Zofate chawlhbuk - A na, a thar leh ṭhin

- Hmaa Hauzel

  Vai hoin dim lo baksaka min vuakna hliam kha a na reng lova, mahni ram ngeiah vai ngam lova kan tlawm vang khan thinlai a na thar leh ṭhin zawk

   Zo phaia Mizoram Chief Mister hmasaber Pu Ch. Chhunga phai huam chhungah Zofate chawlhbuk sak a lo ni tawh ṭhin a. Assam police ten an ṭhiah zui thuai thin vangin a ding rei ngai lo thung. Ramri humhalh chungchangah Assam sorkar hmalakna fak tlak a ni a, an tuan ṭha a, an che rang a, an huai bawk. Mizoram sorkar erawh chuan an ngaihthah a, an che muang a, an dawih zawk bawk a, demtlak an ni tak zet thung.

   Assam police ten an thiah darh tak Zote Chawlhbuk din thar leh turin MZP chu March ni 8 khan thapui tawhin an fehchhuak leh a. March ni 8, chawhma lamah Zophaia MZP motor thleng hmasa leh hnatlang tura thleng hmasate chu Assam police ten dim lo baksakin an sawisa nghal chiam a. Asam Police te hian Journalist thlengin an vaihma fai vek a, kum upa leh hmeichhiate dimdawihna an nei eih hek lo. Assam Police hliam tuarte hian damdawi in lam a pan nghal chuah chuah a. Zirlai leh Journalist ten hnamdang kut an tuar thawm hian a hun laia Mizoram bengkhawn a hlawh lo hle. Hei hi khawvela thil mak pariatna a ni hial awm e.

   Assam police te sawisak vanga hliam tuar an awm bakah bungraw chan fai vek an awm nghal nawk. Hak lai chauh nei tawh, nithum chhung pheikhawk phelh miah lote an awm bawk.

   March ni 8 ah Zofate chawlhbuk sak tuma hnatlang ten sawisak an hlawh tak vang hian inrawnkhawmna leh indawrna neuh neuh neih chhunzawm a ni a. Zoram hmun hrang hrang atangin hnatlang tur an thlen belh zel a. Phai lei daiah mut mu tuah in, silpoulin zar hnuaiah eirawng inbawl chawpa rem leh rem lo chunga inkhuar mai mah nise march ni 9 a thlen meuh chuan hnatlan tum an tam hle tawh thung. Chung mite chu kan pi leh puten lu chhum bam chhum huam a an zah zau, Mizoram humhalh nana thah thawh a, ramri humhalh nan tha leh tui sen ve hrim hrim duh, ram leh hnam hmangaihtute an ni. 

       March ni 10 a lo thleng a, tukthuan ei hnuin tawngtai rualna neih a ni a. Zana puanhlap sin tur pawh changkim thathum lo, lehkhakhawng phaha mute chuan Zoram venhim a nih theih nan Pathian an au va, Mizoram sorkar au eih thei lo mahse ram min petu Khuanu tal auh eih ngei an tum a ni.

  Tawngtai rualna neih a nih hnuin ramtiam lam an pan ta. MZP Office bearer ten chartin puin hma an hruai a. Ralthuam tha tak tak nena infam, vai ho chu kut lawngin an hmachhawn a. Huaisen taka hmalam pante chuan Assam police za rualte tihbuaina karah Zofate chawlhbuk sa tan turin ban pahnih an phun thei hram a. Nungrawng taka sawisak an hlawh bakah silai hial a puah tak vangin tlawm la tak chunga insaseng mai a tul ta thung. 

Assam police te hian Zofate chawlhbuk saa hnam hnatlanga thawkchhuakte dindawihna tel hauh lovin an sawisa a, pakhat phei chu kah hliam a ni. An khawih phaka awm tawh phawt chu a na thei ang bera sawisak tum in, a na awl tur lu an tum bik chat a. Nunna lak an pawisa lo hle tih a hriat reng mai a. Khatiang taka chhantu nei lo an diriam khan thin a tina thar leh thin. Hmeichhia an vuak te rawng rawng te, kum upa lam, insaseng hleithei lo an  chhipthlak awrh awrh te, chauh luat vanga kal thei tawk tawk an vaw thu hnawk hnawkte, Assam police in Mizo police let tura  a hawi vanga let ta hnak hnakte kha mitthlaah a lang nawn awm awn a. Thinlai a na thar vawng vawng a, thim a rim thar leh teuh thin.

   Mihring mihrinnaa kan ngam a, kan zuam em em, Mizoten ngam ena kan en Vai laka patling han tlanchhiat duai duai mai khan rilru a van nghawng thui tak em! Mahni khum laizawlah ngei tlawmah kan la thar a, nupui fanaute lakah a rukin inngaihhmaina a awm a, kan zak ru chem chem fo mai. March ni 8 leh ni 10 ah vai kut tuar a, sahimna zawnga kan tlan tawk tawk hnu thla khat dawn kha chu Silai tha tak neih a, Assam police zu ralsai ka chak ber a ni reng. Zalenna sualtu hnam sipai zahawm tak takte kha mi tute emaw chuan 'India laka tlawm' tiin an sawi lui talh thin. Mi tute emaw ngaih anga Ram ropui India laka tlawm kha a lo zahthlak vak miah loh State khat ve mai, Assam lakah tute emaw chu an tlawm chiang ve em a!

