MZP Sub - Headquarters Phuldungsei-in Zirlai tiṭha chawimawi; Chakmate hian min (Mizote) chimral dawn lo - Govt Deputy Chief Whip Lalrintluanga Sailo

Aizawl | August 8, 2019: Mizo Zirlai Pawl (MZP) Sub - Headquarters Phuldungsei chuan vawiin khan Phuldungsei Community Hall, Phuldungsei-ah Zirlai titha chawimawina hun an hmang a, Mizoam Govt Deputy Chief Whip leh Bialtu MLA ni bawk Lalrintluanga Sailo chuan khuallian niin hun a hmanpui.

He hunah hian zirlai hlawhtlinna chang mi 18; MA- 1, B.A - 8, HSSLC - 3 leh HSLC - 6 an chawimawi.

Khualian Lalrintluanga Sailo chuan thusawiin, "MZP hian Chakma chungchanga a ngaihdan hi a thlak a hun tawh." a ti a. "Dampa biala Chakmate hian Foreigner an duh bik lo." tiin dan anga ṭha taka kan inenkawl a hun tawh thu sawiin, "MNF leh India inremna Peace accord ah  Minority an dinhmun diktak pek an nih tur thu a lo inziak tawh" thu a sawi tel bawk.

Khualian chuan sawi chhunzawmin, "Chakmate hian min (Mizote) chimral dawn lo"  a ti bawk.

Zirna hi kawng tinrenga hmasawnna atana hman tur a ni a. Phuldungsei khua leh Dampa bial kawng chhe reng chu kum khat chhunga siamṭhat a nih tur thu a sawi a. 

Ding leh vei pawh thliar hrang thiam lo khawpa retheihnain a bawihbeh tawh te hi SEDP hmangin mahni intodelh tura din che u hi sawrkar thiltum ber a ni a. Heng hmasawnna thlen tur hian min ringhlel lova min lo thawhpui zel turin ka sawm che u a ni, a ti bawk a.

Ram leh hnam, kohhran leh khawtlang a hruaitute  chu kan rawngbawlsakte tana dawr phak leh biak phak ni turin kan inphah hniam a pawimawh a ni a ti bawk.

Thusawitu dang MZP general headquarters president L Ramdinliana Renthlei chuan, "Mizo ram leh hnam leh Zirlaite ṭhatna tur a nih chuan MZP hian huang lo a nei lova, kuang lo a nei hek lo." a ti a.

MZP hian Chakmate hi nek fo lo ilang chuan nuaih thum an chuang tawh ang a ti.

Technical entrance chungchang-ah Mizoram sawrkar in huaisen taka Zo ethnic chauh indigenious ah leh Category 1 a awm tura a puan vangin Chakmate chuan Category II an form an fillup mai. Eng angin Court in thu pe mahse, a ram leilung fate tan a nih chuan a zawm lo ngam tur a ni.

Zirlaite ah inelna thianghlim awm se kan duh vanga MZP hian zirlai tiṭha hi chawimawi ṭhin kan ni. Mi dang inel tur a ni a, in thei ve a ni tih hi in hriat a pawimawh. Nu leh pa leh Pathian thu awih chungin  in beih a ngai, a ti bawk.

Mahni nihna kan zahpui tur a ni lo. Mizo kan ni a, Mizo nih hi kan zak tur a ni lo. Keimahni hi i inzahpui lo ang u. 'Zo' kan tih hi changkang sawi nan i hmang tawh ang u., tiin a chah a.

Mizo tualzal nunah tlawmngai pawl, Kohhran leh khawtlangah inhmanna tur a tam em em a. Mahse, Zirlaite u, kan ram leh hnam tana kan indona hi tharum a indona a ni lova finna a indona a ni. Zirlai in nih chhung chuan kohhran, khawtlangah te lo inhmang lutuk lo ula, in zirlai kha ṭha takin lo zir ula, IAS, MCS leh  dinhmun sang taka in awm hunah kan ram leh hnam hian a mamawh zawk che u tih hi in hriat a pawimawh a ni a ti bawk.

He hun hi MZP Sub - Headquarters Phuldungsei president C Lalmalsawma chuan kaihruaiin, Phuldungsei bialtu Pastor  Rev K Lalchunglura chuan hunserh a hmang a.


He hunah hian Zaitei Ralte leh Sangkimi Khiangte ten zaiin mipui an awi bawk.