SARUAK PHÊNA THURÛK

- Toni Râlte

"Pasal ka nei dawn lo" a ti fiak ţhak a! A fiamthuah ngaiin ka lo nui suk ringawt. A mitmeng erawh a tak ngal thung si.

"Chuti chu nupui ka nei dawn lo tihna em ni?" ka ti a. Ngeiawm rawngkai lek lek hian min melh sawr sawr a. Nui lui tih hriat fahrana nui chungin, "I hmei nih te chu pawi ka ti hran hleinem. Nupui dinhmuna din erawh ka ngam miah lo" a ti ta tlat a! He nu hi a thutak ngang mai si a. Fiamthu a thawh tawhah chuan a la nuihzatthlak loh ber ang.

"Hmei atan chuan i ţha mah mah, Bawihtuai" ka han nawr fiam leh a. Zep loh chuan ka phurna kha a reh vek tawh. In atanga ka chhuah dawn kha chuan, nupui hual nei tura inngaiin ka phur hurh kha a nia. Ka zawi ta nguai mai. He nu hi neih ka duh tlat bawk si a.

"Boss, (Boss tiin kan inko ve ve) I hrethiam ve lo vang. Hriatthiam pawh tum buai duh suh. I mawl lutuk, nupui atana min neih te han tum reng reng" a ti ta zêk a! engmah ka hrethiam pha ta lo ve.

Hmeichhia zawkin inneih a duh loh miau chuan thinrim zawk kan awm lo thei ta lo. Lunghnur zetin ka haw ta kha a nia. Mut pawh ka mutui hrep lo ve.

"Zo'nsang, (ka hming Zonunsanga lam tawiin min ko thin) Tho teh, vat..hei thil entir tur che ka nei" he pa ve sek lah hi, tho hma thei ropui si. A ţhing rim a la nam zui. Phak chuapin ka tho a. Computer hmaah a lo thu leh vang tawh a. Ka best friend anih ve liau luau hi. A sakhmingah Vulmawia (a ţhing ka ti, a hming hi..

"Lo kal teh. En teh..hei he nu hi Lalzawnpuii a ni chiang tiraw?' tih leh ka lu kawihher a rual a. Screen-ah chuan, nula saruak thla a lo lang kulh a! a nalh em tih leh a kumkar a mawi em tih lam ka hre ve ta lo. A hmel paw phak, meng si sep leh a hnar ngul invuah dik thlup hnuaia a hmui vam ham leh a khabe lai taka khuavang chhinchhiah lo langte atang chuan, nizan maia nupui atana ka sawm chhuah zawh loh Lalzawnpuii ngei kha a ni tih ka chiang tawk! khatih lai tak khan engtin chiah nge ka awm ka hrethiam lo. ka vir muai muai maiin ka hria.

"Engtin nge ni dawn? I va hmu nghal dawn nge..?" a lo ti sek lehnghal.

"Vulluai, hei hi khawi atanga i hmuh nge?"

" A lar tawh rap. Zosap-ah an post a, ka hmu fuh alawm. Chuan ka lo thawn nghal che. Tunah chuan an remove tawh" a ti liam puat a.

"A mak hle mai" ka ti ngam ţâwk! A bak sawi belh tur ka hre lo. Ka zak a ni. Ka zak.

Kum 30 ka pel tawh, mahse, ka kum ngaihtuahin ka la puitling lo hle. A hmingin hna chhete ka nei ve a. Chu chu lungawi takin ka thawk ve thin. Chhungkaw hausa kan ni hran lo va, ka nu leh ka farnu te pahnih nen tlawng kan awm. Ka pa hian kum 23 ka nih kumin min boralsan tawh a. Ka u (hmeichhia) hian pasal a nei tawh a. Ka naute pahnih leh ka nu te nen kan la chengho ve a ni. Mipa lerh ka ni lo va, ka luck lem lo bawk. Zu ka in ngai lo va, huau huau lam ka timi lo bawk. Ka felfai hmel phian. Chutihrualin Kohhran hi a hming chauhin ka bel ve ti mai ang. Ţhian pawh ka ngah lem lo. Hmeithai kan nihna hian mahni inrintawk lohna leh inhmuh tetna min neihtir nasa a, khawiah pawh ka inthlahrung thin. Vula hi ka nu nulat laia a thiannu fapa a ni a, naupan lai atanga inkawm tawh kan ni. Ani tih lohah chuan kan thenawm tlangval upa ve tawh tak Pu Rema nen kan inhrut ve thin. Ngaihzawng hi pahnih ka nei ve tawh a, kan inchhungkhur dinhmun vang nge min bàn ve ve tawp. Ka tuar hran lo. Ka hmangaih lem lo bawk a.

