DIK LEH RIL

                 

                   DIK LEH RIL

Nu fing chuan a fate chunga enkawlna dik a pék theih nan ngaihsan tur leh ngaih pawimawh tur a hre hmasa țhin.

 Ngaih dan hmanga Pathian thu kalpui chu mahni ánchhe inlawhna.

 Rim taka thawk te ah hahchawlh phú lo an awm lo, thawkrim lova hahchawlhna ringawt zawngtu chuan nuihzat mai a hlawh ang.

Engvanga taima lo te hi huhona ah an thu chhuak tam tak hi khap beh sak a nih țhin?
    A thawh laia thil thleng leh awm dan zawng zawng an hriat chian vek loh vang a ni.

 Mi dangte chunga lén tumna neih hmasak ái chuan, mahni phak ang tawk zel a ke chheh thiam hi a tlo a, finna a pung duh bawk.

Thlamuanna thu chu a tak ram la thleng thei tura belhchian ngam a ni tur a ni.
     Mihring rama inhnemna hi mi tam tak tan ngaihțhat na a ni pha lo.

 Thil kawng hmang hre tura ngaihtuahna séng peih chuan finna a nei tawh a, khawl khawm chauh a tih tur a ni tawh.

 Mi thiam leh a hriate awm laia ti țha duh lova, a hnua thiam loh zia sawia thiam channa zawn tum tu chu; a chhuanlam pawmsak a ni ngai lovang.

Harsatna nei ten Doctor an pan țhin. Krista chu harsatna nei te leh mi chak te tan engtik lai pawh a mamawh reng a ni.

 Rál țitna hmun ah hmasawnna a chak ngai em ni?
       Zalenna hmang thiam lo chu mi á a ni.


 Zawi te a kal, thawm ring tak an awm a, thawm ring tak a kal zuihral nghal an awm bawk.

  Pathian thu hi a che reng a. A chhiar tlem leh a hre tlem pawhin pum-pelh loh thil tur chu a hél thei bik chuang lo.

  Hriatna tawi chu, in hmun rem laia in zím tak sak a, zauh belh dan kawng hre lo ang hi a ni.

   Inthununna awm lohna hmunah inthlahdahna leh zelthelna in bu a khuar vat țhin.

  Thil țha chu chhúngrilin a zawng mai țhin.

 Pangpar par chu a nih dan tur angin a kuh mum a țangin a lo par chhuak a.
    Thil kal hmang fel chu lang chhuak rih lo mah sela, a nih tur anga duan sain a lo chhuak mai țhin.

 Zahawmna hi khawih chét chi a ni, chumi thlen hma chuan rinawmna leh taimakna paltlang hmasak a ngai thung.

 Thawh dan tur leh thawh chen tur felfai taka ruahmanna siam te hi, inpéknaa tihhlawhtlin a ngai țhin. Sawi aiin a thawh a hahthlak zawk a vangin.

 Nausen anga hriatna la ngah lo an nih ngawt loh chuan, anmahni mawhphurhna zir zela an thawh hnuah chauh țanpui an ni zawk fo.

 Mi dik lo te tlawn a hlauh aichuan, mi dik zahawmna pe tu chu chawimawi tlak a ni.



 Mahni'n a țha thei ang bera thutlukna siam theih tawh hnuah pawh, mi dangte thlir dán ngaichang thiam tu chu finna nei mi a ni.

 A kawng hmang hriat tum hmasa la, chumi a hman tur chu ngaih dan țha tak neih tum țhin ang che.

 I fate nunah Pathian thu leh zirtirna țha i tuh loh chuan, i tan, khawtlang tan leh ram dodaltu tur i hring a ni ang.

 Tih dik loh leh hmaih palh a awm a, hriatthiamnaa min tuam anih pawhin, a leh pek a tana a dik zawk leh kal hmang hriat chhunzawm hi mi fing tih dan a ni.

I awm hmun a dik loh chuan, sa him nana inphenna tur pawh a rintlák rei ngai lo vang.

 Hlutna tilang turin mi chungnungte puihna beisei a ngai lo, kan bulhnaia thil awm te a táwk.

 Finna hi ral leh lam kal kaipui thei tu chu taimakna a ni.

