VAI MISTIRI

                                   

 A hming chu Ali-a lo ni ta se. Ali-a i rawih tirh chuan hlawh tam a beisei lo ang. A zah em em ang che. ‘Ti rawh,’ i tih apiang a ti nghal mai ang.Tan hun hmain a lo thleng ngei ngei ang a, nilengin taima takin a thawk ang a, ban hunah pawh a la thawk malh malh ang.Eng vangin nge a taihmak em em? A hlawh bak beisei a nei a ni!

Chutianga kar hnih chuang a thawh hnuah Ali-a chuan, “Ka pu, ka permit a thi a, a thar min siamsak rawh” a ti ang! I han ngaihtuah a, fel i ti em em mai si a, siamsak loh ngawtna chhan tur i hre mai lo. I tih tur chu “Aw!” tih deuh chiah a ni. A bak chu i thlalak leh ID chiah a dil ang che. A va han awlsam em!

Vai mistiri fing chuan DC office lama an permit siamtir hna chu mi dang an tihtir daih mai a. Anmahni zingah hian a ti thang an awm a, hlawh neiin an tihtir mai thin a ni. Chuni chuan DC office-ah leh in Local/Village council hruaitute thlengin a hmelhriat vek! Mahni ngei inlan a tul chuan ni khat bak hna a thulh lo vang.

A ‘vai pass’ thar a lo chhuah hma chuan, hnathawhna hmunah bak khawiah mah chhuakvak lovin inah a tawm ngat ngat thei a. A pass a lo chhuah hnuah chauh a leng chhuak ang.

Pass a nei ta. Sponsor-tu copy i dil loh chuan a pe kher lo vang che. Sponsor-tu hian kan copy hi kawl nachang kan hre lo tlangpui!

Pass a neih hnu ka hnihna velah, “Ka pu ka hlawh min punsak rawh..” tih thu a sawi ri faih faih ang. I pun loh chuan hmun danga hna hmu thei angin a lang tlat lehnghal. Ali-a chu a fel i ti si a, a hlawh i punsak ta a.

A hlawh i punsak hnu chuan a sahdah nuai chhung a rei hret tih bak danglamna a nei lo. A thatchhe ta zawk mah mah em ni tih tur a ni.

I sawisel a. “Hna a tam si a, mistiri pakhat rawih belh loh chuan kan zo har ang,” a ti leh ang. Amah aia naupang, mistiri patuai in rawih belh ang. Humhalh chunga hna a zirtir bakah hna awlsam lai hlir a thawhtir avangin mistiri thar chuan hna a thiam tak tak em tih i hre thei miah lo vang. Chumi bakah ‘mistiri thar’ chuan ‘head mistiri’ Ali-a hnenah, ‘hna hmuhsak lawmman’ eng zat nge a pek phei chu i hre lo lehzual ang.

Thla hnih leh ni li a liam ta! In i la sa zo lo. “Balu/brick hi a tha vak lo..” a ti zauh ang. A man ngaiin a aia tha lei tur a hriat thu a hrilh ang che. I lei chhintir ang. A tha tak tak ang. I leitir chhunzawm zel ang. A tha tak tak em tih i hre chhunzawm tawh lo. Ali-a chuan commission eng zat nge a lak tih pawh i hre tawh chuang lo. A zuartu dawr leh nang, a man petu inkarah Ali-a chu a awm ta tlat mai a. Dawrah balu/brick man pe lovin Alia hnenah hlir i pe ta mai a ni.

Thla thum a ral a. In innel viau a. “Mami/Mama a dam em?” tih nachang a hria a. Karimganj lama an chhungkaw chanchinte a hrilh che a. “Ka pi/pu/pa/nu.. dam lo.. fapa nupui neih.. kan khuaah haw lawk a ngai,” a ti tan ang. A lo haw apiangin coconut a rawn hawn ang che. Mistiri thar zawk chuan a ai a awh tam tial tial ang.

Thla li leh ni li a liam leh ta! In sak i la zo si lo. Ali-a chuan chawlh zeuh zeuh a ching a, i rawih tum hauh loh mistiri thar chu a ‘regular’ ta mah mah zawk a. ‘Hna a thiam lo’ i tih dawnin a harsa laiah Ali-a chu a awm zel bawk si.

Thla rukna. Plaster hna in zawh veleh vai mistiri hnawih hna chu a tawp tawh dawn.A va nuam dawn tak em! Ali-a chu kar khat lai te ‘an khuaah a pa dam lo kan turin’ a haw leh thin. I ring tak tak em? Alia chuan i hna pek theih chu a tawp dawn tawh tih a hriat avangin hna dang a zawng tan tihna a ni! Tichuan, mistiri junior chuan a hmawr a bawksak ta che a nih chu!

Ali-a chuan a helper –te hlawh atang leh a junior mistiri-te hlawh atangin chanvo a nei maithei. I bungrua a chahsak che avangin commission a ei mai thei. Chu chu tunlai thil awmzia a ni!

         -   Lengzem (edited)