Zawnpuii (Pui kan ti zel tawh ang) nen hian tihpalh takmeuhin kan intawng ti ila ka sawi sual awm lo ve. Ka farnu naupang zawk nen Vishal-a kan bazar laiin ka farnu nen an insu chawrh mai a. An tlu dun chiang hle. An nui tlawrh.tlawrh a. Ka lo khi ve hui ringawt. Tichuan, inbe pawpin thil te kan ei ho a. Anni pahnih chu an titi nghal siam siam a. Sawi tur ka hre ve lem lo bawk a, ka lo ngawi dûk ringawt.

Puii chu nula kum 26 awm vel in a lang a. A ngo hle, hmelţha tia han fak kur nguai tur chi chu a ni miah lo, mahse, zûn a nei kan tih ang chi hi a ni reuh a! a kareh chu a zau lek lek em aw ka ti deuh. A bak chu han sawiselna tur ka hre chuang hlek lo.

"U Zonun, ţawng ve ta che" a tih thut thawmah ka phu zuk. Ka lai ringawt. Mi ka hmachhawn hian an mita en chung hian biak harsa ka ti thin. Ani erawh ka mitah tak a en kal a, min be pah reng bawk. "Nula zahawm tak i nih dawn hi" ka ti rilru a.

Khata tang khan kan inhmu zeuh zeuh, Number kan inpe ve ta nge nge a. Chupawh a man min dil!

"U Zonun, i la virgin em?" ka phone lek vû chung chuan ka la virgin chian zia ka ngaihtuah a. Thudik hrilh ta ila min hmusit ang em tih pawh ka ngaihtuah ve tho.

"Gin e, nang?" ka ti ve thawr a.

"Aih" teh tawp a! biak zui dan a vang tawh asin aw..

An ina ka len hmasak ber ţum chuan ka zam asin aw. Khaw váwt pawh ni hlei lo ah ka khur ka khur nia mawle. A putea te inah a nu nen an awm ve a. Apa hian nupui dang a nei a niawm e. A sawi ţha duh vak lo va ka zawt thui ngam bik lo. A putea chu pa fel tak, ni thluam chi hi a ni a. A Piteii erawh ka hmu tar! A lang tar riau. A sualna erawh ka hre chuang lo. Nu zakzum deuh tak erawh a nih hmel.

Inbemna vel pawh awm lem loin inngaizawng angin kan awm ve tawp! Dik tak chuan zan khat ka leng haw min thlah ţumin hmelţha ka ti thar lutuk insum thei loin a huat loh mialah tiin ka fawp thut a! Min chhang lo va, min hnar lo bawk. Khata tang khan ka ta chei ve ta ngawt mai a ni. Amah pawh ka ta angin a awm ve mai bawk. A nuam ka ti khawp a, zantin ka leng a ni ber. A chhungten min be chhe bik bawk si lo. Amah Puii hian zirna a chawlhsan tawh a. Puanthui a zir thin. Chu pawh a kal regular vak lo. A hrisel lutuk lo bawk nen.

Kan awm dun chuan ka khi sûng reng zel, ka hlim thin êm a ni. Ka zei lo hle naa ka tihlim ve tho anih ka ring, min ngai der ve viau zel. A chhungte nen pawh kan inpawh tawh hle a, kan inah pawh vawi hnih chu ka hruai lut ve tawh. Ka nu nen pawh an inkawm thei fû.

