Mizoram College zingah T Romana College in Hnam lam thiam ber: pipu nunmawi chhawm nung tura Mizo thalai inpe tam tak an awm hi a lawmawm - R Lalzirliana

Aizawl | August 30, 2019: Mizo Zirlai Pawl buatsaih Inter-College Cultural Dance Competition chu vawiin khan Zarkawt Recreation Centre, Aizawl-ah neih a ni a. Govt T Romana College chu hnam lam intihsiak-ah  hian pakhatna an ni. He hun hi Art and Culture minister R Lalzirliana chuan khuallian niin  a hmanpui a, Art and Culture director R Hmingthanzuala chu khual zahawm a ni.

MZP buatsaih Inter-College Cultural Dance Competition-ah hian College 9; Government Champhai College, Government Serchhip College, Government Lawngtlai College, Government T.Romana College, Government Aizawl College, Government Aizawl West College, Government Aizawl North College Pachhunga University College leh Mizoram University te an ni tel a. Lawmman pakhatna dawngtu chu Government T Romana College an ni a, pahnihna chu Mizoram University niin pathumna chu Pachhunga University College an ni a. College dang parukte hian participation prize an dawng theuh a ni. 

Khuallian R Lalzirliana chuan thusawiin, pipu nunmawi chhawm nung tura Mizo thalai inpe tam tak an awm chu a lawmawm takzet a ni tiin kan hnam hi a tha zawnga khawvela lar zel turin kan kal chho mup mup a ni, a ti. Pu R.Lalzirliana chuan MZP ten remhre taka college zirlai te zingah hnam lam intihsiak hlawhtling tak an buatsaih chu tha a ti a, thalaite rilruah hnam hmangaihna thinlung tuha, Mizo nunmawi chhawm nun zel chu kan zavaia mawhphurhna a ni, a ti. Minister chuan Mizo kan nihnaah kan chiang tur a ni tia kalkhawmte fuihin hnam hrang hrang ni lovin Mizo hnamah hian “chi” hrang hrang kan awm a, chi bing rilru pu lovin Mizo kan nihnaah insuihkhawm turin a chah a.  India ram chauh ni lo ram pawn thleng pawha Mizo culture thehlar dan ngaihtuah tul a tih thu a sawiin hma an la zel dawn a ni, a ti a.  Art and Culture Department-a thawktute thawhrimna pawh fakawm a tih thu saiwin  kan hnam nunmawi vawnhim leh kal chhoh zelna tura hnar kaitu ber an ni, a ti bawk.

Art & Culture Director Pu R.Hmingthanzuala pawhin thu sawiin Mizote hian kan hnam leh culture kan vawn nun a ngai a, kan ram leh hnam humhalh a, hnam nun zemzawi chawi nung tur chuan Zofate zawng zawng hian mawh kan phur a ni, a ti. Director chuan Mizo puan panga - tawlhlohpuan, puanchei, pawndum, ngotekherh leh hmaram te chu dan ang thlapa Mizote ta a nihna, Geographical Indication Registry, Chennai-ah tih fel a ni tawh tih a sawi a. He hmalakna a hlawhtlin theih na tura tha thawhtu zawng zawng chungah lawmthu sawiin Mizo puan panga GI Registration tihfel a lo ni ta hi ram leh hnam tana pawimawh leh chhinchhiahtlak a ni, a ti.

Thusawi dang MZP President L Ramdinliana chuan, "MZP-in Cultural Dance competition a siam chhan chu lam intihsiakna ngawr ngawr a ni lo a. Kan hnam ziarang leh kan culture humhalh hi a tum a ni. Zofate hi tawng avanga unau kan ni lo a, thisen avanga unau kan ni a, zirna in hrang hrangah kan tawng hman a lo in ang lo deuh a nih pawhin innuih sawhna ang te awm lo a, Zo hnahthlak zawng zawngte hi unau chhul khatkual kan ni tih thangtharte leh zirlaite hian kan hriat a ngai a ni," a ti.


MZP Inter College Cultural Dance Competition-a telte hi lam chi hnih, Sarlamkai leh Cheraw(Buhza aih) hmangin an intihsiak a, a pumpuiah Govt. T. Romana College chu pakhatna an ni a. 
Mizoram University chu pahnihna niin
 Pachhunga University College chu pathumna an ni.

Pakhatna hian, lawmman, Rs. 20000/- , Trophy + Certificate + Citation 

Pahnihna hian, lawmman Rs. 15000/- Trophy + Certificate + Citation 

Pathumna hian, lawmman Rs. 10000/- Trophy + Certificate + Citation an dawng a.

Intihsiaknaa tel zawng zawngin Rs. 2000/- theuh an dawn bakah. Aizawl pawn atanga lo kalte hian Rs.10000/- theuh an dawng vek a ni.

Thlalak dang hetah a awm e.