Northeast Futsal League a Mizoram aiawh tur Mizo Falcons Jersey tlangzarh; Mizo tlawmngaihna leh huaisenna lantir zel ang che u - Lalrintluanga Sailo

Aizawl | August 20, 2019:  Northeast Futsal League 2019 a Mizoram state aiawhtu tur Mizo Falcons league chu nizan khan Grand hotel, Aizawl-ah Mizoram Govt Deputy chief whip Lalrintluanga Sailo in a tlangzarh.

 

Tlangzarh zawhin Deputy chief whip Lalrintluanga Sailo chuan thusawiin, Player-te chu tihhram hramna nun nei tur leh Mizo leh Mizoram aiawh tur annni tih inhria a, Mizo tlawmngaihna leh huaisenna lantir zel turin a chah a. Engkimah a hmasa pawl leh a hmahruaitu nih tum turin a chah bawk.

Thu a sawi rual hian Deputy chief whip Lalrintluanga Sailo chuan Mizoram aiawh tur Mizo Falcons te tan Mizoram House ah thlenna buatsaih sak an nih tur thu a sawi nghal bawk.

"Sawrkar chuan nasa takin Mizote game ngainat hi chawi kan a tum mek a, inkhelhna court changtlung zawk siam turin sawrkar hi a insang mar mek a ni," tiin futsal hmakhua a en thu a sawi lang bawk.

Thusawitu dang Mizo Falcons Chief Patron Er. R. Lalrinkima chuan futsal-a mixed-gender league/tournament chu thil thar a nih loh thu sawiin, "Red Bull Neymar Jr. 5 lamah te pawh mipa leh hmeichhe khel kawp kan lo hmu tawh thin a, he game-ah hian hmeichhia hian mipa phak lohna an nei bik lo tih kan hre tawh a ni. He league-in chuti ang concept a hmang tur hi thil tha tak a ni," a ti.

 

Mizo Falcons ah hian Mizo players bakah ram dang players pahnih, mipa pakhat leh hmeichhe pakhat an awm dawn a ni.

Mizo Falcons Final Squad:

1. R. Zothanmawia (GK), Leitan

2. C. Lalruatsanga, Chawlhmun

3. C. Lalrinsanga, Leitan

4. Alan Lalhriatpuia, Armed Veng

5. P. C. Lalhruaitluanga, Leitan

6. Lalawmpuia, Ramhlun Venglai

7. Jenny V. L. Hmangaihsangi, Darlawn/ I.T.I

8. Elizabeth Vanlalmawii, Farkawn/ Chhinga Vengthlang

Coach: Zosangliana Khawlhring

Manager: Lalmuanawma

Tin, Falcons chuan he launch event-ah hian an club captain leh an foreign player-te an puangzar nghal bawk. Club chuan captain atan Lalawmpuia, Ramhlun Venglai chu ruatin vice captain atan Zothanmawia (Mathana), Leitan, Futsal League One khelh zawh taka Best Goalkeeper chu an ruat bawk.

  

Tin, Falcons hian an foreigners sign thar pahnih - Michael Okwudili (Nigeria) leh Jessica Pastor Carreno (Spain) te chu kal khawmte hriat turin an puangzar bawk a. Foreign player-te hian Guwahati-ah team hi an rawn zawm ang. 

Mizo Falcons hian Guwahati khawpuia August ni 25 atanga khelh tan tur league-ah hian jersey pawl (home) leh a var (away) an ha dawn a, an jersey hi Vamos-in an sponsor a ni nghe nghe. Tin, hei bakah hian an offshirt pholang nghalin, hei hi Younix-in an sponsor a ni thung a,  Explore Mizoram chu Mizo Falcons Media Partner a ni bawk.

Mizo Falcons te hian August ni 21 khian Mizoram chhuahsanin Guwahati an pan dawn a, August ni 26 tlaiah an match hmasa berah Manipur club an hmachhawn nghal dawn a ni.


Inkhelte hi Youtube leh Facebook lamah live streaming in a en theih dawn a, tin, LPS Vision lamah Live-in a en theih bawk ang.