Mahse..Hetiang saruak thlalak hi a lo thleng thut! mak tak a ni. Ka hamhaih vek. Ni e, vawi hnih chu sex kan hmang tawh. Hmana a virgin tawh loh thu a sawi kha engah teh vak ka ngai lo niawm a ni, tikhan duh takin ka ngaizawng thei ta mai kha ania. Sex pawh kan hmang lawk lo, hun leh hmun remchang kan hmuh fuh ţumah kan duhthawh deuh a, min hnar eih loh vang pawh a niang, kan chesual kha a ni ve mai a. Ka hnualsuat phah lo va, ka thlakhlelh phah sawt zawk. Amah aia ţha hmuh ka inrin tawh loh vang pawh a niang, a duh hian ka duh ngawih ngawih a ni ber e. Mahse, khatiang a saruak thla, mi zawng zawg hmuh theih tura pholan anih takah chuan ka rilru a hel ve ta deuh a. Ka hmu tuitang lo zo ani deuh ber, sex ka hmanpui thei mai te, kan nih hmaa virginity chungchanga kan titina te nen ka hmehbel chawp zel a. Puii chu mi hur ang thawthangin ka chhuah a ni ta ber mai.

"Inhmuh ka duh" ka va ti a. Chhanna ka dawng lo. Nupui atan ka sawm a. Min hnar a, a tuk maiah a saruak thla ka hmu leh nghal a. Ka tlawm takzet. Biak zui ka tum ta bik lo. Kan inngaizawng tih hre ho erawh ka zah thar khawp mai.

Kar khat lai a liam ta. Puii reh ta lutuk erawh chuan min timangang riau. Ka laka insawi thiam a tum miah lo chuan 'beiseina' tereuhtê min siamsak zawk tlat mawle! Ka be hmasa duh.tawh bawk si lo. Zep nàk emaw ka ngai takzet a ni.

Kan inbiak loh atanga ni 8 -naah ka hmu leh ta hlawl mai. Kan inah a mah ngei a rawn kal tlat a ni. A hmel chu a pawr phang a. Mutmu tuah tlem tih hriat zetin a meng phak chual bawk a, khawngaihthla te pawh a la deuh e a. Ka chhungten an lo hmuh chuan an hmela mak tihna lo lang chu ka hmu hmasa ber. Inthlahrun hmel takin a ding zum reng a. Ni danga ţawng siam siam zel kha a ngawichawi ta khwp mai. Eng pawh nise a sawi duh sawia ngaihthlaksak chu ka tum ta a. Rooma kaih luh ka tum mêk lai chuan; Vin ţhak, fiah fai tak hian, 'Lalzawnpui" tih ri kan hre ta a. Kawngka bulah chuan Puii nu leh putea an lo ding reng mai. Lungawi lohna lian tak an nei tih hriat takin an hmel a thim mák mai .

Engmah min hrilh lo bawkin min chhuahsan leh ta kha ania! Ka rilru chuan a hrereng a. Va zai tumna erawh ka nei lem lo. Tlangvala pumpa, saruak thlalak vanga lar mek bawh ruak ruak chu ka duh bik hauh lo.

Nunphung pawh a pangngai chho ţan ta viau. Social media lama Puii chungchang an comment-na te chu hmaih nei miah loin ka chhiar thlap zel a. Tumah chuan chiang takin am hre lo anih hmel. An veng chhung mi tam zawk chuan, nula zawiawi, pawisawi lo leh hlim thei phian si hmuhin an lo hmu vek a! Kohhran leh khawtlangah lah a phak ang tawka inhmang a ni ve bawk. Thil mak tak zawng a ni e.

Thla hnih a liam ta.

"Hmuh che ka duh" tih thu hi number ka hriat ngai loh atangin ka dawng nawlh mai. Tu tak ni ang maw..

Thli chu a thaw heuh heuh a. Nizan lam ka mut ţhat meuh loh vangin ka mit a thîp hle. Ral khata mihring lo lang chu ka va hmu phê ruai a. A lo hnai tial tial a. Ka mit ka nuai nawk nawk, a la ngai reng. Puii piteii a putea nupui Nu mawii a lo ni reng a! Ani hian min hmuh a duh thu a rawn sawi anih kha. Eng vang tak ni ang maw..

"Puii hi chhanchhuak rawh. A thi mai ang" a ti zawi sap a. A mitah chuan mittui a tling bawk. A kut zûr tawh lam chu a khal a khal a. Min en miah loin, "I hmangaih tih ka hria. I bulah a him ang" a ti leh a. Ka bo êm vangin sawi tur ka hre miah lo.

Ka hamhaih chhungin a kal daih! Ka mawl mang e. A hmanhmawh lutuk reng reng. Ka va um a. Ka hmu hman miah lo lehnghal. Ka thluak chak lem lo tak hian kawng a va bo si em.

