LALTHANSANGI MUSIC VIDEO ALBUM 'NANG CHAUH I NI’ TLANGZARH A NI TA

Mipui nghahhlelh leh ngaihthlak chak,  Lalthansangi @Sangtei music video album ‘NANG CHAUH I NI’ tih chu March ni 14 Ningani zan khan Chanmari YMA hall, Aizawl -ah Rev. Rosanga Kawlni chuan a tlangzarh ta. 

He music video albumah hian hla thar nalh em em mai 12 zet a awm a,  album tlangzarh zan hian copy thanem tak hralh nghal a ni a, mi tam takin a man toin an lei sak a ni. 

Album lei duh tan UPC Aizawl East District Office (Ramhlun S), UPC North Mizoram District Office(Tuikhuahtlang), General Hqrs Office(Mualpui Salem veng), Pentecostal Book Store(Millenium Centre, Aizawl) ah te lei theihin a awm reng e.

Bihchianna tawi:

Hla phuahtute:

Hla 12 ah hian Zorammuana of Siaha -in hla 8 a thawh a, hla dangte hi Tintin Lalmuankima of Chawlhmun-in hla 2, S Gouzakap of New Delhi- hla 1, leh Vanlalena @Maena of Rahsiveng - hla 1 te a ni. 

Lalthansangi Putea  Maena hla phuah tih loh hi chu kan la hriat ngai hauh loh hla thar, ‘ruah tham loh’ te an ni a, a mawiin a nalh hlawm takzet a, Album hming putu ‘Nang chauh i ni’ tih hi Chhimtuipui District PYD choir conductor Zorammuana phuah a ni.

Music & Musician: He album-a music siamtute hi mi 4 niin, Vulmawi Best Musician Award lawmman dawng hlim Larry Lalrintluanga of Gosen Recording Studio in hla 10 khawihin, Marina of Melody Records in hla 1, Ardy KC in hla 1 a khawih bawk. Music a nalhin a changkang takzet a. Genre chi hrang hrang – R & B, Alternative music, Western Gospel music, Soul, Pop, country pop, reggae, country, Mizo sentimental + folk music, slow rock, ballad, classical, blues bakah techno dance thlengin a tel a, heng genre hrang hrangte a mawi tawk chauha a inpawlchiat mai hi he album tihlutu a ni. Hetiang music style leh tone hrang hrangte hi zai tello pawha min ti danglam veng veng thei khawpa mawi leh nalh niin musician te pawh hian an uluk hle tih a chiang.

Video & Videographer : 

Music videos 12 zet mai hi Asânga Dosel Videography, Chiangtea Videography, Gosen Recording Studio, Ten 23, Peter Video Production leh Lalkohkima Ralte te kutchhuak a ni a. Music Video hi a tlangpuiin ‘Perfomance based music video’ kan tih ang chi niin artist Sis. Sangtei zai paha a performance kan thlir deuh ber a, musician-te kan hmuh hun pawh a fuh chat chat hle. Music video ti hmuhnawm tura changtu dang rawihna ang chi ‘Narrative based music video’ erawh pakhat a awm a, ‘concept based music video’ lam pawl lek lek - hla thu nen inmil midang che tla lai pholanna a awm zeuh zeuh bawk a, hei hian a ti hmuhnawm phah fu mai.

Video tin mai hi ‘color correction, theme, lighting, compostion, camera movement & angle, etc’ a fuh em em vek a, visual effects/after effects lam hmanna a tam lutuk lo hian video thlir a tinuamin a ‘natural’ hle a ni. Album hming putu video hi ‘Surrealist music video’ kan tih ang chi niin, chroma key hmanga thlawk thla delh delh kan hmu a, a changkang hle.

A changtunu Sangtei zai hmel hmuh a nuam a, expression a tawk chauhin a pe a, shooting neihna hmun hi Aizawl, Lunglei, Shillong chhehvel bakah Kuala Lumpur leh  Melbourne  khawpui te niin hmuh a nuamin a hahdam thlak vawng vawng hle. 

Audio / voice:

 Audio recording hi Melody records ah hla 1 tih a ni a, a dang hla 11 hi chu Gosen Recording studio-ah a neitupa pu Larry-an uluk takin a neih pui a, Sangtei hian recording studio a thlang thiam hle. 

Sangtei hi a zaithiam tih loh rual a ni lo. Amaherawhchu, he album thlira ngaihthlak hian Sangtei zaithiam lehzual zia kan hmu. Kha leh chen zaia rawngbawla lo fehchhuak tawh niin a zaithiam zia kan hria a; tunah hian a thiam lehzual a ni. Amah rau raua a fuhlohna lai (hnar zai lek lekin a aw a pawl thin te, a aw tlerh lek lek tel thin te, a aw fawn vibration ngaihno bei lo zeuh zeuh thin te) kha paihbo vek niin he album-ah hi chuan chutiang hriat tur a awm tawh lo. He album-a hlate hi genre hrang hrang a nih angin, ama signature tibo si lovin a zai leh aw pek dan pawh hla leh music milin a inherrem zel thei hi Sangtei hmasawn lehzualna a lang.

Second voice (part) pek a awm hlek hlek a, hei erawh hla dang aia danglam tehchiam a awm hran lo. A vai mai hian Sangtei zai hi a ngaihnawm fai vek mai.

Dress code leh make up: Zoram khawvel zaimi tam takte ang lo takin Sangtei hian a music video ah a thuam a thlak zung zung lem lo hi entawn tlak a ni. 

He album-a hla te hi mit ti tlai, beng faha leh thinlung fan ngaih theih tur te an ni vek a, ngaihthlak tawh pawha ngaihthlak nawn awn awn fo turte vek an ni. Isua Pathian a nihzia puanchhuahna hla te, Thuthlung fate chan ram ropui bik zia te, Khawvel hrehawm thlakhlelh tlak a nih loh zia te, Lal tan fehchhuak te tawrhna testimonial song ang chi te, Isua Krista belhtlak a nih zia te, Hringnun kalsiam inher vel dan te, kan beisei ber Vanram chungchang thu zaia chawina hla ten en inchawhpawlh he music video album hi Rs 250 man chauh a ni a, lei loh phal chi a ni lo. Video en lova audio chauh pawh ngaihthlaka thlarau nunram chawi kang veng veng thei khawp he albumah hian Lalpan Sangtei hmangin a dah e.

Thu (lyrics) ropui lungkuai ém ém mai te, a thlúk (tune) mawi fahran te, music changkang leh danglam zet mai te, a satu hmel leh aw mawi no nghelh mai te, video nalh leh changkang em em inchawhpawlh 'Nang chauh i ni’ music video album thlira ngaithla chungin damlai tuipui dung hi han chhir ve teh. 

-------------

Lal zun ngai kan kúr diam e ni chhun kan chhiar e,

Rúmin lei nun kan chhiar kan ṭap thin,

Lunglairil na e thangvan ngaih a na;

Chu ram chuan kei zawng min ko ve.

---------------