Ramri chungchangah Hmalakna mumal a awm loh chuan MZP-in Total Bandh huaihawt tum

Aizawl | July 31, 2019: Mizo Zirlai Pawl (MZP) president L Ramdinliana Renthlei hova MZP general headquarters executive meeting chuan Mizoram -Assam ramri chungchangah Mizoram sawrkarin hma a lak loh chuan Total Bandh huaihawt an tum.


MZP chuan Meeting-ah hian The Mizoram Maintenance Of Household Registers Bill, 2019 chungchang, Mizoram leh Assam ramri chungchang leh MZP rorelna sang Federal Council Sitting neih hun chungchang te an rel a.

Meeting chuan MZP ten ramri chungchangah nasa taka hma a lak tawh hnuah pawh tun thlenga Mizoram Sorkarin hmalakna mumal leh Core Committee pawhin meeting a la ko lo chu Mizo mipuite leh zirlaite hmuhsitnaah MZP chuan an ngai a. July 19 a ‘Ram Chhan Kawng zawh’ neih hnuah pawh a taka Mizoram Sawrkar hmalakna hmuh tur la awm lo chu MZP chuan na an ti tak zet.

Tuna Mizoram leh Assam ramri chinfel kawngah hian Central Sorkar auh ei chawp a ngai lo a, inbiakna kal zelah hian Mizoram Sorkar kuta thutawp a awm niin MZP chuan a ngai a. Mizoram Sawrkar chu chak taka hmala tura an ngen nawn rualin, hma lakna mumal a awm loh chuan Total Bandh huaihawt an tum.

MZP chuan dan lova Mizorama lut rua inbengbelte lakah Mizoram a him theih na atan hnathawhna tur Mizoram Maintenance of Household Registers Bill 2019 chu hman theih a nih hun a nghakhlel hle a, pawm thuai turin Mizoram Governor Prof. Jagdish Mukhi an ngen.

He dan Mizoram Maintenance of Household Registers Bill 2019 hi March ni 19, 2019 khan Mizoram Assembly chuan tawh a. Mahse vawiin thlengin larsap-in he Bill hi assent a la pe lova, he thil hi MZP chuan pawi an tiin mak an ti a, Mizoramin a mamawh tih hriaa assent pe thuai turin MZP chuan Governor Prof. Jagdish Mukhi an ngen ta a ni.

He Bill ngaihtuaha buatsaihtu Mizoram Sorkar chungah leh Assembly House ngaihtuah a nih tuma phur taka thlawptu House member-te chungah MZP chuan lawmthu a sawi a, he Bill hi a puitlina Mizoramin a hman thuai theih na atan ngaihven tur leh Governor pawh assent pe thuai tura ngen turin House member-te hi MZP chuan a ngen bawk a ni. 

Bangladesh atanga Mizorama dan lova lut an tam avang leh ram leh hnam a him loh avangin MZP chuan Mizoram Maintenance of Household Registers Bill, 2019 hi a puitlin hun a nghakhlel tak zet a, he Bill hi MZP chuan ram leh hnam humhalhna tur leh hmasawnna thlen thei turah a ngai a, chuvangin Mizoram thatna tur ngaihtuaha pawm fel thuai turin MZP chuan Governor hi an ngen a. MZP chuan Mizoram Sorkar pawh Mizoram Maintenance of Household Registers Bill, 2019 hi Governor in assent a pek thuai theih na atan hma la turin an ngen bawk. 

He dan hi hman a nih chuan khua leh tuite chhinchhiah an nih dawn avangin chhinchhiahna-a lang lo Bangladesh atanga rawn lutte chu an ramah an kir a ngai ang a, khua leh tui chhinchhiah an nih chuan law and order kenkawh kawngah leh ram inrelbawlna thil hrang hrangah pawh Mizoramin a hlawkpui dawn bawk a ni.

Heng bakah hian MZP chuan Mizoramin hun rei tak Governor pangngai nei lova Assam Governor Prof. Jagdish Mukhi in a hmui reng hi hriatthiam har tiin, Mizoram state in Governor a neih thuai theih nan President of India leh Prime Minister of India hnenah ngenna ziaka thlen an tum bawk.

Meetingin a rel angin MZP rorelna sang  Federal Council Sitting chu September 10 hian Aizawl ah an nei dawn bawk a ni.

Post a Comment

0 Comments