Khuma mu chungin ka ngaihtuah kual a. Puii chu engvanga chhanchhuah ngai nge? Tu lak atangin nge? Ti nge a ngawih reng? Chhan neiin a ngawi em? Ka tho thut a. Ka chhuak vut.

An rin loh lutuk an hmuh vang ni maw..an meng phawk ngei mai. Puii awm leh awm loh ka zawh chuan an in melh ralh a. A awm loh thu hmangin min hnar a. Ngaihthat lohnain min tuam hlup hlup mai. Puii nu chu a vawi khat nan chiang zetin ka melh a, "Puii chu khawiah nge a awm?" Ka ti a. Hmana ngainatna mitmeng tel tawh miah lovin, "A thi tawh angah ngai rawh" a ti sup a. Ka khur thei hial mai. He nu leh puii putea te hian thup an nei a ni.

Zan 2 lai chu Aizawl khawpui suartluanin ka vak ka vak a. Zawn ka nei a. Hmuh inring lo ru siin zawn erawh ka bansan thei si lo. "Puii khaw nge maw i awm le?"

Vula nen chuan ngawi rengin kan thu tlawk tlawk a. Kan beng erawh kan chhi ru kar mai. Thawm chu a reh tlawk tlawk mai. Mahse, kan thil nghah chu a lo thlen ngei ka beisei tlat a ni. Eng a rawn awm a. A rawn eng phei zel a. Kan thaw huai mai. Nu Mawii chuan dim deuhin min rawn ko a. Kan ding vat. Kan pathum chuan, thlam lam chu kan pan ta tham tham a. Nizan mai khan, "Naktuk zanah kan huan thlamah kan kal a ngai" a rawn tih vangin ania hetia kan kal. Eng nge kan tih dawn kan hre lo, kan zui tawp a ni ber mai. Thlam chu a eng a, thawm erawh a awm lo. Thlam hnunglama zamzo par buk luih phênah chuan kan thu thap a. Thlam han tihah assam type a sak, lian lutuk lo, nuam ve tak tur a ni a. Mi hausa te thlam chu tluk lem lo mah se, han intihhlim nan chuan a fianrial a, a tawk ve viau mai. Kan birukna piah lawka tukverh chu a ri khap a. A rawn inhawng a. Kan tawm chawih mai.

"Boruak chu a nuam hle mai.." Puii putea aw ngei a ni. Ngik feih feih thawm kan hre zui a.

"Mawii khan min ringhlel tlatin ka hria, an rei angreng bawk sia; awm rei ka duh miah lo sin le" Puii nu.

Vula nen chuan engmah kan la hrethiam chuang lo! Kan sakuh ser nghah ve tlawk tlawk a ni ber e. "Ni ngawt mai. Ka'n call leh chhin ange" Puii Putea (Pu Rama) chuan a ti a. A phone chuan ngaihsaktu a neih loh vangin a phun hlak a. Chhuatah an vei a nih hmel. Chutih lai tak chuan ngik feih feih thawm kha a rawn ri leh a. A hma aiin a ring.

"Hrethiamin ngawih kha tum ve mai ni la chuan, hetiang hi a thleng lêk lo tur..i luhlul tlat si a. Ti lo thei lo dinhmunah min siam a nih hi" Pi Siami (Puii nu) chuan a ti a. Tu tak bia ang maw...puii a nih loh takah..

"Ţap suh. Per pawr che hian..nangmah vanga mualpho hi ka duh reng reng lo. I pitei'n a lo hre hman lo te hi ka lawm asin. Kumin chu a daih tawh lo ngei anga..engkim saw ka ta a ni tawh mai. " Pu Rama chuan tiel fahran hian a ti leh a. Nu Mawii chuan ka ban a rawn hmer ngawt ngawt a. Engmah a sawi lo.

"Em em a..anni hi an lo kal dawn lo aniang. Zawng chhe ho chu..kan nghak rei tawh lutuk. Engtin nge ni dawn?" Pu Siami chuan a ti hlawih hlawih a. Chutih lai tak chuan chhuat chu a ri deuh ţawk a. Rum hawk ri a lo chhuak nghal a. Per dawt dawt thawm leh patling thinrim inhrosa chu ngaihthlak a manhla lem loh. ..kawngka a in hawng ţhuai a. Ţap chunga tlan thawm chu ka ngaithla thei tawh lo . Ka ding phat a, ka tlan ve ta mai.

