Mahni hnam i zahpui lovang u; kan harsatna a inan angin kan hlim leh lawmna pawh inang rawh se

(MZP president L Ramdinliana Renthlei in PZP Rising Day lawmna Aizawl central Hall, Venghlui a March 9, 2019 a a thusawi thenkhat.)


Mahni hnam i zahpui lovang u.

Pang in ni a, Pang ṭawng leh hnam hi a ral ang tih a hlauhawm.

Aziawl khawpuiah mi karah in awm a, in hnam leh ṭawng in zahpui mai ang tih ka hlau.

Mahni hnam, mahni ṭawng zahpui chu an dingchhuak ngai lo.

I ṭawng, Pang ṭawng leh pang hnam kha zahpui suh.

Pathianin Pang ni turin a siam che a, Pang hnam i zahpui chuan siamtu thil siam dan i zahpui tihna a ni.

Mahni nihna, mahni hnam hi i zahpui lovang u.

Khawi hmunah pawh awm ila, Pathian min dinna kan hnam hi i zahpui lovang u.

PZP member tam zawk, Aizawl a awm chu Zirna avanga awm in ni a. Mi dangin awlsam taka lehkha an zir laiin, nangni chu nu leh pain harsa taka an thawhchhuah hmanga harsa taka zir in ni a, in hlawhchham thiang lo.

Nu leh pain a sur a sa hnuaiah thlan tui fara an thawhchhuah hmanga lehkha zir hi a hlawhchham tur a ni lo. In khuaa in haw hunah, hlawhchhamin ni lovin hlawhtlinna nen in haw ngei tur a ni.

Aizawl ah hian Pang (PZP) val MCS 10 tal awm se, Aizawlah in mikhual ka ring lo. MSO leh SSPP te chuan MLA, MCS leh officer lian an nei a, Vawiin a in programe ang pawh hi an ni chu nise mi inphalte zarah awlsam takin an tih theih ngei ka ring.

mahse, PZP te chu chutiang in nei lova, chuvang chuan Mizo chi peng dangte um turin ṭan in lak a pawimawh a ni.

PZP thiltum, PZP General president Herbert Ramengmawia'n min sawirualpui kha Pang tawng ni mahse a pawimawh chin chu ka hrethiam a, khang zinga, 'Zirna tihhmasawn' tih kha ngaihpawimawh hle tur a ni a. Tin, Pang hnam chawisan pawh kha in thil tumah a tel ang ngeiin, Mahni hnam chawisang turin ṭan in lak a pawimawh. Zirlaite chanvo humhalh kawngah in thil tum anga harsate pui a, an chanvo in humhimsak a pawimawh.

Heng kawngah hian harsatna in neih a, a ṭul a nih chuan in tan MZP a awm, in tan a awm reng,Hnam anga harsatna, diriamna, neksawrna in tawk a nih chuan, in tana ding reng MZP hi in tan a nih chuan pen khat pawhin a tawlh ngai lovang.

Dawhtheihna, taimakna, tuarchhelna nen bei ula, hlawhtlinna in chang ngei ang. Pang harsatna chu MZP harsatna a nia, kan harsatna a inan angin kan hlim leh lawmna pawh inang rawh se, chu chuan hnam inpumkhatna a thlen lehzual ngei ang.

PZP vul zel rawh se.

Kan riam e.