MZP IN ZORAM ZALENNA SUAL TURA HMING ZIAKTU (SIGNATORIES) LA DAM TE CHAWIMAWI

Aizawl | March 1, 2019: Mizo Zirlai Pawl (MZP)  chuan vawiin khan MZP Conference Hall-ah MIZORAM ZALENNA PUANNAA HMING ZIAK la damte  a chawimawi.

He hun hi MZP vice president B Vanlaltana'n a kaihruaia, MZP president L Ramdinliana Renthlei bakah chawimawiten thutawi an sawi theuh a. He hunah hian Govt Aizawl North College, Political science 6th semester zirlaite an tel bawk. 

He huna thusawitu L Ramdinliana Renthlei chuan, "Vawiin hian kan hnamin mahnia ro in relna neih hran leh duh a, India Sorkar awpna hnuai atanga inlak hran leh duh a zalenna sual a nih leh theih nana hming ziak tute MZP chuan kan ngai hlu che u a, kan chhuang takzet che u a ni. Zoram hi kan pi leh pute atangin mahnia ro in relin kan awm thin a, khawi ram mahin min awpbet ngai lo a ni. Hun a lo kal zel a kum 1890 atangin British-in min awp tan ta a, Kum 1946 chhoah chuan British Sorkar chu a lo keh darh leh a, India-in min awp leh ta a, tun thleng hian India Sorkar hnuaiah kan la awm ta rih a ni. Vawiin hian Mizoram hi India ram a ni ngai lo tih hi Mizo thalaite hian kan hriat thar a ngai a ni." a ti.  

MZP president chuan, "Zalenna sualtute khan mahnia ro inrelna neih duhna thinlung an put vangin MZP chuan kan chhuang a, zalenna an sual tak tak a ni. Mizoramin zalenna a sualna chhan hi kawhmawh bawl vang emaw sual vang hrim hrim a sual kan ni lova, zalenna tluantlin min awmbettute atanga neih kan duhna avanga he thil hi lo thleng a ni. Rambuai laia kan tawrhnate kha mi thenkhatin sawinep tum mah se, sawinep theih a ni lo a, a nep thei chuang bawk lo a ni. India hian kan ram leh hnam nuna thil thleng rapthlak tak kha kan la theihnghilh lo a ni tih hria se kan duh a ni. Ram leh hnam tana nunna hlu tak hlantuten an nunna phal taka an hlanna te, silaimu kara mi tlawmngai tak takte thawhrimnate, kan nu leh pate'n Pathian an auhnate kha hre reng ila ka duh takzet a ni. Zofate hi Pathian in min la zawm khawm ang a, rem a tih hunah rorelna pakhat hnuaiah kan la awm ngei kan beisei tlat a. Zofate hi engtik niah emaw chuan ram rorelna pakhat hnuaiah awmin zalenna meichher hi kan la chhi dawn a ni. Kan hnam tana nunna hlan tute kha kan hre reng a, in hna thawh hi thangthar ten kan lo chhunzawm ve tawh dawn a ni."a ti bawk.  

Vawiin a MZP-in a Chawimawi takte chuan, "Zoramin Zalenna sual nachhan tur RAM kan la nei hi kan vannei hle a, Zalenna Sual avanga LUNGIN tanna chhan tur RAM kan nei hi kan lawm hle tur a ni, ZORAM Zalenna hi thangthar ten in chhunzawm tur a ni a, inmawhphurhna a ni a, A PHUTIN KAN PHUT che u a ni." an ti.  He hunah hian Zawhna leh chhanna hun hlawk thlak tak hman a ni bawk. 

Zoram Zalenna sual tura hmung ziak (signatories) chawimawi te chu:-  

1. Pu C. Lalkhawliana, Chanmari (MP)

2. Pu H. Thangkima, Upper republic  (Supply Minister)

3. Pu R. Zamawia, Tuivamit, MZU Road (Defense Minister & Army Chief) 

4. Pu Bualhranga, Dawrpui  (Senator)

5. Pu Dr. Saikunga Sailo,  Chanmari (MP)

6. Pu Zoramthanga, Chhinga Veng (MP)

7. Khawlremthanga, Zohmun  (MP)

8. V. Lalchhawna, Siaha  (MP) te an ni.