KA AWM ANGIN KA LOKAL ANG

"Ka Bible hi ka Kohhran a ni a, ka tan a inhawng reng".

- Charlotte Elliott

Khawvela Lal Isua ringtu an awm chhunga ringtute thinlunga kum za thum emaw dawn thu lo sawi tawh leh la sawi zel tur "Ka awm angin ka lokal ang" tih hla  leh 'I thu ni se" tih hla phuahtu chanchin leh a chhehvela chanchin eng eng emaw in hrut kual vel teh ang.

He hla "Ka awm angin ka lokal ang" tih hla hi Miss Charlotte Elliott phuah a ni a, Mizo țawnga letlingtu hi Rev. D. E Jones ( 1870 - 1970) a ni.  Kristian Hla Bu No. 368 na niin chang 5 a awm a, Presbyterian Hymn Book No 108 ațanga lak a ni a, Sacred Songs and Solos (SSS) ah thung chuan No 473 naah awmin chang 4 a nei thung.  1849 edition of "Hours of Sorrow cheered and comforted" ah chang 7 na belh a ni. 

He hla hi phuah anih ațanga rei vak lo ațangin Europe ram țawng hrang hranga lehlin nghal niin,  ring lote ring tura sawmna hla țha leh ropui, mi thinlung titui raltu leh ringtu hnung tawlh hruai kirtu a ni a, mimal, zaipawl leh Kohhran tan hla țha hi a ni reng ang. 

Mizo țawnga letlingtu Rev DE Jones hi Mizo țawng pian puia hmang ni lo mahse a lehlin hi a țha hle mai. Zosap missionary dangte ang bawkin mahni pianpui țawng a nih lohna hmuh tur chu a awm. "FO"  hmanna hi a ngaimawh awm  deuh hlek tih mai loh chu.

CHARLOTTE ELLIOTT :

Miss Charlotte Elliott, hla 150 zet phuahtu hi English mi niin silk sumdawng Charles Elliott fa paruk zinga pathumna niin March 18, 1789 khan Clapham, South London District ah piangin kum engemaw zat hnuah Clapham ațangin Westfield Lodge, Brighton ah an pem. A pa lama a pu Rev. Henry Venn pawh rawngbawltu hmingthang leh thu sawi thiam tak a nih bakah a lehkhabu ziak "The Complete Duty of Man 1763" phei chu kum zabi 18na tawp lama Harhna ropui thlenna atan pawimawh taka ngaih a ni. A nu lama a pute lam pawh rawngbawltu langsar tak tak te an ni hlawm.

Hetiang chhungkua ațanga sei lian anih avang hian lehkhathiam tak leh zirna țha tak dawng a ni. A naupan lai ațang rengin zai, rimawi leh thu ziak lam tui tak a ni. Rawngbawltu chhungkua ațanga chhuak nimahse, he khawvel sualna nasa tak leh hipna chak tak mai chuan hun engemaw ti chhung chu a nun a tibuai ngeia ngaih a ni. Pathian khawngaihna dawng tlak lo leh Pathian dik leh țha leh fel famkim chu atan sang leh ropui lutukin a hria a, amah pawh ringtu (christian) ah a inchhal lem lo hial reng a.

Miss  Charlotte Elliott hi kum 30 mi anihin natna mak tak mai, a natna sawi lan lohin a tlakbuak a, a ke nasa takin a bai a, kuttual lei chham ( invalid=victorian terminology ) a lo ni ta reng mai a, ( kuttual lei chham = piangsual, kut leh ke emaw hman theih loh vanga hna rim thawk thei lo).

Ama insawi dan takah *Invalid* a lo nih tak hnu hian mahni in khawngaih in a khata, a tih ve theih tawk tura ngaih pawh a natna *chhuanlam* hmang chuan a ti duh ngai lo.

A nuțapa Pastor in a tih ve theih tawk lo ti ve tura hian a hrilh fo țhin a, a chhanna "ka peih zawng a ni lo" , ( I am not feeling up to it) tih leh "kuttual lei chham (invalid) ka nih hi i hria a ni lawm ni?" tih te, "ka tih theih ka ring lo" tih hi a ni reng mai a, a nuțapa pawh chuan, " *chhuanlam* hi i nei reng mai chu a ni si a," tih chang a nei *fõ* mai.

Kum 1834 ah a nuțapa chuan Pastor fate tan school țha tak fee tlemte chauh chawi ngaia din a tum a, hemi bul țanna tur hian bazar ah sum tuak a engemaw tih an tum a, Miss Charlotte Elliott pawh țangkaina neia ringin kal ve se a duh a, a ngaitein  *chhuanlam* bawk a nei leh a , a nat hluah hluah thu leh a chauh thu a sawi avang chuan a kal leh ta lo.

=====

From : Facebook post of Grace Church Twin Falls:

*Just as I am, without one plea*

_"Ka awm angin ka lokal ang"_ tih hi chhuanlam nei reng mai khan, chhuanlam nei lova kal a duh thu a sawina hi a phawk pha lo em aw? (Huna) 

======

Hemi zan ațang hian Charlotte Elliott chuan a natna in a nun a tihbuai dan te a ngaihtuah chhuak a, mahni a inkhawngaih avangin chhuanlam nei reng mai anih te ngaihtuah a, zahthlak hle te pawhin a hria a. Mahni inlainatna in a nun a tuam hneh hle tih pawh a inhre chhuak a. Nun chau leh tuihal rukna chuan a nun chu a mut mek a.