*Zofate chawlhbuk leh Politics*

Zofate chawlhbuk sak a ni a, chhantu nei lo zirlai ten hliam an tuar a, silaia kah hial an tawk hian Mizoram mai ni lo, zofate chenna ram a nghawr chhuak  nghal vek a. Ram hrang hranga zofate thlir leh ngaihven rawn chu Zophai a Zofate chawlhbuk a ni. Hnam hnatlanga thawkchumhuak ten sawisak an tuar hian zofate thinglut a deng dawt a. Thian chhan thih ngam, Mizote Mizona kha chhawh thawhin a awm a. Zofate zinga silai kengte pawhin hnam hnatlangah fehchhuah an hreh loh hlawm viau bawk. Zofate thinglunga Zofate chawlhbuk saka awm chuan Zofate zai khatin min luantir a, min phuar khawm thar leh a ni.

      Heti khawpa zofate chawlh bukin ngaihven a hlawh vang hian Politics ah pawh nghawng thui tak a nei a tih theih ang. Zofate chawlhbuk sak vel lai khan khatihlaia Mizoram sorkar a mi chak leh langsar tak pakhat chuan an sorkarin Zofate chawlh buk an sa puitling a, an dintir thei a nih chuan an invawrh theih hle tur leh an dintir thei lo a nih erawh chuan an tlukpui tur thu a sawi a. Tawng pachhiat pawh ni lovin, ram ri humhim kawngah an hlawhchham chian em vangin tun hi a thleng ta a ni ber. An dinhmun kan hre vek a, zep thu a cheng lo ve!

        Khati khawpa Mizoram chhung leh pawna Zofaten kan ngaihven rawn Zofate chawlhbuk kha a hun laia Sorkar khan ngaihsak in, huaisen takin zirlaite thlavang an hauh bakah an venhimna huaiah sak puitlin ni chiah sela chu politics ah pawh khitah invawrh theihna hun tha tak an nei a. An chet Chukchu tak em vangin khita awm thei kha khu tah an awm ta a ni ber. 

Ramri chungchangah khatihlaia sorkar khan chet thatna sawi tur an nei tlem hle in a rinawm a. Bairabi lama Assam nen  kan inrina chungchangah phei chuan an hlawhchham lehzual hle. March ni 10 ah Bairabi atanga kan haw hmain Bairabi pa, pathum leh nu pakhat nen kan titi naah chuan, "Boundary commision chairman pawh PC a nih laia a lo kal chuan ramri hi a rawn kawk hla khawp mai. Boundary commision Chairmian a nih hnua a lo kal erawh chuan arawn kawk hnai tawh khawp mai a, Barabi lui vel hi a rawn kawk mai mai tawh" tih an sawi a. He thu hi hmu hrang hrang atanga MZP awmkhawmna Group pakhatah ka post a. Bairabi tlangval pakhat chuan "He thu hi a sawi lai kei pawhin ka hria" a rawn ti var bawk.

Zofate chawlhbuk sak chungchanga Mizoram sorkar insawithiamna leh leh an chhuanlam ber chu ramri buai 'Disputed Area' a ni a. Status Quo a nih angin khawi lam lam pawhin 'kut thlak loh ve ve ni rawh se' tih hi a ni. Hei hi MZP te chauh hian an bawhchhia em tih hriat chiang a pawimawh hle a ni.

  'Status Quo' a nih vanga Mizoram sorkarin chawlhbuk tak ngial pawh sak an phal loh lai hian Assam erawh chuan huaisen takin Mizoram a nek pawp pawp a, a insumkar ve hlek lo thung.

Mizoram sorkarin a rama a pawm ngam china ngaih; Bairari lui ral lawkah Assam sorkar chuan school \ha tak a sa hmiah a. Hemi kiang lawkah hian Biak In (mandir) an sa bawk. Heng in pahnihte hi Mizo zirlaite an ven theih loh laiin Mizoram Police (IR) te chuan uluk fahranin an veng thei thung. 

Heng In pahnihte bakah hian Barbon tlangah Police Out Post \ha tak an siam a. Chakma leh Tuikuk raltlante In leh lo dintirin khua leh tui nihna an pe hial bawk nia hriat a ni a. Mizoram sorkarin \awngka lam a neih a, chhuanlam taka a neih 'Disputed Area & Status Quo' chu Assam sorkar chuan Mizoram sorkar hlauhna leh a mitmei venna nei hauh lovin kut thlakin in leh lo \ha tak tak a din hmiah hmiah mai a. Chungte chu ngaimawh miah si lovin Pu Ch. Chhunga lei leta MZP in chawlhbuk a sa ve mai tur erawh chu a ngaimawh em em si a ni. A lo mak thei ngei mai.

         Mizoram sorkar thar hian engtin nge an ngaih dawn chu ka hre lova, sorkar kalta kha chuan Bairabi lui chin khu Mizoram chin ngaiin a cheibawl tak tak niin a lang. Assam lamin kawng an siam a, school leh biak In an sak pawhin Mizoram sorkarin a ngaimawh lova, Mizoten thlam an sak hlek pawhin Assam lam chuan an ngaimawh em em thung a. Khu lai vela kawng kal leh hnathawkte chawlh hahdamna tur chawlhbuk tak ngial pawh kan sa thei lo bur chu a ni ngei bawk si.

       Ram ri humhalh hi thil pawimawh tak, sorkar in a tih makmawh a ni a. Ram ri ngai pawimawh lo sorkar chu malsawmna an dawng ziktluak lova, sorkar mek emaw, lo la sorkar leh turte pawhin ramri an ngai pawimawh lo a nih chuan an zuih tho dawn a ni.

          Thufingte 22:28 chuan *In pi leh puten hmakhawsanga ramri an lo kham tawh chu sawn suh u* a ti a. Pathian thupek zawm tur kan nih vang leh kan pi leh pute thlarau zah vang tal pawhin ramri kan ngai pawimawh em em tur ni ang.