• Vula'n min rawn kuah thawk a. Thawm chhuah si lovin kan in elh ngat ngat mai. A tawpah min hnuk ţhu thei ta hram a. Zaizirin ngawi turin min ti bawk.

"Eng ang pawhin min sawisain min hralh bo pawh tum mah ula..in tenawmna leh in thiltih hian a la timualpho tho ang che u. Min that law law rawh u" Puii aw ngei mai chuan a rawn ti fiak thak a. Na taka a bianga ben ri niawm takin a zui nghal zat.

"I zak em? Tlan chhuah ka tum e te i lo tih..nangmah vang hian kan buai rei lutuk tawh. A tawk tawh.." Pi Siami bawk chu..

"Nu zawng zawngah nang aia tenawm leh rapthlak hi ka la hre ngai lo. Thi rawh...zawngi" a chil a chhak ni ngei tur a ni. A biang chu a ri mawlh mawlh mai. Ngaihthlak reng a va har tak. Min chelh tlat bawk si. Puii ka chu an hnawh nge thawm a awm leh ta lo.

An mi nghah te an lo lang thei si lo. Hawn an tum nge tukverh an khar a, an rawn chhuak ta a. Kan thaw huai mai.

Rang fahranin in chhungah kan tlan lut a. Puii ngei mai chu chair ah phuar hlawma a ka hnawhsakin a lo thu hlawm reng a. Kan phelh sawk sawk a. Ka khur hlawk hlawk thei. Ka bangbo takzet a ni. Nu Mawii nen chuan in kuahin an han ţap dun hlawp hlawp a. .

"Eng pawhnise, inah ka awm lo tih an hriat hma ngeia ka hawn a ngai. Engtin nge ni dawn?' Nu Mwwii chuan a ti a. Vula chuan a kai vut a, bike in an inphur haw ta vut vut anih kha. A thleng rang teh e..kan pahnih chiahin kan awm ta. Sawi tur a tam si. Bulţan dan tur erawh a vàng mang e.

"Puii" ka ti sup a. Han sawi leh mai tur ka hre lo . Thla engin a hmai chu chiang takin a rawn kap fuh a. A mitmeng fiah kel kawl kara eng emaw inphûm chu ka feel thei. A ţawng chhuah hun erawh ka nghak ang. Chulai hmuna awm reng chu thil tih chi a nih loh avangin ngawi rengin ka kai a. Min zui ve mai. Kan in lamah ka phur haw ta tawp a.

Ka nu te an lo mu tawh naa an rawn tho leh vek. Kan inru angah an ngai tih ka hre thei. Mahse, tawi fel takin ka sawi fiah a. Mut phawt thaa ka hriat vangin mu turin kan intintuah ta a. Sitting room Thutthlengah mut mai ka tum a ni.

"Enteh..i ngaithla duh em? " Puii chuan a rawn ti teh tawp a. Sawi turin a inpeih takzet em tih fiah tumin ka han melh ren rawn a. Ka lu ka bu ta nghut a. In hmatawnin kan thu dun a. A aw a then lai mekin Lal vula aw kan hre zui a. A'n chawl leh ren rawn a, Vula chu kan bulah a rawn thu chawpchilh a.

"Kan him e" a ti sap a. Kan lawm kher mai.

"Ih..dik tak chuan, (a hnuk a ulh vangin a hrawkah hnawhtu a nei)..ka nu hi ka nu a lo nih vang hian pawi ka ti. Ka zak a, thih daih ka chak thin. Kum 5 lek ka la nih laiin ka nu leh ka pa te inhau thawm ka hria a, nasa theihtawpin an in hau a. Hlau leh kimki zetin ngaithla lo thei si lovin ka lo tawm chawih chawih a. Ka pa chuan, "I fanu nen hian kal bo rawh u. Nang ang mi lepchiah, bum hmang tenawm lutuk hi ka chenpui thei tawh lo che" a ti khur khur a. Ka pa mizia ka hriat tawh sa vangin mak ka ti lo. Ka pa hian chhete maha min ngaihsak ka hre ngai lo . Min hau vak ngai lo naa thenawm naute nena min en dan a danglamna ka hre ngai lo . Ka ngaina ngai lo reng bawk. Ka nu chuan eng em em a sawi ve lo. Tichuan, chumi zan chuan ka nu nen kan chhuak ta a. Ka putea te inah kan lut a. Putea chuan min duat bawk a. Nuam ka ti. Chutih lai chuan putea te chuan fa pakhat an nei a, a la te bawk a, nau ka awm nasa thin.