Hetih lai vel tak hian rawngbawltu lar leh thu sawi thiam tak Rev. Dr. Caen Milan a pa țhian țha tak chuan Geneva, Switzerland ațangin a rawn zin a. Rev. Milan hian Miss Charlotte Elliott nunah chuan kim lo engemaw awm hian a hriaa, tuma biak chakawm a lang lo, biak chang  pawha chhang  fumfe ngai lo a nih chu a hmu a, Rev. Milan chuan Pathian thu te hrilhin PATHIAN HNENA THLAMUANNA a nei tawh em tih a zawt a, Elliott chuan hria awm ang pawhin a lang duh lova, a chhang bawk duh bawk hek lo.

Kar thum vel hnuah chuan Dr. Milan hnenah chuan thupa chawiin "KRITA THLAMUANNA" a duh thu a hrilh thei ta a. A hnu zelah pawh Dr. Milan hi thlarau lama a pa leh a chak loh chang pawha fuihtu țha a ni ta zel a. 

Dr. Milan chuan Charlotte Elliott nun leh chhuanlam a neih nasat zia chu a chhungte hnen ațangin a hriat sa avangin, " ti mai khan, kha ti ringawt khan, i awmdan pangngai khan Isua pan rawh"  a tih chuan chhuanlam tur a awm lohzia a hrilh te chuan a rilruah thu a sawi fo mai a, eng hi nge maw ka nih le, chhuanlam nei reng mai hi tih amah leh amah a inzawt ta fo mai a.

A hma lama kan sawi lan tawh kum 1834 kuma a nuțapa Pastor HV Elliott in Pastor fate tana Sikul dinna tura bazara sum tuaknaah chhuanlam siama a kal theih loh tur thu a sawi zan chuan a rilru a hahin a rilru pawh a insual buai hle mai. A tuk a lo ni a, a chhungte zawng zawng chu lamah chuan an kal bo diak mai si a, a rilru a chawl chuang lo. Bible a chhiar a, Dr. Milan thu sawi "Charlotte, khati ringawt khan Pathianin a hmangaih che" tih te, "chhuanlam tur engmah a awm lo" tih thu te chuan a deng nawn awn awn mai a. Ziaklohpuan leh kawlãwm a la a,  KA AWM ANGIN KA LOKAL ANG ("JUST AS I AM, WITHOUT ONE PLEA") tih hla, Chhuanlam siam tur pakhatte mah a neih lohzia leh Krista hnena atluk luhna hla chu a ziak chhuak thei ta.

*** I Hun awlah website a fakna hi lo click ve rawh le. ***

He hla a dawhkana lo awm chu a nuțapa nupui chuan a hmu a, a chhiara țha a tiin a rilru a deng dawt hi a ni ber a, a fate Nî, nula un "chhuanlam siami" chuan chhuanlam a nei ta lo. A va ropui em! He hla hi a ziak chhawng a, a beiseina pawha awm ngai lo, Kristian awm tawhna apianga an țawnga lehlin niin ringtute chawmtu a lo ni ta. Chhuanlam nei reng mai khan hla țha dang tam tak bakah " I THU NI SE" (Thy will be done) a lo ti thei ta.

If Thou shouldst call me to resign

What must I prize - it ne'er was mine,

I only yield Thee what is Thine,

"Thy will be done".

( He hla chang țha tak pawh hi Mizo țawnga leh tel a ni lo hlauh mai) 

Kum 1835 ah a hla phuahte chu a bu-in "INVALID HYMN BOOK" hming chawiin tih chhuah a ni a. 1834 ațangin Editor of Christian Remembrance Pocket Book a thawk a, kum 25 zet a enkawl zui.

Miss Charlotte Elliott hi Church of England member a ni a, kum 1869 ah thih ngamin a na a, tlemin țha chhuak leh mahse, a kum a lo tam tak hnu hian a ke a bai nen, Biak In a thleng hlei thei ta meuh lova. Hetiang hian a ziak :

"  *Ka Bible hi ka Kohhran a ni a, ka tan a inhawng reng a, hetah hian Puithiam lal berin min lo nghak a ni*". 

September 22, 1871 khan a zin kawng zawh chu a lo tawp ta.

_Tunah i ta ni fo turin_,

_Ka tlantu, i hnen ka rawn pan_.

Brighton khawpui St. Andrew's Church Biak In bul hnaiah a nuțapa Rev. HV Elliott te nupa thlan bul hnaiah a taksa chu an zalh ta.

===================

JUST AS I AM, WITHOUT ONE PLEA

Just as I am, without one plea

But that Thy blood was shed for me,

And that Thou bidd'st me come to Thee.

O Lamb of God, I come.

Just as I am, and waiting not

To rid my soul of one dark blot,

To Thee, whose blood can cleanse each spot,

O Lamb of God, I come.

Just as I am, though toss'd about

With many a conflict, many a doubt,

Fightings and fears within, without,

O Lamb of God, I come.

Just as I am, poor, wretched, blind,

Sight, riches, healing of the mind,

Yea, all I need, in Thee to find,

O Lamb of God, I come.

Just as I am, Thou wilt receive,

Wilt welcome, pardon, cleanse , relieve ;

Because Thy promise I believe,

O Lamb of God, I come.

Just as I am - Thy love unknown

Has broken every barrier down -

Now to be Thine, yea, Thine alone,

O Lamb of God, I come.

Just as I am - of that free love

The breadth, length, depth and height to prove,

Here for a season, then above,

O Lamb of God, I come.

CHARLOTTE ELLIOTT

1789 1871

_______________________

Huna Kawlvawm



*** I Hun awlah website a fakna hi lo click ve rawh le. ***