Laltlanmawii: MZU B.Sc Gold Medalist 2019 kawmna

Mizoram University (MZU) in June 21, 2019 a Under Graduate result 2019 a tichhuah tak, Bachelor of Science Gold Medalist Laltlanmawii leh Exploremizoram.com founder H Zate inkawmna chu kan chhawp chhuak ta e.

Bachelor of Science Gold Medalist Laltlanmawii hi Pachhunga University College zirlai niin, Mathematics subject a la a,  9.46 hmuin Gold medalist a ni.

Mawimawii emaw Tlani emaw a koh thin Laltlanmawii hi R Lalrinkima leh Lalmuanpuii te fanu niin, 1998 February 24 khan a lo piang a.  Mc Donald Hill, Zarkawt, Aizawl a cheng an ni. Mawimawii hi Unau pathum zinga milai niin u hmeichhia leh Nau mipa a nei.

Laltlanmawii hi Pawl 10 leh 12 Home Missions School-ah kalin,  Distinction-ah a pass ve ve a ni.

A duhzawng leh ngainat zawngte:---

Rawng - A pawl

Chawhmeh  - Alu

Incheina - Hâk nuam, zahawm, ka confi pui theihna eng pawh.

Rimawi – Zaipawl ka ngaithla tam deuh ber.

Hla- Beramno Isua

Hla phuahtu - K Lalremsiama

Mize ngainat loh zawng 

- Mahni thil sawi emaw, mahni thutiama ding lo.

Hobby- Zai

Nih tum: IAS

Kawppui atana duhzawng 

- Pathian ṭih mi, mi hawihhâwm, rintlâk, fai veng vawng, chhungte ngaihsak.

MZU UG 2019 Result chhuakah Gold Medalist I ni hi i inring sa reng em?

- MZU Gold Medalist ka nih hi ka ring sa lem lova, ka beisei phak lo.

 MZU UG 2019 Result chhuakah Gold Medalist ni turin i zir nasa em?

- Theihtawp chu ka chhuah ve a, hei aia nasa erawh chuan ka la zir thei tih ka hria.

MZU UG 2019 Result chhuakah Gold Medalist I ni tih i hriata i awm dan?

- Ka zuang tho awt a, ka pa ka va kuah chung chung a, Pathian hnenah lawmthu ka sawi nghal bawk a ni.

I lehkha zir dan tlangpui:

- Lehkha ka zir dawn leh ka zir zawh hian rilruin Pathian hnena inhlanna ka nei ṭhin a. Class ṭantirh aṭangin ni tinin lehkha ka zir chho bek bek a. A nîa kan zir kha a zanah ka en nawn thuak thuak a,  a vai erawh chuan ka en hman ngai meuh lo. Ka en hman lohte chu weekend-ah ka en mai ṭhin. Class-a an sawifiah hi ka ngaithla uluk a, in lama ka zir hi chuan class-a kan zir kha a zirzauna ka nei a ni ber mai. Tlai chaw ei hma hi chuan lehkha zirna hun hi ka nei meuh lo va, chaw ei kham ve leh ka zir nghal mai ṭhin. Kohhran emaw khawtlang lama programme a awm erawh chuan ban ve leh ka zir nghal mai ṭhin a, hetiang zanah hi chuan men pawh ka meng rei deuh bik ṭhin. Zir chhung hunbi ka nei lem lo va, ka zir tura ka tuk kha ka thiam hma chu ka zir tawp zel. Zîng lamah hian chaw kan ei hma ṭhin avangin exam lai tih loh chuan zingah hi chuan ka zir ngai lem lo.

Zirna atan hian i chhungten an tuipui che em? 
- Min tuipui khawp mai, keimah ai mah hian an tui zawk! 

Zirtirtute aṭangin thlawpna in dawng ṭha in i hria em?
-  Zirtirtute hian min duhsak vek em em mai a, hun awl remchangah hian min fuih fo va. Keimahni min chawk phur thiam a, anni vanga tun dinhmun thleng thei hi kan ni. 

In department faculty hi ṭha tawkin i hria em?
-  Kan department faculty hi a tha tawk khawp mai.

 

(He post i chhiar mek lai hian Website a fakna awm hi lo click ve ta che.)

Zawhna dang:

1. A tel lova i awm theih loh: Pathian

2. I nun kaihruaitu: Pathian, ka nu leh pa leh Kohhran.

3. Hringnuna i hlauh ber: Sap ṭawng chuan Oblivion an ti a, thil thleng vel hre lo lutuka awm hi ka hlau ber.

4. I tih ngai miah loh tur: Eiruk, Chapo, Mi hmuhsit.A tam lutuk, ka sawi seng lo.

5. Mizo Tualzal nuna ṭha i tih: Tlawmngaihna leh Khawhar inlenpui.

6.  Quote i duh ber: "Pathian tan thil ropui tak tih tum la, Pathian hnen aṭangin thil ropui tak beisei rawh." - William Carey

7. Mizoram leh Mizo tualzal nuna Mizo hmeichhiate dinhmun: Hmanlai nena tehkhin chuan tunah chuan hmeichhiate dinhmun hi ṭha ka ti tawh khawp mai.

