Mizoram Assam ramri chinfel a nih theih nan MZP in hmalak zel tum

Aizawl | April 26, 2019: Vawiin April 26, 2019(Zirtawpni) chhun dar 12:00 khan MZP rorelna sang Federal Council Sitting vawi 51-na chu MZP Conference hall, Aizawl ah hman a ni.

Rorel inkhawm hi MZP General Headquarters Vice President B Vanlaltana chuan a kaihruai a, MZP General Headquarters General Secretary Pu Lalnunmawia Pautu- in pawl hmalakna hrang hrang leh rorel palai kalte inchhiarna hun neiin, MZP General Headquarters President L Ramdinliana Renthlei chuan thu a sawi bawk.


Mizoram chhung leh pawn atangin rorel palai 103 an kal a. Rorel palaite chuan MZP hmalakna tur hrang hrang an pawm.

1. Mizoram Schedule Tribe List enfiaha siamthat a nih theihnan MZP in hmala rawh se.

2. MBSE hnuaia Zirlaibuah Zohnam ziarang thahnem zawk telh anih theih nan MZP in hmala rawh se.

3. Mizoram chhunga hnamdang dan lo a lolut te dapchhuah a, hrem an nih theih nan MZP in hma la rawh se.

4. Mizoram chhunga Telecom Company hrang hrang ten tun aia Service tha zawk mipuiteah an pek chhuah theih nan MZP in hma la rawh se.

5. Mizoram Education Department-in Zirtirtute transfer and posting rules mumal zawk aneih theih nan MZP in hma la rawh se.

He huna thusawitu  MZP General Headquarters President L Ramdinliana Renthlei  chuan, "Mizoram a zirna siamthat a nih theih nan MZP chuan hma a la thin a, MZP hmalakna kawngah zirtirtu semrual a nih theih nan theihtawp kan chhuah thin a Sorkar kan hrawn apiang hian zirtirtu semrual an ngam lo thin hi MZP chuan pawi kan ti hle a, zirtirtu semrual kawngah hian eng sorkar mah hian hma a la ngam lo ah kan ngai a ni. MZP chu Technical Course hrang hrang Mizoram quota a zir tur thlan chungchangah a dinna ngaiah a la ding reng a, The Mizoram(Selection of Candidates for Higher Technical courses) Rules hnuaia ram leilung fate awmna tur Category-I-ah ram leilung fa ni lo an tel hi MZP chuan engtikawng mahin a remti ngai dawn lova, hnam dang nen a huang khata kan awm loh nan hma kan la zel dawn a ni." a ti a.

L Ramdinliana Renthlei chuan, "Mizoram leh Assam ramri chungchanga MZP hmalakna pawh a la kal ve bek bek a, Sorkar kaihhruaina hnuaiah Assam-Mizoram ramri ngaihtuahtu tur Core Committee te siamthar leh in hma lak ve zel a ni a, kan beisei leh kan duh anga hmalak chak a har thin hle a. Mizoram Sorkar thar MNF Sorkar pawh hi Zophai Bairabi hmun tlawh ho turin vawi tam kan sawm tawh a, Chief Minister hnenah pawh kan thlen tawh a, Home Minister hnenah pawh vawi tam kan thlen tawh a, a bialtu Minister pawh sawipui a ni tawh a ni. MZP in vawitam Sorkar tlawhpui a kan sawm tawh chung pawhin Sorkarin min la tlawhpui thei lo tlat hi a mangan thlak kan ti hle a, kan Sorkar hian ramri a vei lo hle ah kan ngai a ni. MZP chu kan dinna ngaiah kan la ding reng a, kan ramri chinfel a nih theih nan hma kan la zel dawn a ni. Zoram hmun hrang hrang a MZP hruaitute chu kan awmna hmun theuh a ram leh hnam leh zirlaite tana kan theihna hmang zel turin ka chah duh che u a ni."a ti bawk.