 Taimakna chuan țawngțaina a kuah beh tlat loh chuan a thlawn mai a la ni ang.

 Harsatna chhunga i awm tawh chuan, i bawk-sawp loh nan awlsam taka paltlang chi leh sual-chhuah chi a awm a vangin thliar thiam hmasa ang che.

 Mi rilru hrisel lo te chu, chapo te, vervék te, duhám te, thil a hnual zawnga la țhin te, huatna leh thíknaa khat te, dik lo tak a duhsak bik nei te, inthunun thiam lo te, mihringpui natna tura beih ching te hi an ni.


 A hun laia i fate i zirtir tam peih lo a nih chuan, thatchhiatna leh thu duhna rilruin an chhungril a luah hnem ber zel ang.

 Buan tur nei lova awm te nun a chiri duh țhin.

 A tlanglawn hriat zel a țha e, mahse, a nihna tak hriatchian chu mahni inrintawkna.

  Mahni phák chin a țanga hriatna zau zawk te chaldelh tum tu chuan a átna a pholang dér tawh a ni.

  Pathian hnenah i engkim kawltir la, i neih zawng zawng hlán vek ang che. A rinawm em a vangin i awm loh hnuah pawh i thlahte chhuan tam tak venghima enkawl thei tu a ni.

 Mihring a kawng lo tur lama a kal emaw, vanduaina kawng lam a zawh hian Pathian awm rin lohna a nei mai chauh țhin.
    Pathian hnaih rengtu chuan a kawng a thlang fel thiam zel ang.

Harsatna hmachhawn hi tlang sang taka lawn chhuah tum ang hi a ni a, sual chhuak tur chuan tumruhna neih a ngai thung.


Mi thatchhia leh thu duhte chuan, mi dangte laka chungnun an tumna lamah anmahni leh anmahni thu pawh an kalh nuai țhin.

A bulțhut a țanga a indawh dan ang zela dawhthei taka awm țhin chu, a awm hmun zelah thil tam tak a zir chhuak hman a, chhawr tura awhawm a nih meuh chuan, inhre lo pawh ni sela, a lo puitling hman tawh țhin.

Harsatna lian tham hmachhawn nawn tura fimkhur lo chu mi á a ni.

               

 Nu leh Pa zahawm chu an fate ngainat zawng leh ke chheh danin a hril țhin.

Thil țha lo palzamtu chuan a phurrit phurh tur a chhep vum zawk mai a ni.

A hun laia mahnin tawrh dawn loh mai vanga mi dangte phurrit phurh tir tu chuan, a thlahte kawng tur a tih pin sak mai a ni ang.

Dik si-ah thu inbuk tawk lo va kal nghal mup mup chu chauhna leh zuihralna.
     Thu inbuk tawk hria te lamtluang erawh teirei peihna leh hmuingilna.

Fakna awka hi fiah takin hriat tum la, chuti lo chu i hmasawnna tur a tan a tawp i khar hma țhin lutuk palh ange.

Mi dangte auh-phur chauha țanna chang hria chu naupang zia a ni.
     Mi dangte chakna pe thar tura a hun taka au phur theitu chu mi fing a ni.
      A hun leh hmun hre lo va mi dangte phúr-tír nghal tum ngawt zel tu chu mi á a ni.

Bible chhiar leh Țawngțai hian harsatna fiah takin ati lang thei a, hél tur nge, táwn tlang tur nge, inthiarfihlim san tur tih a ti lang țhin.

Ngun taka thu chík mí chuan, thil awm dan leh nih dan a tehfel a, a in țanna a țanga a thlir thui ber thlengin a thlir lawk thiam ngei ngei țhin.
    Thil thlir thui lo leh mahni ngaih dan chen chauh a kal țhin chu mi hnunga awmna.

Ka țhian, fimkhur la; a tawk chin hria ang che, thil chuan kalhmang leh huháng an nei a, a peng tin te pawhin a chhehvel boruak leh huhang an nei hrang ve vek zel a nia.

 Thil țha lo, him lo leh dik lo duh lo va dodal a rahbeh hi i thlahte himna tur a la ni.
                 

 Ruahmanna him leh kawng-hmang felfai tak chhúngah chuan, thil țha tam tak inrem fel dan tur a biru țeuh țhin.

