MZP buatsaihin Remna Ni hmang; hunin a finfiah remna ngelnghet kan nei hi a lawmawm hle - CM Zorama

Aizawl | June 28, 2019: Mizo Zirlai Pawl (MZP) general headquarters  buatsaihin vawiin khan Aizawl Sipai Lammual ah “Remna Ni” lawmna hun hman a ni a. He inkhawmah hian Chief Minister Pu Zoramthanga chu khuallian a ni a. Kumin Remna Ni hi Sunday-ah (June 30) a tlak avangin MZP hian vawiinah an lawmna a ni. He hunah hian remna atana thawhhlawk mi pali hnenah chawimawina hlan a ni.

Khuallian Chief Minister Pu Zoramthanga chuan “kum 33 chhung lai Mizoramin remna ngelnghet, hunin a finfiah kan nei hi a lawmawm hle a ni”, tiin thangtharten remna ropui zia an hriat thar theih nan a MZP in hun an buatsaih chu lawmawm a ti a. Remna chu ram hmasawnna atan hmang turin mipui chah in, remna tello chuan hmasawnna a kal theihloh thu a sawi a. Mizoram in hmasawn tura asset tha tak a neih thu te sawiin, “India rama GSDP sang ber nihna hauh tura theihna Pathianin malsawmna min pek hi kan hman tangkai a kan ngaihtuahna kan hman a pawimawh a ni,” a ti. Pu Zoramthanga chuan “Kum 1986 a inremna ziah chu India sawrkar leh Mizo mipui ten kan pawm tlan theih inremna, Pathian in tha a tih anga min pek remna a ni a, a ropui hle a ni” tiin he remna hi humhim a hmang thiam turin mipui a chah a ni.

Vawiin Remna Ni lawmna inkhawmah hian Rev. Dr. Zairema, Rev. Dr. HS Luaia, Rev. Dr. Lalngurauva Ralte leh Pu Lalduhoma, MLA te hnenah remna leh muanna a awm theih nana hma an lo lak tawh naah MZP chuan chawimawina a hlan a ni.

 

Vawin Remna Ni lawmna ah hian Minister leh MLA thahnem tak an tel a. NGO Coordination Committee atangin leh MPCC, ZPM, BJP leh PRISM party atang tein thusawi ngaihthlak a ni a. Remna Ni lawmna programme hi Pu B. Vanlaltana, MZP Vice President chuan a kaihruai a, an president Pu L. Ramdinliana Renthlei chuan thu a sawi bawkin, Treasurer Pu Michael Lalramsanga chuan lawmthu sawiin hun a khar a ni. Mizoram Political Party hrang hrang leh tlawmngai pawlte bakah zirlai naupangte vawiin programme ah hian an kalkhawm a. School 25 atangin Cheraw bu 40 chhepin Cheraw kanpui thlirho a ni bawk.

Zaithiam Grace Lachhanhimi, Lancy Remlalhruaii, Rebek Lalruatfeli, R. Lalrinmawii, Kimkima leh Sawmtea Chhangte bakah chuai thei lo, H Vanlalhlana ten mipui kalkhawm zaiin an awi bawk.

St Joseph HSS zirlai ten Rambuai chanchin hmuhnawm takin lemchan an entir a, kalkhawmte a hnehin sawizui a hlawh hle a. Mizo Idol Star Grace Lalchhanhimi chuan, "ka mittui a tla hial a, ka mualpho teuh hle. An lemchan chan zawh kha ka zai hun tur a ni si a, thil dang ngaihtuahin ka insum hram hram," tiin a hmuh dan a sawi nghe nghe.

- DIPR