Ka pa erawh a chanchin ka hre ngai lo a. Ka ngaihven ngai hek lo. Min duh lotu na ná nà chu ngaihven ka tum bik lo. Ka nu chu a sumdawng thin a, a hlawk ve thin hle. Piteii pawh a fel, vawi khat erawh putea'n a beng hawi sawk lai ka hmu a. A chhan erawh ka hre lo. Ka nu leh putea chu an zin chhuak fo a, piteii bula ka mut hi a tam zawk mai thei a ni. Duat pawh min duat. Kei pawn ka ngaina.

Kum 14 ka nih kumah ka nu hian bialpa deuh reuh a nei ve a. A rawn leng zing thin khawp mai. A fel duam duam bawk a, ka haw hran lo. Mahse, chu pa a lo lan atang chuan kan chhungkaw boruak chu a chhe riau hian ka hre thin. Sawi chhuah ni si lo hian kan in up run ni hian ka hre thin. Putea lah zu a in ta fo a, piteii kut a thlak zeuh zeuh a. Ka nu nen kan chhan thin. Ka nu chuan putea chu a hau hrep zel a, vaw khat phei chu a hmaiah a beng nghe nghe. Putea chuan a farnu anih vang nge engtinmah a ti ve lem lo. Kei pawh school ka la kal ve zel a.

Ni 23, Aug a ni a, (A maimichhing vang vang a..a kut a hum ngat ngat bawk) ruah a sur deuh reng a. Ka lu a nat êm vangin haw ka dil a. Ka haw a. Kan in chu a lo reh ţhap mai a, Piteii hi chhuah ve zeuh a chin avangin mak ka ti hran lo. Kawngka erawh a inkalh lo a. Ka room lam ka pan lai chuan hmeichhia leh mipa nui thawm ka hre ta a. Ka putea te room atanga lo chhuak a ni. Ka uniform ka hlip sawk sawk a. Ka mu ta a. Mahse, room lehlam maia thawm chu a ring ta viau mai. Nupa nun hmang thawm ngei a ni. Mipa chu putea a ni tih ka hre thei mai, mahse, hmeichhia zawk chu piteii ang lo tlata hriatna ka nei a. Buaina ka duh loh vangin mutthilh ka tum leh a. Mak erawh ka ti angreng, ka thawm pawh an hre miah lo ania! Kawngka an kalh bawk si lo. An ngampat dan chu ka zah zawng tak a ni.

"Sanga hi kan tan hmanraw tha lutuk a nih hi. A awm lai tal hi chuan insum ve rawh" Ka thu hlawl mai.

Ka nu a ni tlat! A mihring sawi pawh chu amah ngaizawngtu Pa Sanga ngei a ni.

"Thikthu hi duh duha thunun theih a ni hleinem" ka putea !

Mak hi ka ti ngawih ngawih. Ka mumang anih ringin ka insik a. Mumang ram a ni der si lo. Ka tho ţhem ţhem a. Room lehlam kawngka an kalh si avangin enthlakna tur ka zawng ta a.

A hnungzang ruak kàng mai ka hmu a. Ka putea hmachhawn zawngin a thu bawk. Ka putea paw'n kawr a ha lo. Ka dang a ro zo, ka luak a chhuak ut ut bawk. Ka lu rawn hai muai muai vang chuan ka khawhmuh a thim ta ruai ruai a. Auchhuah loh hram erawh ka duh.

Ka harh chuan ka khumah ka lo mu tawh a. Engtia rei nge ka lo mut ka hre lo. Khum bula Piteii ding chu ka han hmu a. A lo nui sang a. Ka thinlung hi a na sawk.

"Thil ei tam rawh ka tih thin che kha..i putea leh i nu awm lo phei se chuan engtia rei nge nikhaw hre lo va i lo awm ang" a ti hluk hluk a. Min ngaihtuahzia ka hria, ka lung a chhe thut. Ka khawngaih lutuk. Ka nu chu juice kengin a lo lut a. A mitmeng phelh phang chu ka hmuh hmaih hauh lo. A ngawi reng thung.