 Thil dik lo leh him lo lam kawng zawh lui tu chu naupang tihmawh ang a ni a, Hruaitu tlak leh rinngam an ni ngai lo.

  Kan mihring puite hi kan țhan lenna tur thil tam tak kawltu an ni tih hre reng la, mi dangte țhan lenna tur dál khawpin an chunga lén tum ngai suh.

 Tu chhungkua mah hmusit nghal ngawt ngai suh. An hun an bawhpelh lui a nih ngawt loh chuan an tan hun țha a inher chhuak ve vek thei a nia.

 Hre si a thil țha lo a kal fé hnua inthlahrung niawm a thupha chawina hi mahni mualphona.
    Mi fing chu kawng engkimah a inveng thiam hmasa a, a tihsual palh te a siam țha nghal thuai țhin.

 Zapan hlo hi hnim satliah a chhiar tur erawh a ni lo va, mahse, rah chhuak tur thlai țhan tir thei lo tu leh zem hlum tu a ni.

 Chhungkaw din huna khaihlak thlen tir thei tur thil chu a hma lama la tawn hriat loh ang hial khawpa lo thlah lawk a țha ngai e.

 Ke pénna kawnga harsatna thleng hi thil awm ve reng tura ngaih a ni a, thil rel fel loh leh kalpui fuh lohna erawh chuan rei lo te ah ko pang sang tak hmazawn min thlen pui a, hél pawhin chutiang chu a awm tawh zel țhin.

Mi á chuan a birh tlut tlut a, hawi chhuahna chang a hre tawh lo.
    Mi fing erawh chuan a kawng hmang a hloh loh nan a en mil turin a hawi chhuak fo țhin.

 Thil thlir thiam tak, mahse, rinngam loh leh mi fing a chhiar tlák loh mí an aw

     

 Mi chak lo chu puih reng an ngai a, puitlin nan hun an duh rei țhin.
    Mi chak lo ni si lo va, mi chak lo anga puih ngaia awm tum reng mi chu a rilru a piangsual a ni.

 Kum tam te an fina, dikna an ngainat bawk chuan, an thlazara kal a nuam țhin. Mahse, felhlel a awm țhin chuan, a chungnung zawk Pathian zaha thil dik țan erawh ringtute tih tur a ni.

 Hmasawn a vanga hamțhatna hmutu chu láwm tur a ni a, mi chak lo te hnualna tur leh țhuanawpna thleng thei tur khawpa inveng thiam lo chu mi á a ni; tu ngaihsan mah a hlawh ngai lo vang.

 Kawrte thawm chu ri ringin a ri a reh leh hma a, luipui erawh a ri a zawia rei tak a luang țhin.
     Thil țha pawh ni se, kawng khat chauh hriaa ri buan buan ching chu a reh hma a, a reh rei hle bawk. Thilzau taka thlirtu leh hmasawn chunga ruahmanna siam țhin chuan rei tak an daih țhin thung.

 Chhungkuaah mipa hna leh hmeichhe hna thliar theih loh chang a awm țhin. Mipain a kawppui a chungtlak lutuk te, hmeichhiain a pasal laka inlak luling a tum ve tlat te hian chhungkua chu țhen hranin a awm fo.

 Faten eng emaw chen chu Pathian biak dan kawng an hre thei e, mahse, thúk zawka rawng an bawl nan a hringtuten mawhphurhna nasa tak an nei.

  I faten peih loh an ngah loh nana taimak i zirtir duh chuan, anmahni kaihruaiin thil tam tak thawhpui fo țhin ang che.

 Hruaitu țhá duh chuan a hlutna a ti pung duh a ni.
 Thil tluang tlam tak hi, thil kal dan leh awm dan nihphung tur a ni reng bik ngai lo.

 Kum tam lo te thu tlúkna siamin mite a tina thei a, kum tamte thu tlúkna pawhin mite a ti hnual viau thei bawk.

             

  Tuna thil dik tih vanga huatna hmachhawn hreh ai chuan, thil tam zawk tihtheih tawh loh huna mi tam tak lungawi lo turte hmachhawn hi hrehawm a tling zawk ang.

 Thil țha lo leh him lo palzam mai thei mi fela chhiar an awm a, Lalpa thu ang zela fimkhur taka nun hmang mi fel an awm thung.

