HMEICHHE MAWINA

Hmeichhe mawina hi chu
Sa koham hmaah pawh
Thup tum eltiang mah ila,
A nuih sen sen laia
A bahsam chhawlleng siau siau
A kimtlang mipa te mit fuknaah
Nungcha nelawm loh tan pawh
Tuar har chan a chang ve.

A bahsam ngil uai thla hniang,
A sakhmel mawi thuam famkimtu,
A ṭangnema aggan bial ang
Lo lang leh a chawn ban te chu,
Karei! Nunna chi chhuah chãka
An phût mur mur hial chu!

Kham chhawrdawha
Ṭhal khawro karah pawh,
Hmeichhia, i lo nuih tawh chuan,
Engin nge min ti hrehawm ang ni?
Chhum chu lo zingin,
Ruahpui meuh lo thleng mah se;
Hmeichhia, i lung a awi chuan,
Engin nge min ti lunghnur zo vang ni?

Nipui sensa hnuaiah
Thlan tuiin mi bual huh vek mah se;
Hmeichhe duhawm hmaah chuan,
Natna na ber pawh a kiang a,
Khawvela thil siam mawi ber,
Thil nung zawng zawngte nu chu!

Favang ni eng mawi ang maia
Duhawmah ka chhal che a,
Ṭhal khaw ro vaivutin,
Kawngkam thil ṭo a bawh balh zozai,
Fur ruahtuiin fai taka a tleuh,
Duah taka rawn chawrno angah
Ka han chan leh che a;
Engmahin a khan zo lo che.

Hmeichhia, i hawiher hian
Khawvel a thunun a,
Nunna nei chi tin hian,
I lawmzawng siam an duh a ni.
Chuvangin i nelawmna leh i ṭhatna,
Hmangaihnaa mi chak i nihna nen,
Ka lam hawiin mi hmachhawn la,
Thilnung tinte hmuhah i hlimna
Thupin thukru lo la,
Lei thar van thar chu kan chuan ngei ang.