Kha hun tenawm, bawlhhlawh atang khan ka nun chu a danglam tan a. Piteii ka zah a, ka nu leh putea ka ten bawk. Ka hlim thlawt lo a ni. Thuruk puangchhuak turin ka huaisen bawk si lo. Pa sanga pawh a la rawn leng kal reng a, ka lainat ru thin. Engmah ka hrilh ngam bawk si lo.

Zan khat chu piteii nuţa a boral thut vangin an chhuak diak a. Kei leh putea fapa Sena nen kan awm a. Tv ka en mai mai a. Ka lo muhil daih niin, ka harh chuan Sena pawh thutthlengah a lo mu ve bal a. Pawi ka ti khawp mai. Ka ngaihtuah turin an hnutchhiah ve em em a.

Ka tho a, Sena, ka rooma pawm phei ka tum lai tak chuan, putea te roomah thawm a awm leh tlat! Ka hlau deuh a. Mahse, nuamti awrawl a ni! Hrep taka!

An va ngampa ngawih ngawih tak, tun ţum chu hlauh ka nei miah lo. Room kawngka ka va chhir zawt a. An kalh ţhak lo lehnghal. An rawn hawi rual ţhawt a. Ka va pan sauh sauh a. Ka theihtawpa nasain, "Hetiang em em hian in lo rapthlak a ni maw?" Ka ti a. Ka khur dawt dawt mai.

An tho a, inha chuang miah loin, "I hre tawh a, khatia makti vaka awm a ngai em ni?" Ka putea.

Sawi tur ka hre hauh lo. Min kuai thu a. Min karcheh a. Ka nu chuan, "Bawihte, he thil hi i tan pawm a harsa ang tih ka hria. Mahse, i putea nen hian kan inhmangaih a ni. Thuruk tawp khawk ka hrilh ang che. Nang pawh hi i putea fa i ni" a ti ta mai! Ka thidang lo chauh a ni.

"Ni e. Engkim hrilh tur che hian kan huaisen tawk lo a. I nu leh pa an inthen chhan pawh i pa khan a fa i ni lo tih a hriatchhuah vang a ni"

"Piteii hi" ka ti mawl tawp.

"Ani chuan rinhlelhna chu a nei. Mahse, fiahna a la hmu lo"

"Ka hrilh dawn" tih leh thawh ka rual a. Min pawtthu dun chiang kher mai.

"Tunah chuan ni lo e. Hriat hun a la nei dawn tho alawm"

"Unau in nia..eng nge..."

"Hehe..bawihte, i putea nen hian hrin hrang kan ni alawm. Kan nu a hrang asin..nangmah ka pai tirh che khan i piteii nu leh ka pa (ka pu) hian an thutiam hlen nan i putea leh i piteii hi an inneih luihtir a ni. Kan inkar engmah an hre lo bawk. I putea rilru na leh lungawi bawk si lo chuan rei tak nupa nun pawh a hmanpui duh lo a ni. Khatia a fa ka pai tak siah chuan, a pa puh mai tur kha ka hre dawn si lo a. I pa khan tihtakzetin min ngaizawng ve bawk nen. Ka nei ta ngawt a nih kha"

Thudik an sawi anih pawhin ka ten tho tho. Ka haw lutuk. .

"Kei chuan ka pawm ve chuang lo, engkim ka puangchhuak dawn" ka ti a. Ka tho a. Room ka chhuahsan ţêp tihah ka lu a rawn hik mawp a. A thim ta vek a ni.

Ka harh leh hnua ka hriat hmasak ber chu ka kap na vung vung a ni. Ka chunga thil thlen dan ka hriatchhuah phei chuan thih ka duh a. Ka á lo chauh. Ka putea ngei chuan ka nu hmuh lai ngeiin min pawngsual a nih chu! ..

Vauna chikim nena nitin min vaua a khat tawka min pawngsual reng takah chuan, ka àt phah ta hial a! School ka kal thei lo a. Inah ka tawm ta chawt mai a ni. Ka piteii chuan min duat em em a. A chang chuan engkim a hre ve ni hian ka hre thin. Hrilh tumna pawh ka nei tawh lo. Ka hrilh tih an hriat rualin min pawngsual lai video kha an tlangzarh dawn si a. À mah ila, mualpho ka hlau ve tho. Á tak tak ila ka ti mang e.