 Finna hi tuin nge a hlutna tehchhuak tawh?
    Mi fingte hian hming lan nat hun an nei thei e, mahse, a hranin hlut hun an nei ve ngai lo.

Hmasawn si lo va sawisel tur leh vuina tur zawng reng chuan a dinhmun a siamțhat a ngai zawk a ni.

Thil sual zawng zawnga inthup zo lo leh zahtheih loh chhuaha langsar ber țhin chu chapona, duhámna leh ítsíkna a ni.

I chhungril ațanga thil țha lo langchhuak tur chu, a lan chhuah dawn hun i chhinchhiaha, i thunun theih hunah mi pangngai chungah i awm ang.

Vanduaina vang leh eng emaw vanga khawngaih hlawh an awm a, vervekna vanga khawngaih phúttu erawh chu thlauhthlák a ni ang.

Hremhmun leh Vanram awm lo sela, nuamtawlna leh mahni duh dan zela thawveng taka nun hman hi mi tinte buaina tur a ni zawk ang.

Thil chu kal kualpui theih leh kaihlek theih a nih țhin avangin, mi dik leh thil chík miten chhan chhuah hna an thawh a ngai fo țhin.

Hmasawnna chuan fimkhurna a țan kawppui reng chuan; a pénkawi theih ngai lo va, tlu tur khawpin a chhiat theih loh bawk.


Phìr hi an chhungten thawmhnaw in ang bel țhin pawh ni sela, an chhùngrilah an thil ngainat zawng a inpersan țhin.
     Pathian thu hian chhúng lam leh páwn lam lan dan inhne rem takin min awm tir thei.
A pawng a taka mi puitlingte awm dan zawng zawng lak ve ngawt hi puitlinna a ni lo, rei lo te atana thil tih hlawhtlin nan chauh a tlaka, rintlak leh rinngam ni tur chuan mahni'n dai ve a ngai thung.
    Naupiang hlim an puitlin theih nghal loh ang bawkin, tumah rintlak tur khawpa puitling sa an awm ngai lo.

Lei chung lama ila awm chhúng chuan tlu mah la, hmasawn turin ila tho leh thei e, lei chhungril lamah erawh chuan mahni duh hunah mihring a thawh theih tawh dawn si lo va.

 A hnual zawng leh a fel fai lo lam zawnga inhnem ngawtna hian eng rah țha mah a chhuah ngai lo, thi lo va ruanga inchhuahna zawk mai a ni.

 Mi zawng zawng ngaih dan a thuhmun thei lo, ngaih dan țha a piangah pawh mi tam tak an leng lo thei bawk, mahse, hmasawnna tura a kawng hmang erawh zawn theih a ni thung.

Khawvel hruaitu ni tur chuan beihpui thlák a ngai a, nihna pawh neih a har reng țhin.
    Pathian rawngbawlnaa chanvo chuan ngaihhlut a hlawh a, khelh chi leh ngaih dan hmanga siamrem a mawi ve lo, chuvangin Lalpan a dah ang zela hun hmang tur zawk a ni.

 An puitlin chhuah nana mi dangte tih sual palh ngawihsan hun a awm a, mi tumruhte erawh thurawn pek thiam a țha, an vawmzui țhin erawh zelthel leh miten rintlak lo va an ngaihte an ni țhin.

Thiamna bik nei mi chak lo te, an thiamna zawn zela mi chak kara an dah hi thil tih awm tak a ni a, mahse, an thiamna zawn ni lo va mi chak apiang bula dah hian rintlak tur khawpin a inchher puitling zo lo fo.
Thil țha lo sawichhuah hi, miten fimkhur phah nan an hmang a, mi tam tak nun chhan nan rah țha a chhuah thei.
    Thil țha lo tak tak zép puitu chuan mi tam takin an tuar a phal a ni.
    Hei erawh hria la, mi dang tana țangkai lo tur lakah erawh i hmui vengthiam ang che.

 Bible a țanga tehfung i lak loh chuan thil reng reng hian palzam sak theih turin chanvo an nei ve vek a nia.
     Hremhmun leh Vanram awm lo sela, thil engpawh thiang leh dik vek a ni ang.

-Ruataraltesiakeng