Diktawn magazine in a thlan thin, Miss Chapchar Kut chu kumin ah pawh a vawi 10-na atan thlan leh a ni a, Nula Hmeltha leh nalh tam tak zingah Lucy Zorinpuii chu Miss Chapchar Kut 2019 atan thlan a ni.
Miss Chapchar Kut 2019 Lucy Zorinpuii chuan a hun chep tak karah exploremizoram.com tan inkawmna hun min siamsak a, kan lawm hle.
A hma lamah hlawhtlinna chang zel turin duhsakna kan hlan e.
Lucy Zonrinpuii hi TC Vanlala leh Lalhmingmawii te fanu niin, Unau panga an ni. Kum 1994 August 10 khan a lo piang a. A pa hna thawhna vangin Mizoram hmun hrang hrangah an awm thin. Tunah hian Luangmual, Aizawl-ah an cheng mek a ni. Zirna lamah HATIM aṭangin B.Com a zova, MZU atangin M.Com zo lehin, tunah hian Social Justice & Development ah accountant hna a chelh mek.
Hobby: Lem ziah leh Zai
 |
| Miss Chapchar Kut 2018 Lalremruati'n Miss Chapchar kut 2019 Lucy Zorinpuii Vakiria a khumtir lai. |
Duhzawng hrang hrangte:-
Lehkhabu: Bible
Actor: Lee min ho
Zaithiam: Lalduhsaki
Hla: ka rinchhan
Chawhmeh: Bai leh Sa(arsa leh vawksa)
Hmun: kan in
Kawppui tura duhzawng:
Pathian tih mi, ruitheih thil ti lo leh lerh lo.
Aim in life:
- Kan naupan lai anga aim in life neih chiam hi a har tawh a, eng pawh thawk in ti ila mi rinawm nih leh midang tana malsawmna nih hi ka aim in life chu a ni ber.
Diktawn Miss Chapchar Kût 2019 atan thlan i ni a, Chapchar Kût lawmnaa i kal khan hetiang hi i beisei reng em?
- Diktawn Miss Chapchar Kut hi ka nih ngai ka ring lova, ka kal pawh khan thiante nen kal mai mai kan ni a ka rilruah awm pha lo a ni.
Miss Chapchar Kût 2019 atan top 10 i tling i hriat leh Miss Chapchar Kut atana thlan i nih a i rilru puthmang leh i awm dan?
- Ka lawm lutuk hi a ni mai, Miss Chapchar Kut 2019 atan min thlan zan phei kha chuan ka nu leh pa hi an thutna ah ka hman melh hmasa ber a ka pa lawm hmel ka hmuh phei khan ka lawmna a zual a, sawifiah thiam bak hian ka lawm ni berin ka hria.
Modelling lam hi i tui reng em?
- Modelling hi ka tuina a ni lem lo.
Miss Chapchar Kût hi thlan zel chiah i ngai em? A thlan danah te thurawn i nei em?
- Miss cck hi thlan zel chi-ah ka ngai a,kum alo vei a thil alo tha in alo changkang zel anga phusui zawkin an tih zel pawh ka beisei.
Kohhran, Khawtlang leh nangmah?
- Kohhran,khawtlang leh keimah hi inzawm tlat ang a ni a, ka theih tawkin ka inhmang ve nasa.
Social Media leh nangmah?
- Social media hi nuam ka ti hle a bikin instagram.
Mizo hnam ṭhanmawh bawk nia i hriat?
- Taimakna tak tak kan nei thin lova, kan nih tur ang kan ni pha lo fo thin.
Mizo hnam damna atana kawng awm nia i hriatte?
- Taimak leh Pathian tih tlat a ni.
Hnam chhan nana Hmeichhiate ṭangkaina leh mawhphurna?
- Mizo hmeichhiate hi hnamchhan nan kan pawimawh hle a,kan hnam thilte hi kan ngaihlu tur ani a,chutiang bawkin kan kawppui atan pawh mizo mipa ngei ka thlan fan hi a tul hle in ka hria.
Kumin Chapchar Kût thupuiah Zofate inpumkhatna hman a ni a, he thil hi a thlen theih i ring em? Thleng thei turin engnge pawimawh nia i hriat?
- Kumin kan thupui Zofate Inpumkhatna hi tha ka ti a,kan kut nen pawh a inmil hle in ka hria.
Thleng thei tur hian Mizote hi kan hnamah kan chian a pawimawh a,hnam tan kan rinawm tlat a ngai a ni.
MZP in ZOFEST a buatsaih ṭhin hian Zofate inunauna kawngah a thawhhlawkin i hria em?
- MZP in Zofest a buaisaih thin hi Zofate inunauna atan a thawhhlawk hlein ka hriaa, tha ka ti khawp mai.
I thalaipuite tan thuchah:
- Ka thlalai pui tan chuan kan thiltih theuhah rinawm leh taima takin ti thin ila,min siamthu Pathin hi tih tlat chunga nun hi a tlo ber a ni.
www.exploremizoram.com i hmuh dan:-
- www.exploremizoram.com hi tha ka ti hle a,en mai awlsam in thil a fiah felfai hle bawkin ka hria.
_________________
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: