Aizawl | June 16, 2019: NRS Medical College & Hospital, Kolkata a doctor duty te thih ngama kutthlak an nih avangin India ram puma Doctor insuihkhawm pawl, Indian Medical Association (IMA) ten an rawt angin, India ram pumah, June 17, 2019 Thawhtanni zing dar ruk atanga a tuk zing dar 6 thleng hian lungawi lohna lantir nan sorkar leh private damdawiin zawng zawng ah ‘Pen Down Strike' neih a ni dawn.
Hemi hi zawm vein Mizoram-ah pawh IMA Mizoram State branch huaihawtin nawrh hi neih ve a ni dawn a. IMA Mizoram State branch thuchhuahin a tarlan danin, June 17, Zing dar 6:00 atanga tlai dar 6:00 thleng Mizoram chhunga Hospital zawng zawng (Govt leh Private) leh private clinic zawng zawngah medical doctor ten dam lo an en dawn lova,‘Pen Down Strike' hi an nei ve dawn a ni. He thil avang hian IMA Mizoram State branch hun Mipuite hriatthiamna an ngen a. An thuchhuahin a tarlan danin, he strike hian, emergency/casualty service erawh a nghawng lovang.
Tin, Ni 17 June thawhtanni zing dar 9:00 hian Civil Hospital Aizawl Casualty kawtah peaceful demonstration an nei bawk ang.
June 14 khan ram pum huap a Doctorte chunga tharum thawhna dodalna IMA huaihawtin neih a lo ni tawh bawk.
Mizoram-ah Darkar 12 chhung lungawi lohna lantir tur anga thuchhuah a awm laiin, IMA website ah erawh, June 17, 2019 a lungawi lohna lan tir tur hi Darkar 24 chhung neih tur niin, June 17 zing dar 6 atanga a tuk June 18 zing dar 6 thleng awh tur niin a tarlang thung.
Hetia Mizoramah darkar 12 chhung an tih chhan hi Mipui hma ngaih vang niin kan thu dawnna chuan a sawi.
Post a Comment
He post chungchanga i ngaihdan lo sawi ve rawh: