Aizawl-ah Florist Fair

Aizawl | September 18, 2019:  Mizoram Florists’ Association (MFA)buatsaih, Ni 4 awh tur Florists’ Fair, 2019 chu nimin khan Aijal Club Park, Aizawl-ah Agriculture Department Minister C Lalrinsanga chuan a hawng.

Agriculture Department Minister Pu C.Lalrinsanga chuan pangpar khawi eizawn nana hmang ten Florists’ Fair, 2019 chu a hlawkthei ang bera an hman theihnan tlawhtu leh leitu (buyers) an ngah a ngai a ni, a ti a. Pangpar te hi chi hrang hrang awmin, in leh a chehvel ti mawi tu leh cheimawitu an ni a, in leh lo cheimawina chauh nilo a, Mizoram Florists’ Association thahnem ngaihna avangin mi tamtakin eizawnna tak taka pangpar chin an hmang chho chu ram inrelbawlna leh economy tan a tha a ni, tiin a sawi a. Minister chuan Sawrkar pawhin pangpar chingtute hamthatna tur a ngai pawimawh a, inphochhuahna tha zawk leh office an neih theihnan hmalak a ni, tiin a sawi a. Minister Pu C.Lalrinsanga chuan Mizoram pangpar (indigenous species) te hi hmun dangah leh rampawnah pawh thawn chhuah theiha ching hnem leh kan ram pangparte hi hlut leh zual zawkturin leh ram pawn atanga lak te chu environment tan pawh a thatloh zawkna a tam avangin fimkhur lehzual turin MFA member te chu a chah a ni.

Mizoram Florists’ Association hi November Ni 16, 1997 a din a ni a, member 1000 chuang awmin, a tam zawk chu hmeichhia an ni. Florists’ Fair, 2019 hi tun kum atan a vawikhatna a ni a, kum dangah chuan vawi 2 emaw vawi 3 emaw fair hi buatsaih thin a ni. Tunkum fair-ah hian inphochhuak mi 106 an awm a, pangpar chi hrang hrang 60 chuang zawrh a ni a. Pangpar pot a khawi chi te, pangpar enkawl nana lei tha leh thlai than tir thei (floweing hormones) te pawh zawrh a ni. Inphochhuak zingah Kum 85 a upa Pi C.Thanzuali, Mission Venglai chu upa ber a ni.

- DIPR