Aizawl | May 9, 2019: Nizan May 8 khan David’s Kitchen leh MZP tangkawp chuan David’s Kitchen Chanmari, Aizawl ah HSLC Toppers mi 20 te chawimawina hun an hmang. He hunah hian Pu C. Lalmuanpuia, MLA chuan Khuallian niin hun a hmanpuia, fuihna thu tha tak a hnen atangin ngaihtlak a ni. Tin, Tv. Lalhmachhuana, General Secretary, Central YMA chu Khual Zahawm (Guest of Honour) niin zirlai titha te chawimawina kawngah CYMA pawhin hmalak a tum thu a sawi.
He programme hi Baryl Vanneihsangin a host a. Upa Lalnunpuia Hrahsel-in hunserh a hman hnu ah B. Lalsawmzuala (Te-a Boitlung), Principal, New Horizon School of Education leh Organiser ni bawk chuan Inlawmna thu leh Introduction neiin hun tan a ni. Hemi zan hian Dr. Laldinsangi, MCS Topper, 2019 chuan tun kuma HSLC toppers te tan Inspirational Speech tha tak a sawi a, HSLC Topper neitu School Principal thahnem takin an telpui bawk.
HSLC Topper-te hnenah hian mi pawimawh leh langsar tak tak - Chief Guest Pu Lalmuanpuia, Guest of Honour Tv Lalhmachhuana, Pu C. Lalthanzauva, President, Mizoram Independent School Association (MISA), LV Lalthantluanga (Tatoa), General Manager, ZONET Cable Pvt, Ltd., Sheila B. Lalrinpuii, MPS Chapchar Kut Lady, 2019, Dr. Laldinsangi, MCS Topper, 2019, Pu Vanlalfela, Chairman, Education Sub-Committee, CYMA, B. Vanlaltana, Vice President, MZP leh Dr. Vanlalsiami, President, ZORO (Women Wing) ten lawmpuina an hlan a ni. Zanriah tuihnai tak kilho zui a ni bawk.
HSLC Toppers chawimawina hi David’s Kitchen hian MZP nen tangkawpin mi nawlpui hriat lohvin kum 11 zet a zawnin a lo kalpui tawh a, tun tum hi a vawi 12-na a ni ta a ni.
David’s Kitchen neitu Pu Lalhmangaiha chungah kal khawm leh mi sawm ten lawmthu an sawi rualin duhsakna an hlana, MZP lam atangin chawimawina thuziak an hlan bawk.
Stacy V.L Muanpuii, Nunu Chhangte, Sawmtea Chhangte, Feli Fanai, Kimkima, Ticos, Zorinzuali leh Mizo Dance Camp ten zai leh lamin toppers te an chawimawi bawk a ni.
Post a Comment
He post chungchanga i ngaihdan lo sawi ve rawh: