COURT NGE HUAI MIZORAM SAWRKAR

COURT NGE HUAI MIZORAM SAWRKAR

 Mizoram sawrkarin Mizoram quota-a technical course  zirna sang zawk  zir tur  thlanna dan a siam “The Mizoram (Selection of Candidates for Higher Technical Courses) Rules 2016”-a MBBS leh BDS  zir tura Mizo ni lo, hnam dangte  thlan theih lohna dan, Mizoram Chakma Students’ Union-in Gauhati High Court-a an khinna, Gauhati High Court-in thutlukna siam a, Mizoram sawrkar dan siam chu pawm theih a ni lo a tih Mizoram sawrkarin Supreme Court-a a khinletna Special Leave Petittion chu Supreme Court chuan ngaihtuahin, Gauhati High Court thutlukna chu “thutlukna chhan tha tak nei a ni” tiin a inrawlh duh lohna-thutlukna a siam leh ta a ni. Mizoram sawrkar SLP chu Supreme Court chuan a hnawl ta a ni.

 Hetianga court-a thu a kal laiin  Mizoram sawrkar chuan thutlukna hran anga ngaih theih a siam a, Mizoram Chakma Students’ Union-in Mizoram sawrkar dan siama an khin lai tak, Higher Technical Course Category-I zir tura zirlai thlan turte chu Mizo (Zo-ethnic people) chauh an ni tur a ni a ti a ni.

 Khatia, Mzioram sawrkarin court-a thu a kal laia thutlukna a lo siam khan Supreme Court chuan eng ang thu tlukna pawh, a bikin Gauhati High Court thutlukna ang pawh siam se, “Kan thutlukna chu kan kalpui tho tho dawn” an tihna angah a ngaih theih a ni.

 Supreme Court thutlukna chu a lo chhuak ta a. Gauhati High Court thutlukna chu tha a ti hle a. A hranpaa thutlukna siam ngai lovin a hria a ni.

 Gauhati High Court thutlukna han chhiar chuan Constitution a dah lal hle a. Chakma chu India Constitution-ah Mizorama hnam, Schedules Tribe an lo ni a. Mizoram sawrkarin a dan siama Scheduled Tribe-te lo thlirhran chu President thupek a ni a, dan anga phal theih a ni lo a, Constitution-a Scheduled Tribe-te zingah chuan reservation (quota) chu in-ang (uniformly)a hman tur a ni a ti a ni. A awmzia takah chuan Mizoram sawrkar dan siam chu Constitution kalh a ni tihna a ni a, Constitution thiat theitu chu Parliament chauh a ni.

 Technical Course zir tur thlan chungchang chu buaipuina a rei ta hle a, Union Territory sawrkar hun lai PC Ministry-ah pawh buaipui luai luai a ni a, hnam dang thlan a nih vang a ni. Congress Ministry-ah pawh chuti bawk. Zirlai pawlte chuan hnam dang thlan an ngai thei lo a ni. India ram, Mizoramah hian hnam dang an tlin ve si chuan tawng thlauhthlak tawp mai chu a dik lo em em reng a ni.

 Sawi tak angin India ram hmun dang Medical College-ahte, Mizoram tana seat an pekah te, zir tur thlannaah Mizorama hnam dangte an tling ve a, thlan loh an nih chuan court thu chhuak kalh bakah Constitution kalh a ni dawn a. Mizoram sawrkar Chief Minister leh a thuihruaite chu India Constitution anga, duhsak bik leh duhsak loh bik nei loa rorel tura thu tiamte an ni a, mite chungah pawh rilru chhia (ill will) pu chunga rorel lo tura intiamte an ni.

 Hetiang hi High Court leh Supreme Court thutlukna a lo nih takah chuan Mizoram sawrkar chu engtin nge a kal dawn?