MPSC hnuaia hnalak kal mek leh hnalak tur advertisement tih chhuah tawh chu MPSC in a lak chhunzawm theih nan CM in hma lak tum; MSSSB chu Autonomous body tur a ni a, Ministry in rawlh lohna tur Board hrang hlak hna la tu tur a ni - CM Zorama

Aizawl | July 23, 2019:  MZP General Headquarters hruaitute chuan an President L. Ramdinliana Renthlei hoin, Mizoram Chief Minister Pu Zoramthanga chu a office-ah hmuin Mizoram Public Service Commission (MPSC) kal tlanga hnalak kal lai mek cancel chungchang an sawipui.

      MZP chuan, MPSC hnuaia hnalak kalpui mek, interview mai tawh tur  Home (forensic) hnuaia UDC, AH& Vety  department hnuaia computer operator, Health department hnuaia Staff nurse hnalak bakah MPSC kaltlanga Group B chin hna hrang hrang lak tur kal lai mek tih tawp a ni chu MZP chuan tha lo a ti hle a. MPSC-in hnalak tura hmachhawp leh interview tur te hi kal tlangpui hi MZP duh dan a nih thu sawi a ni a, kaltlang pui a nih loh chuan kal tlangpui a nih theih nan MZP in hma a lak tur thu Chief Minister hnenah hian an thlen niin an pawl thuchhuah chuan a tarlang.

Hetah hian Chief Minister Pu Zoramthanga chuan MPSC hnuaia hnalak kal mek tih tawp a ni chu a hriatpui loh thu leh Sorkar anga an hriat loh thu in MZP hruaitute chu a chhang a. MPSC chu Autonomous Body an nih angin Sorkar anga thu va neih viau theih a nih loh thu MZP hruaitute chu a lo hrilh a,  'MPSC hnuaia hnalak kal mek leh hnalak tur advertisement tih chhuah tawh chu MPSC in a lak chhunzawm theih nan hma a lak nghal tur thu MZP hruaitute a lo hrilh. Hei bakah hian MSSSB din thar a nih hma loh chuan MPSC kuta a la awm zel tur thu MZP hruaitute hi a lo hrilh bawk.

 Chief Minister chuan, 'MSSSB chu  Autonomous body tur a ni a, Ministry in rawlh lohna tur Board hrang hlak hna la tu tur a ni a, induhsak awm lohna tur a ni' a ti bawk.

      MZP hruaitute hian vawiin vek khan Mizoram Public Service Commission (MPSC) chairman Rev. Zosangliana Colney chu a office ah an hmu nghal a, MPSC hnalak cancel chungchang sawipui a ni a, MPSC Chairman chuan "Sorkar in ni 21st June 2019 Notification a chhuah hmanga Group B chin hnalak tur cancel mai kan ni a, hetah hian MPSC chuan thiam lohna kan nei lo va,  Mizoram Sorkarin Notification te siamtha a, kan hnalak kal lai ti leh tura min tih chuan MPSC chuan harsatna kan nei lo a, kan chhunzawm leh nghal mai dawn a ni. Hnalak cancel tawh pawh Sorkarin ti tura min tih chuan ruahmanna thar kan siam tha leh mai ang'', tiin MZP hruaitute chu a  lo hrilh a ni.