- H Zate
Mizo Film thar 'Norah' chu April 26, 2019 khan Lunglei khawpui-ah tlangzarh a ni a. Mi sawi a hlawh a, en chak an tam.
Tlangzarh a nih atangin en chakin mi tam takin an ngaihven a, a en tawhte zawtin sawi a hlawh a, en chak tak tak an am hle a, Aizawl-a en theih a nih hun tlumtea thlir takin an thlir thup a ni ber mai.
A nghaktu tan chuan mi nute khta pawh hi rei tak a ni. Mahse, nghakhlel taka an lo nghah chu a tak a thlen hunah erawh a hlu lawi si! le, Norah ngei mai chu April 30, 2019 zan-ah Vanapa Hall Aizawl-ah chhuah a ni a. Aizawl-a a vawikhatna a nih vangin en tum an tam a, sawi a hlawh a, ngaihven a hlawh tak zet.
A hun a thleng ta.. April 30, 2019 zan a ni a Vanapa Hall-ah mipui tam tak an fuankhawm a. Mizo film siamnaa thah thawh ve theihna tiin a man awm ngei chuan ka en ve a, 'Eng tak ang maw' ti chungin hall ka lut a. Ticket-ah Dar 7 Show tan hun angin a ziak a, Zan dar 7:30 ah hmeichhe aw mawi takin, a changtute inpeih loh vangin show tihtlai a nih thu a rawn puang a. Zan dar 7:40 a pelhin 'Norah' changtute koh chhuah an ni a. Mipuiin an lawm hle. Dar 7:45 velah mipui nghahhleh em em 'Norah' ngei mai chu a intan ta a. A intan atanga rei lote-ah thil an ei tir theih mial beisei tur ni awm tak khan ei theih tir mial a beisei a. Thil ei thei sa reng ei theih tir kha a la ngai fo em aw tih zawhna a awm. Thi ei thei reng Nula pangngai khan thil a ei duh lova, chumi chu tu emawin ei tir a tum a, a theih mial kha beisei awm tak a ni a. 'Ei tir thei(h)' ni awm takah 'Ei theih tir' tiin a ri a. Kan bengchhe ri a ni em lo turah ngai ang. Eng le khawle, en zel phawt mai teh ang!
Kan en a, kan en zel a, Mizo film thar 'Norah' ah chuan nuihna tur a tam a, a hmuhnawm a, ennawm a tling a, a changtute an zeiin an che a mawi a, han ip-na tur a awm lo. A changtupain a thiam a, a changtunuin a role a hnehsawh a, Bus Conductor pawh 'A thlawn mai maw' a a chan thiam tluk zetin 'Norah' ah pawh a chang thiam e! VFX hmuh tur awm hian a film en a tinuam a, a tihlu a. Aizawl Bus Station leh kawng laka an tlan laia pawn lam lo langte kha a zo tawng takin siamchawp a ni tih hriat miah loh khawpa an thiam khan film a tihlu zual. A tawp lamah a thawnthu leh chhun leh zan kal chak lutuk erawh a uiawm a, selna ni si lovin a khamawm loh!
A Film story hi Minister fanu duat sual tlanbovin a kal kawnga thil tamtak ala hriat ngai loh a tawn leh inthawnharh dan bakah khawvel kalphung a zir chhuahdan te leh a zinkawnga hmangaihtu tlangval fel tak tak a chhar dan chanchin te a ni.
He film story/script hi Kum 1935 a Samuel Hopkin Adams ziah 'Night Bus' short story atanga her rem leh phuah belh a film puitling script a siam a ni a, Mizo rilrem tur leh kan society mil tur zawnga siam rem a ni. Script leh screen play hi Mimi Lalnunfeli leh Mapuia Chawngthu te siam a ni.
He film hi Romantic Comedy genre a sengluh theih a nih rualin Dramaleh Action pawh hmuh tur a awm a, mi tin mil tura siam a ni bawk. Mizo Society ah chhungkuaa TV enho thin leh Seating room a TV dah thin kan nihna hre rengin a film siamtute hian naupang atanga puitling thleng pawhin en theih tura an buatsaih a ni.
