KAN THEIHNGHILH NGAI LO VANG

Phuahtu: Mafaa Hauhnar

(India Sorkar-in kum 1966, March ni 5-a a khua leh tui râlpui nuaia min nuai chiam champha Zoram Ni pualin)

Kan khawpui vutdûra in chantir kha,

A hma ang diak khan min dinsak leh dawn em?

Kan hliam-ser zawng zawng kha tirehin,

Kan nu leh pa, u leh naute thisen,

Tuihâwk ang maia in luantir kha,

Inhnûk kir leh thei dawn em ni?

Kan pitar, putar leh nunaute lungchhiat

Mittui zozaite kha in hru hul leh dawn em?

A tlâng tluana thlabâr leh ralṭi-a insiamte

Thinlung keh-sawmte in char khâwmin,

Kan hun leh tha hloh zozaite kha,

Min hmuh kirtir leh thei dawn em?

Fahrahte hnenah an nu leh pate pe lêtin,

An chin pawh hriat lohva ruang ṭawih ral ta

Kan laihrui-zawmpui unaute kha,

In kai thovin in tinung leh thei dawn em?

A nih loh chuan, min hrethiam ula,

Kan laka tawrâwt in chhuahna leh,

Chintâwk nei lova diriam taka,

Min hmelma beihna zawng zawngte kha,

Kan hriat reng loh lai pawhin,

Kan theihnghilh ngai lo vang.

(This poem is composed by Mafaa Hauhnar for remembering the inhuman bombing of Aizawl city by the cruel Indian Air Force that happened in March 5, 1966)