8. Hnam hmingṭhat leh hmingchhiat kawngah Hmeichhiate mawhphurhna: Tunlaiah chuan thawmhnaw tawngchham deuh deuh, Dul lang per pur te, mal lang thui em em maite hak kan ching ta hle a. Hetianga incheina hian mahni ni mai lovin, chhungte mai bakah Mizo hnam a tihmingchhiain ka hria. Chuvangin, ka hmeichhiatpui zawng zawngte chu - zahawm taka kan inchei hian kan hnam kan tihmingṭha a ni tih hriain, incheina hi uluk leh zual ila, tichuan kan hnam zahawmna vawngtu kan ni ang a, Mizo hnam hi kan chawimawi thei ang. Tin, ram pawna awm tan phei chuan nun uluk leh zual hi a ngai ka ti khawp mai. Pakhatin a tihsual chuan a Mizo ang tawpin kan hmingchhe ṭhin a ni.

9. Hnam ziarang chawinun kawnga Hmeichhiate mawhphurna: Mizote hian puan mawi tak tak kan nei a, tunlai hian puan bih loh kan intihhmuh ṭan deuh em aw ka ti. Inneih ni khuaah phei chuan kekawr hate an awm ta nuk mai. Puan bih uar leh zual hi kan mawhphurhna pakhat niin ka hria.

10. Mizote tan 'Fa neih tlem' inzirtir hi a ṭulin i hria em? 

- Fa neih tlem ai chuan neih tam inzirtir hi a ṭul zawk mahin ka hria a, a Pathian thu zawk bawk a ni.

11. Khawtlang, Kohhran leh nangmah: Damlohna ka nei a nih loh chuan Kohhran leh Khawtlangah theih ang tâwkin ka inhmang ṭhin. College chin bikah hi chuan mahni inthununna nen chuan zirna leh khawtlang leh kohhran hi thil kal kawp thei niin ka hria.

12. Social Media leh Nangmah: Social Media hian min tibuai lem lo. WhatsApp, Instagram, Facebook leh Twitter-ah account pawh ka nei ve vek a, mahse information hriat nan leh ṭhiante biak zawk nan lo chuan ka hmang lem lo. Twitter-ah hi chuan politician-te hi ka follow a, hengte hi chuan khawvel kalphung vel hriatna lamah min pui khawp mai. BBC, The Hindu leh Inshorts app-te hi ka download a, phone ka khawih hi chuan hengho hi ka en nasa zawk mah. Phone hrim hrim hi ka khawih tam lo khawp mai.

13. Mizoram ṭhalai tam tak tlakchham: Mahni inthununna leh tih tak takna nun kan tlachhamin ka hria.

14. Mizo ṭhalaite hian ngaihsan tur dik an ngaisangin i hria em? 

-Mizo ṭhalaite hian ngaihsan tur dik kan ngaisang tawk lovin ka hria. Ngaihsan tur dik ngaisang ila chuan kan dinhmun hi tun aia ṭha leh sang daih a ni tawhin ka ring.

15. Ngaihsan tur dik nia i hriat: Pathian ṭih mi, mi dik leh lehkhathiam.

16. Hlawhtlinna tura pawimawh: Pathian ṭih, mahni inthununna leh teirei peihna.

17. I nuna hloh i hlauh ber: Chapona lam ni lo se, mahni inthunun theihna ka neih hi hloh ka hlau ber.

18. Thalaipuite hnena chah duh: Zirna lamah hian i harh thar ang u!  Lehkhabu chhiarte hi i ngaina ang u! Khawiah pawh kal ila lehkhabu aia thawmhnaw lo khat vekte hian rilru a tihah! 

Incheina leh intihhhlimna lamah hian kan hun kan khawhral nasa mah mah a ni. Hengte hi chu kan hlawhtlin hnuah i chên zawk ang u. 

Chhungkaw tana ṭangkai tak, khawtlang leh Kohhran tan pawha ṭangkai ni chung siin lehkha zir lamah hian ṭan i la leh zual ang u. 

A ram leh a felna kan zawn hmasak phawt chuan a bak hi chu Pathian hian min pek belhchhah dawn chiang lutuk. Kei ngei pawhin ka experience  a ni.

  

www.exploremizoram.com i hmuh dan:

- Ka lo tlawh ve zeuh zeuh a, a bengvarthlak ṭhin khawp mai.

 Tin, keini pawh result chhuah ni la lain heti hian min rawn interview nghal a, in che rang khawp mai. In kal zelna turah duhsakna ka hlan a che u.



### He post hi hmun daaga copy chhawn kan phal lo.