"HNAM ROPUI CHAKMA"

- James Ramdinmawia

Mizoram aiawh MP (Lok Sabha) kan thlan apiang hian Chakma leh Tuikuk Vote hi Deciding Factor a ni ta fo mai! Tun hma-in Congress-in an lo hlâwkpui tawh țhin a, tunah MNF-in.

Chakma ho hi hnamah an chiang riau a, an tana țha tur a nih chuan Chakma ni chung siin Mizo National Front-ah Member an ni thei mai a, Mizo erawh an ni hauh lo. Tumahin hnam phatsan an ti ve lo. Congress Sorkar chhung zawngin Congress an ni ngar ngar a, MNF Sorkar veleh MNF-ah an inlet leh dual a. Congress an rawn Sorkar leh a, an inlet leh dual a, MNF an rawn Sorkar leh a, an MNF leh dual mai. Chutiang chiah chuan CADC Sorkar pawh State Ruling inthlak ang angin a inthlak ve zel mai a ni. Centre-ah BJP an la Sorkar zel dawna an hriat avangin BJP MLA an vawrhchhuak leh nawlh mai bawk.

Mizoram State MLA Seat 40 awmah Chakma-in Seat hnih chiah an chang a, chuti chung chuan Minister, Board Chairman, etc. an nei thei deuh reng. Mizo mipuiin an khawngaihna dilin Chakma Minister te Chibai kan buk luih luih zel. Hnam ropui tak chu an va ni em!

Mizoram State Sorkar hi Kristian Sorkar tih theih tur hial khawpin Kristian-na la urhsuntu leh Campaign-naah pawh sakhuana tlangaupuitute'n an form a ni fo. Chu Kristian Majority Sorkar chu Chakma ho-in an belh hian an hnam leh sakhuana a nghing turah an ngai ve lem lo, a nghing ngai lo bawk. Keini Mizote ve thung chu Central lama sakhuana la vung deuh Party kan zawm ve dek dek chuan kan hnam leh sakhua a nghing turah kan ngai nghal ringawt zel. Inlak hranna leh inhungbing politics hi Nationalism emaw kan la ti tlat. Chakma ho hi kan va tluk lo tak em!

Chakma ho hian MNF or Congress bèl duh lovin, anmahni Regional Chakma Party dinin inlak hran leh inhungbing Politics lo tuipui ve tlat ta se, Mizoram-ah hian nuamsa-in an awm tawh hauh lo ang le. Mahse chutiang inlak hran leh inhungbing (Regionalism) Politics chu an tan a țha lo tih an hre kar a, Ruling Party apiang an bèl a, an survive phah zel a nih hi!

Tlawmngai Pawl leh Zirlai Pawl ang te-in hnawk tiin do do mah ila Sorkar apiang an lamțangah an siam zel mai si a, an tan hlauh tur a awm lo. Hnam ropui tak an ni. An lakah hian Mizote hian zir tur kan va ngah em!