WILDLIFE SQUAD-IN SILAI LEH SAVA REP AN MAN

Kawnpui | March 11, 2019: Inrinni khan Kawnpui Wildlife  Protection Squad chu Zanlawn, Mualkhang leh Khamrang VC huam chhungah duty-in an chhuak a; Sava veh tuma kal mek Silai pakhat leh Sapel mek Silai pakhat an man sak a; Sava rep lak sak an ni bawk a. Mi 5 te chu Police Station ah in report turin an hriattir.

Inrinni zingkar-ah Wildlife  Protection Squad te hian Kawnpui atangin Zanlawn an pan a; Zanlawn ram chhunga Ramar kah tum mi pakhat Silai leh a Mu an lak sak a; Zanlawna awm mek, Sava veh thin nia an hriat pawh an In-ah kalin a Sava rep lai an laksak bawk a. Sava kahna Silai chu hmun dangah a lo dah avangin amah chu Police Station ah in report turin an hriattir a ni. Zanlawn ah hian YMA hruaitute bia-in Sava veh thin leh Ram vak thin an la awm chuan Wildlife  Protection Squad hnenah report pe zel turin an ngen nghal bawk.

Chhun lamah Mualkhang leh Khamrang VC Area chhung-ah duty in an chhuak leh nghal a. Sairang kawng dunga chengte hnenah Sava veh leh ram vak an hmuh chuan report pe vat turin an hriattir bawk.

Hemi hnu hian Khamrang VCP hovin Khamrang ramhnuai, Tlawng lui kamah Wildlife  Protection Squad te hi an kal a. Hetah hian Aizawl lam mi Ram vak mi pahnih leh Khamrang mi pakhat an va hmu a; Silai an lak sak nghal bawk a; anni pawh hi Police Station ah in report turin an hriattir nghal bawk.

Khamrang ram chhungah hian khaw dang atanga Sava veh leh Ram vak an kal tam viau thin a. Inrinni-a Wildlife  Protection Squad te an kal lai pawh hian heng an mi man te bak pawh hi hmun dangah midang an awm niin an hria.

Kawnpui Wildlife  Protection Squad te chuan tun hnai lawkah hian vah chhuah zui leh nghal an rel a. A hun tur leh a hmun tur erawh puanzar a ni dawn rih lo. Silai te chu Licence nei pawh nise; ramhnuai-a ken anih a; Sava leh ramsa veh nana hman anih chuan an laksak zel dawn tih an sawi a; an Silai Licence ah Sava leh Ramsa veh nana hman phal anih loh avangin Dan anga acton lak zel tur a ni ang a; Licence nei lo Silai phei chu a kawltu nen an chungah action lak a ni ang an ti.

Kawnpui Wildlife  Protection Squad duty te hi Pu Vanlalruata Forest RO leh Pu Israela OC kawnpui Police Station ten an kaihruai a. Police Constable te; Awithangpa Group YMA President leh Joint YMA President te an tel bawk.

- chhuahtlang.com