Ram Chhan Kawng Zawh-a MZP President L Ramdinliana Renthlei thusawi tlangpui

Vawiina hian kan ramin chhan a ngai tih hria a lo penchhuak zirlai zawng zawng te leh Mizo mipui zawng zawng chungah lawmthu ka sawi hmasa duh a ni. Ram chhan kawngzawh a lo kal zawng zawng te chungah MZP chuan thinlung takin lawmthu kan sawi a ni.

Ni 6th July 2019(inrinni) khan Vairengte dai Sipai Cinema hall hlui chu Assam Forest Department in an chei tha a, Mizo te nen inti buai in Assam Police venna hnuaiah sa chhunzawm zelin tunah chuan an luah nghal ta a ni. Vawiina ka sawi duh chu--- Vairengte dai a ram in chuh chungchanga buaina ah hian vawiin thlengin kan MLA Opposition a ni emaw ruling a ni emaw tuman an la tlawh miah lo a ni. Hei hian a entir ni a ka hriat chu kan ram hruaitu kan MLA rual te hian kan ramri hi an vei loh zia a lang chiang hle a ni. Ramri hrul ah harsatna a awm a, MLA tumahin an la tlawh lo hi zirlaite hian hriatthiam har kan ti a, kan Sorkar thuneitute hian a rang lamin tlawh se kan ti a ni.

Vawiina zirlaiten kan thilphut Sipai Cinema hall hlui hmuna Assam Forest Department te chhuah tir tur chungchangah Home Minister atangin chhanna kan hmu a, chu kan chhanna hmuh chu Assam lam nen sawiho mek a ni tih a ni a. Mizoram Chief Minister hmasa ber Pu Ch.Chhunga(L) leilet zawl a Zofate Chawlhbuk sa tura kan ngenna chu Home Minister atanga chhanna kan hmuh chu - "Tun dinhmunah chuan State Sorkar ang chuan a rem rih lo ah kan ngai tih a ni." Zirlaite thilphut tihhlawhtling thei lo Sorkar kan nei hi a lawmawm loh hle a ni.

Ramri chungchanga MZP hian nasa takin hma kan la thin a, vuak leh Silaia kah hial te kan tawk thin a ni. Hetih laia kan Sorkar hrawn tawh ten zirlaite hmalakna an bawhzui ngam lo thin leh zirlaite thlavang an hauh ngam lo thin hi vawiin hian zirlaite rilru a na a ni.

Engvanga kawng zawh ngai leh thin nge a nih kan tih chuan, Zirlai ten thisen chhuak hial a kan beih, nunna chan huam chunga kan beih chung pawhin Mizoram Sorkar in hmalakna a neih thin loh avangin kan  Sorkar karna atan leh kan Sorkar auh eih nan kawng hi zawh a ngai leh thin a ni. Kan Sorkar hian a ram mipuite duh dan hian hma la se chuan Kawngzawh leh thin hi a ngai lo tur a ni. Assam lamin kawng an zawh ve thin em? tih zawhna a awm thin a, Assam state chu an Sorkar a huaisen a, an Sorkar auh eih chawp an ngai ve lo a, an Sorkarin an vei a ni. Assam Sorkar ang hian Mizoram Sorkar hian vei ve se, huaisen ve se zirlaiten kawng kan zawh hi a ngai bik lo ang. Ramri chungchangah hi chuan Mizoram hian Sorkar huaisen kan mamawh hle a ni. Mizoram kan chan belh zel loh nan leh kan pi leh pu te luahchin ram Mizoram chin humhalh a, kan neih let leh ngei theih nan Mizo zirlai ten hma kan lak chhunzawm zel dawn a ni.