Hun a kal zel a. Nau pawh vawi hnih zet kan titla tawh. Ka nu chuan min thik ta hial a! A chhan chu ka nu laka phuba lak nan ka chhe vek tawh tho tih rilru pua putea ka dawnsawn thin vang a ni. Ka nalh a, ka itawm si a. Putea chuan ka nu upa tawh lam ai chuan min ngheng tam zawk si. Saw in chhungah sawn mipa pakhat kha hmeichhe pathumin kan inţawm a ni ringawt mai.

Mahse, nikum hmasa khan kan Kohhranah salvation camping a awm a. KTP hruaitu te nawrna vangin ka lut ve ta a. Ka piangthar ta hlauh mai. Ka thiltih tawh leh nunhlui zawng zawng avang khan ka hrehawm a. Sim hmak ka duh ta a ni. Chu chu putea leh ka nu bulah ka sawi. Ka nu chu a lawm, putea erawh a lawm kim tlat lo. A hmei a chán dawn miau a! Mahse, engmah a sawi lo. Piteii lakah that ka chhuah nasa a, bat tam tak neia ka inhriat vangin.

Tikhan hun a kal ve zel a. Puanthui te ka zir ve a. Mipa tumah ka nunah lakluh ka duh ngai lo. Ka inten avangin. Putea pawn min beisei ngam ta miah lo a. Video kha tlangzarh pawh nise hlau hauh lova ka hmachhawn tawh dawn vang pawh a niang e.

Tikhan nang nen (min rawn melh a) kan intawng a. Hnar che ka duh em em rualin mipa dang lakah danglamna i nei a. Mi dang ta ni turin ka phal thlawt lo che a ni. Sex hial ka hmanpui leh che a. Ka nun a tlahniam leh ta viau! Chán che kha ka hlau si a.

Khatia nupuia min sawm zan khan putea'n nasa takin min vau leh a. A hmaa min lo vau lawk tawh vang leh nangmah thlenga i tawrh ka hlauh vangin mak pui puiin ka chhan che kha. Kha kha kan tawpna ni turah ka ngai a, mahse, putea chuan ka inlamlet leh a hlau ngang aniang, min vau leh a ni. Tin, min sual leh a. Piteii'n min pháwk ta nge nge anih kha.

Hmun danga kan sawi darha mualpho a hlauh êm vangin, piteii pawh kut a thlak nghe nghe. Khamizan khan mawlhtu a nei nge..ka saruak thlalak a tlangzarh ta hial anih kha. A hnuah khan a inchhir lutuk a, mahse, a nih tur ang a ni vek tawh si. Ka nu nen an inhau nasa a, ka chungchang an rel ta bawk a ni.

A fanu ka ni a. (An sawi hi a dik chuan). Mahse, vai sumdawng hnena min hralha ka awm awma awmtir min tum ta a. Ka nu ze diktak a lo lang bawk. In hriat tawh ang khan piteii hi nitin a nunna an chhat hret hret zel a. A in turah damdawi an phul thin. Ka awm chuan ka veng zel a, awm loh chin ka lo nei ve thin si a. Ti sawn zawi zawia thihtira, in leh lo saw neih an tum a ni. Kan awmna saw piteii ta a ni miau a!

Tichuan, kei chu pawn chhuah an phal lo va, khungbeh ka ni ta a ni. Piteii chauh ka lamtang a ni a, ani lahin tihtheih a nei si lo. Kan chhungkaw thuruk a sawi chhuak ngam bik si lo. A chhan chu putea hi tihtakzetin a hmangaih a ni.

Zaninah khan thlamah min hruai a, min hralh an tum zan a nia. Ti khan thil a thleng anih kha..." Tui a in khawlh khawlh a. Rapthlak kan ti ngang aniang, vula nen chuan sawi ber tur pawh kan hre lo.

Chumizan chuan a riak ve ta phawt a.

A tukah ka chhungte pawh engkim ka hrilh a. Ka nu chu a rilru a buai deuh tih ka hria. Mahse, engmah a sawi lo. Police Stationah kalin FIR kan thehlut ta a.

Thil a thleng zung zung mai. Tunah chuan central jail-ah mi tenawm pahnih chu an awm ta vang a. Puii erawh a piteii te nufaza nen lungmuang takin an chengho a ni.

Engtikah emaw chuan ka nupui a la ni ve mawlh ang chu..