Citizenship Amendment Bill 2016

- Lalhmachhuana,

 General Secretary,

Central YMA.

Statement of object and Reasons:

Citizenship Amendment Bill 2016, khatih laia Union Home Minister Shri Rajnat Singh-an15th July 2016-a Lok Sabha a pharh kha a ni a. He Bill lo pianchhuah dan leh a tum te a sawifiah dan ah chuan, Citizenship Act 1955 siamtha a, Minority Community, Hindu, Sikh, Bhudish, Jains, Persis leh Christian, “Afghanistan, Bangladesh leh Pakistan atanga Dan hmang emaw, hmang lo emaw a India rama lo lut an awm theih hunchhung tawp tawhte, Dan anga Indian Citizensip an neih thehna tur Bill a ni. India mi leh sa ni ve si, India khua leh tui an nihna Prove of Document phawrh tur nei ve silo ten khua leh tui ni ve tura an dil theihna kawng awm chhun ‘By Natulisation’ hi Kum-11 lai India ramah an lo khawsak tawh a ngai si a, chungte tana a lo awlsam zawk theih nan Kum-11 ni thin hi Kum-6 a tih hniam pawh he Bill hian a tum a ni. Tin, Overseas India Citizens ten India dan an bawhchhiat a an registration cancel theihna tur dan la awm lo pawh, he bill ah hian telh tum a ni a lo ti a ni. Hengte hian CAB-16 thil tum leh sawrkarin he Bill a put luh chhan te chu a sawi chiang viau mai a. Hnam tlem zawk leh ramri hnaih a awmte tan a him leh him loh chu sawizau leh ngai tur thil a ni.

CAB-16 chu eng nge: 

A tawi thei ang ber chuan CAB-16 chu Citizenship Act 1955 siamthat tumna a ni. Citizenship Act 1955 hian India khua leh tui nih theihna dang hrang hrang a siam a, 1986, 1992,2003, 2005 leh 2015 te khan lo amend tawh a ni a, India khua leh tui nih theihna Dan awmsa mek te chu-

1. By Birth

2. By Descent

3. By Registration

4. By Naturalisation

5. By Incorpoation of Territory te an ni a.

Dan lova India rama awm te chu Illegal migrants an ni mai a, an chungah hremna lek theih a ni. Dan awmsa anga India rama Khua leh Tui ni tura India rama pem lut ten an dil theihna hi a khirh in a kum bithliah pawh a rei em em a. CAB-16 hian a tum ber ni a lang ta chu, India ram thenawm hnai, Pakistan, Bangladesh, Afghanistan atanga Muslim nilo Hindu, Sikhs, Jains, Persis, Christian te ngaihna thiamna zau tak pek a India khua leh tui a dan hnuaia an awm ve theihna tur a Citizenship Act 1955 siamthat tumna a ni ber.

CAB - 16 bul intan dan:

Kum 2014 a India ram Lok Sabha inthlan dawn khan BJP chuan chak ngei tumin hma an la a, CAB - 16 hi tihhlawhtlin tumin campaign-naah pawh an chhawp chhuak a, Manifesto zingah an telh a, India ram thenawm hnai Muslim tamna rama Hindu leh sakhaw dang tenau zawk ten India rama pem luh an duhin lo kuangkuah an tum thu sawi a ni a, sawrkarna an han chang ta a, 7th September, 2015 leh 18th July, 2016-ah Notification tichhuakin, Hindu leh sakhaw tenau dang (Minority) Afghanistan, Bangladesh leh Pakistan atanga India a lutte chu Foreigner Act 1946 leh Passport Act 1920 atanga ngaihnathiam an ni ta a. Ni 31st December, 2014 leh a hmalama India a lut tawhte chu Illegal Migrant a chhiar an ni ta lo a ni. Chung mite chu dan anga India Citizen an nih theihna turin CAB - 16 hi 15th July, 2016 khan Lok Sabha-ah put luh a ni ta a, pass mai lovin Joint Parliamentary Committee (JPC) zirchian turin 12th August, 2016 khan dah a ni a, JPC chuan 7th January, 2019-ah report thehlutin Lok Sabha chuan 8th January, 2019 khan CAB - 16 chu a passed ta mai a ni. Dan angin Rajya Sabha-ah sawiho ve leh a ni a, amaherawchu, duh lo tu an tamin buaina neuh neuh a awm tak avangin 12th February, 2019 khan Rajya Sabha chuan sawizui tawh lovin a ti tawp ta rih a ni.

CAB-16 duh lohna - All NGO & All Party Mizoram hmalakna te:

1. 4th Sept 2017 - JPC ah Representation all NGO and All Political Party hming a thehluh a ni. 

2. 16th Oct 2017 - Mizoram tlawh ve turin JPC ah ngenna siam a ni.

3. 16th Dec 2017 - Prome Minister, Narendra Modi Mizoram a okal turmin Memorandum, All NGO hmingin thehluh a ni.