He Film ah hian Mizo film hmuhnawm kan sawi apianga a hming lang fo Mapuia Chawngthu (Leitlang Pictures) chu Director niin Camera & Editing a khawih tel bawk a, he film ah hian 'Mapuia Mapuia a nihna' a rawn lang chiang leh hle. A film en a manhlaa, a hmuhnawm takzet. Director of Photography hi Vanropuia Pachuau leh Malsawma fanai(M Space) an ni. Costume Designer/stylish hi Mizoram huap pawh designer lar 'Magic N' Lunglei (Numami) niin ani hian changtunu hak tur bik liau thawmhnaw engemawzat bakah mo kawr thleng a design vek a ni, makeup artist hi Mawitei a ni.
He film ah hian hmelthar tam tak hmuh tur a awma, chutih rualin film lama kan hmelhriat sa leh lar sa pawh hmuh tur an awm.
Norah role play tu ber Esther Lalrinpuii Chawngthu hi lunglei nula niin, Mizoram Thalai Kristian Pawl (MTKP) film siam, "Where" (Human Trafficking film) ah khan a chang ve tawh a,tin a leading actor hi Isaak Chhakchhuak ani a, a ni hi 'Damna kim' film a ah khan lo chang tawhin zaithiam Bethsy Lalrinsangi nau a ni. C Lalremsiama (Latea) a'n Home Minister role rawn changin a changtunu pa a ni a, a ni hi Love Bethel film ah khan alo chang tawh a ni. Opposite party MLA role turu deuh mai hmuh tur a awm a, chu role chu Joe Chhangte in a rawn play ve thung a, a ni hi film lama a vawi khat lanna a ni.
Heng bakah hian Awmpui thinchhia Siamtea chu changtunute awmpui niin, Papuia Pachuau chu a changtupa thianpa ah a chang a, Mimi Lalnunfeli Thingtlang Tlangval' film a Cindy lem chang leh Norah Script ziaktu hian Home minister P.A lem a chang a, David Lalzawmliana (Zaithiam) in Bus cvonductor hnehsawh mangkhengin a chang a, a role a hnehzia chu ena fiah chi a ni, tin, an ni bakah hian Mr. Mizoram India 2019 ni mek, May 1 - May 8, 2019 chhunga Mizoram aiawha Man of the World India-a tel mai tur Jonathan Lalmuanpuia pawh langin Home minister bodyguard a nia, a inhmeh hle.
He film hi CK HYUNDAI Produce niin Film Budget pawh a tlem lo hle, Shoot hau tak leh harsa tak tak a awm nual a. Thla thum chuang ngawrh takin shoot niin, shooting naa inhliam pawh an awm a ni. Shooting na hmun hi Lunglei leh a chhehvel bakah lawngtlai leh khaw dangahte neih a ni.
He film ah hian mi lang an tam hle a. Leading role atanga minor role a tel hi mi 40 vel lai an ni. Mipui lan tamna scene thenkhat phei chu Salvation thalai pawl leh Home league te ruaiin shoot a ni bawk. A changtu tam zawk hi Lunglei mi an ni a, chutih rualin Aizawl, Kolasib, Thenzawl bakah khaw dang atanga tel pawh an awm nual. Tin, Heng a changtute hi screen test paltlang a uluk taka thlanchhuah vek an ni.
He filmah hian Mizo film danga la awm ngailo hmuh tur a awm nual dawn a, scene thenkhat ah hian VFX/Visual effects pawh hmuh tur a awm a. Sound & Light lamah pawh Norah ah hi a nep lo hle a ni.
Hall chhung ka luh dawn a, 'Eng tak ang maw' tia ka ngaihtuah chu a chhanna ka hmu a, ennawn leh hial ka duh! Sawi hlawh 'Norah' in sawi zui a hlawh. Sawi nawn a hlawh a, a en tawh ten en nawn an chak a, a la en ve lo ten en ve an chak! Hmuhnawm a tling a, en nawm a tling bawk a, nuihna tur a tam angin a entute mittui ko thei khawpin a thawnthu ah a chentir vang vang thei!
Ka sawi peih tawh lo, en ve mai rawh, thil hi chu 'hmuh hian a chiang ber' haha!!
A tha khawp mai
ReplyDeleteKan buai lutuk a. Keichu ka en ve hmanlo😂😂
ReplyDeletePost a Comment
He post chungchanga i ngaihdan lo sawi ve rawh: