awm mek Bru chhungkaw 500 lai chu Mizorama hmunkhata khawsa turin an nawr pui a, ram sahthlak an ngiat sak bawk. Mizoram sawrkarin hun rei tak chhung Bru raltlante an kir lehna tur felfai tak a duan laia hetianga Madhya Pradesh lam Hindu rualtena Bru raltlante Hindu an nih vanga Mizoram sawrkar ruahmanna palzuta Bru raltlante duh dan dana Mizorama kir lehtir an tum hi dodal turin Mizoram mipui zawng zawng Congress Thalai chuan a sawm.

Pathian leh kan ram tan titute sawrkarna hnuaia Mizorama kan hotupa ber CM office tualah ngei MNF te thawhpui BJP mi leh sate ngampa taka an rawn chetla ta mai khan MNF te leh BJP te hi nghet takin an inphiarzawm zia a tarlang. Hetiang thil la thleng ngai lo kan CM tualzawla Hindu pawl member tam takin lungawilohna an lantir ngam hi MNF sawrkar hnuaiah hian ram leh hnam a him loh zia a lantir a ni.

Sd/-

(ZOHMINGTHANGA TLAU)

General Secretary

MPYCC