5. 23rd Nov. 2018 - Prime Minister, Narendra Modi, Mizoram a Inthlan Campaign a a lokal tumin All NGO hminga sawipui leh a ni.

Heng bakah hian a taka chechhuahna hetiang in:

1. 24 Jan, 2018 khan Aizawl khawpui bakah Mizoram hmun hrang hrangah zirlai ten kawng zawhin CAB - 16 duh lohna lan tir a ni a, he hunah hian Hello CHINA, Bye Bye INDIA tih Placard lek an tam hle. India hruaitute lakah kan beidawn zia kan lan tir mai awm e.

2. 26 Jan, 2018 khan All NGO hmingin Republic Day Boycott a ni.

 

CAB 16 Mizoram tana a himlohna leh a hlauhawmnate:

1. Illegal Migrants te hi Foreigner Act 1946 leh Passport Entry Act 1920 chuan, Lungin a khung emaw, thawn let emaw tur a a sawi laiin CAB-16 chuan dan hnuaiah Citizenship nih tir a tum thung.

2. CAB-16 hi Hindu sakhua zuitute India rama inhumhimna pek tumna lam hawi a ni ber a. Sakhaw dangte hi sawi lang ve bawk mahse, heng ram tarlan pathum (3) atang hian tih tham an awm lo ang.

3. CAB - 16 leh ILP : Mi thenkhat chuan CAB - 16 hi pass mahse, ILP hmangin a inhumhim theih ang ti zawnga sawi an awm a, CAB - 16 hi pass a nih chuan, Mizoramin kan buaipui ber tur chu Bangladesh atanga lo lut tur Chakma leh Hajongte hi an ni ang. Mizorama Chakma awm sate hi Scheduled Tribe an nih ve avangin, ILP chuan min chhan theih hauh lovang. ILP chuan Non Tribal chiah a dang thei a ni. Tin, Tuikuk Bangladesh atanga dan lova lo lutte pawh CAB - 16 hian a ngaihnathiam vek dawn avangin Mizote tan chuan Bill Sakei a ni ringawt mai.

4. Bangladesh nen 318km vel ramri inri na kan nei a. Bangladesh (C.H.T) atang

hian Chakma, Buddhist engemaw zatin remchangah la in an lo luh belh ngei

ang.

5. Ram leilungfa ten kan chanvo tunah pawh min chuhpui a, min chanpui mek lai hian a aia tamin min la chuhpui belh ang.

6. Ram a piang lova mihring kan pung thung, CAB-16 avangin ram luahtu/min luahpuitu an pung ang.

7. Tawng leh Culture-a inchimralna zawi zawiin a thlen phah thei bawk. CAB-16 hi dik tawk lohna leh sawisel theihna tur a ngaih te :

1. Assam rama pawl tam takin an dodal a, a chhan ber ni a lang chu CAB leh Assam Accord te inrem loh vang a ni. Assam Accord ah chuan 25th March 1971 hnu lama Assama lut te chu illegal migrants an ni ang a ti a, CAB-16 chuan 31st Dec 2014 chin kha khua leh tuiah a pawm thei dawn a ni.

2. A bik takin North East-ah chuan pem lut hi Bangladesh atangin an tam hle tura ngaih a ni a. Tun ah hian India ramah mi nuai 150 vel Dan lova pem lut an awmin Kum tin Nuai 3 vel an pem luh belh angin chhut a ni a, heng hi a tam zawk chu North East ah hian an awm nia ngaih a ni. Heng Dan lova pem luttte khua leh tui nih tir hian a awm sate an nek buai ngei ang.

3. CAB hian ram pathum (3) atanga Communities 6 te chauh a humhim dawn a, hei hian Indian Secularism a palzut thei dawn a ni. Tin, India Danpui Article 14 na Right to Eguality tih pawh a palzut ang a, duhsak bik neihna dan siam hi a him lo hle.

4. CAB-16 hian Migrants ti a a dah te chu ‘Sakhaw thlan bik Minority “Religious People” te an ni a. Amaherawh chu Migrants an tih ho chu, ‘Ei leh bar hmasawn duhna avanga pemte’ an ni a, sakhaw thil emaw, hlauh neih emaw avanga pemte chu refugee an ni a, CAB-16 hian Refugee leh Migrants hi a thliar hrang vak lo a nih hmel.

5. Sri Lanka, China leh Myanmar vela sakhaw dangte pawhin inhumhimna an

mamawh ve em em lai in, heng hote hi he Bill-hian a huap leh silo.

( He thuziak hi MZP buatsaih a MIZORAM STATE INHUNGBIKNA/INHUMHIMNA ZIRCHIANNA PROGRAMME  August 12, 2019 (Thawhtanni) Dar 1:00P.M.  Aijal Club a neih a, CYMA General Secretary Lalhmachhuana paper present a ni. )